Örkumlaði konu sína

Afbrýðissamur eiginmaður á á hættu lífstíðardóm fyrir að höggva fingur af eiginkonu sinni vegna þess að hún stundaði nám í háskóla á laun. Rafiqul Islam, 30, batt bindi fyrir augu konu sinnar Hawa Akhter og límband fyrir munn hennar, og sagðist ætla að koma henni á óvart með gjöf.

Í stað þess að gefa henni gjöf, bað hann hana að halda út annarri hendi og hjó af henni alla fingur hægri handar. Einn af ættingjum hans kastaði síðan fingrunum í ruslið svo læknar gætu ekki grætt þá á aftur.

Herra Islam sem er farandverkamaður í Sameinuðu furstadæmunum hafði varað konu sína við alvarlegum afleiðingum þess að halda námi sínu áfram eftir að hann snéri aftur til síns heima í Bangladess.

Islam var handtekinn og játaði þegar verknaðinn. Hann býður nú dóms í höfuðborginni Dhaka en mannréttindasamtök þar í borg krefjast líftíðar fangelsisdóms fyrir að örkumla konuna.

Komið hefur í ljós að ástæða verknaðarins var afbrýði. Islam hafði aðeins lokið skyldunámi sem svarar til áttunda bekkjar en kona hans hélt áfram námi og innritaðist í háskóla.

Akhter segist nú vera að læra að skrifa með vinstri hendi og að hún sé staðráðin í að halda áfram námi.

Árásir af af þessu tagi á konur í Bangladess hafa færst í aukana síðustu misseri. Í júní mánuði t.d. stakk eiginmaður augun úr konu sinni sem var aðstoðarprófessor við háskólann í Dhaka.

Hvaða flokk kjósa ríkir Íslendingar

Klisjan segir að þeir ríkustu kjósi og hafi ætíð kosið Sjálfstæðisflokkinn. Þar hafi Kolkrabbar og önnur auðdýr hreiðrað um sig og í staðinn fengið ótakmarkað frelsi til að athafna sig í landinu og aðgang að bestu bitunum úr kjötkötlunum.

Þeir næst ríkustu héldu sig í námunda við Framsóknarflokkinn og þegar loks koma að því að einkavæða stöndug fyritæki í þjóðareign hafi framsóknarmenn og sjálfstæðismenn skipt þeim nokkurn veginn jafnt á milli sín.

En svo er bent á að fjölmargir verkamenn styðji og hafi stutt Sjálfstæðisflokkinn og stór hluti millistéttarinnar, þ.e. kaupmenn, tannlæknar, verðbréfabraskarar og aðrir vanabí ríkir.

Kommar og kratar segja þá vera þann hluta verkalýðsins sem ætíð sýni húsbóndanum hollustu, elski svipuna og telji það heiður að fá að taka við molunum sem af borði höfðingjanna falla, einskonar Tómas frændi íslensks mannlífs. Og að millistéttin sé ætíð sú sem hægt sé að sveigja til og frá með loforðum um betri afkomu.

Sjálfstæðismenn benda á móti á að að kommar og kratar séu upp til hópa undirmálsfólk sem horfi ætíð til ríkis og bæjar til að tryggja afkomu sína. -  Þeim sé hreppsómagalundin í blóð borin og sjálfsbjargaviðleitni þar á bæ sé hvergi að finna.

Hvernig hugsa þeir 1% ríkustu?

Jólatréið mitt

Hér koma myndir af jólatrénu mínu og hvernig ég fór að því að setja það saman. Efniviðurinn gefur ákveðna hugmynd um hvers vegna ég hef ekki efni á að kaupa "alvöru" jólatré. Ég birti þetta hér ef þetta mætti verða einhverjum til aðstoðar og öðrum til varnaðar. Þið skiljið hvað ég á við.

 

 

 

 

Yfir 90% með jólatré

Engin Jól

Ég veit satt að segja ekki hvort það verða haldin nokkur jól hér á bæ.

Loks þegar maður er búinn að komast aftur upp á lag með að hætta að versla þegar peningarnir eru búnir, kemur í ljós að maður hefur engin efni á að halda upp á fæðingarhátíð frelsarans með nokkurra daga átveislu eins og maður á að gera. -

Ég meina hvað gerir fólk þegar Hreindýrapatéið er komið á um 5000 kall og fylltu skeljarnar frá Nóa á 899 kr./st?

Og þegar maður fer að hugsa um það, er eitthvað bogið við þessa hátíð þar sem fólk situr í stofunni heima hjá sér fyrir, framan dautt tré og maular hnetur og sætindi úr sokk.

Og svo eru það gjafirnar allar. Mér var kennt að það sé ekkert eins grimmúðlegt og að gefa barni eitthvað nytsamlegt í jólagjöf. Spurningin er hvort það komist meira skran fyrir inni hjá stelpunni minni.

Naa, best að halda bara vel upp á nýárið og sleppa jólunum að þessu sinni.

Mikill verðmunur á jólamatnum

Eftirmæli

Sic transit gloria mundi    (dýrð heimsins er hverful).

Silvio Berlusconi um drápið á Muammar Gaddafi.

 

 

 

 

 

Með kveðju frá Kína

Myndirnar hér að neðan sýna ungar konur í fangelsi í Kína. Af myndunum mætti halda að konurnar væru aðeins að sinna sínum daglegu störfum í fangelsinu. Samt eru myndirnar teknar aðeins nokkrum tímum og sumar, nokkrum mínútum áður en þær voru leiddar út í fangelsisgarðinn og skotnar í hnakkann.

Fyrsta myndin er af Dai Donggui, sem hlaut dauðadóm fyrir eiturlyfjasmygl. Hún mátar fatnaðinn sem hún ætlar að klæðast við aftökuna, sem fer fram morguninn eftir.

Síðasta óskin; Kl: 21:15 kvöldið fyrir aftöku sína fær Li Jujua, dæmd til dauða fyrir eiturlyfjasölu, fangavörð til að skrifa niður síðustu óskir sínar.

Undirbúningur;  Donggui, í járnum bæði á höndum og fótum, brýtur hún saman klæðnað sinn í á mottunni sem hún mun sofa á síðustu nóttina.

Síðasta máltíðin; Donggui tekur upp skál með grænni baunasúpu, McDonalds franskar kartöflur, hamborgara og ís.

Xiuling, er sú yngsta af konunum á dauðadeildinni. Hún virðist óróleg. Annar fangi matar hana seint um kvöldið fyrir aftökuna

 .

 

 

 

 

 

 

Vottur af mannlegri reisn; Xiuling brosir um leið og hún treður sér í skóna sem hún gengur í til aftöku sinnar.

Beðið eftir að tíminn líði; Xiuling og Ma Qingxiu, báðar dauðadæmdar, spila á spil en fangaverðir og aðrir fangar horfa á.

Engin þörf fyrir þessi föt lengur; Kl; 06:30 um morguninn og Qingxiu þriðja frá hægri) biður fangaverðina að gefa flíkur sínar öðrum föngum sem þarfnast þeirra.

Föt valin til aftökunnar; Xiuling mátar svartan bol. Henni finnst hún lita út feitari í þeim hvíta.

Erfiður spölur: Kl. 70:00 að morgni. Fangarnir dauðadæmdu eru leiddir inn í fangelsisgarðinn til að mæta dauða sínum.

Fangarnir eru sýndir öðrum til varnaðar; Aftökurnar eru fjöldaaftökur.  Xiuling fer fyrir 16 öðrum föngum á leið á aftökustaðinn. 
 

Nokkrum mínútum áður en skotin ríða af í hnakka hinna dauðadæmdu; Aðeins Xiuling brestur í grát.

Flestar þessar konur voru burðardýr eða voru notaðar af "kærustunum" sínum til að selja eiturlyf í Kína. Kína tekur af lífi fleiri sakamenn en nokkuð annað ríki, bæði hvað fjölda snertir og miðað við fólksfjölda í landinu.

Myndirnar eru fengnar af mailonline
 

Kínaforseti fagnar Íslandstengslum

Afreksíþróttir, til hvers?

Eins og fram kemur í fréttinni er sá tími löngu liðin er hægt var að stunda afreksíþróttir í frístundum. Nú þurfa einstaklingar fjárstyrki ef að þeir eiga að ná árangri og stunda viðkomandi íþrótt eins og fullt starf.

Sumar íþróttir sem stundaðar eru, koma aldrei til að skila viðkomandi daglaunum, svo hann þarf að reiða sig á opinbera styrki og framlög frá fyrirtækjum. 

En þá má spyrja; hver er ávinningurinn af því fyrir einstakling að stunda íþrótt sem fullt starf ef það gefur ekkert í aðra hönd?- Íþróttafólk og unnendur virðast ganga að því sem sjálfgefnu að það sé bæði nauðsynlegt og gott.

Og til hvers þarf landið að eiga "afreksfólk" í þeim greinum í íþrótta sem ekki gefa keppendum neinar tekjur af iðkun sinni. Hver er tilgangurinn með slíkum afreksíþróttum yfirleitt?

Á Atvinnumennska í íþróttum ekki í raun aðeins rétt á sér í þeim greinum sem standa undir sér sjálfar með tekjum af auglýsingum og aðgangsmiðasölu?

Af fagurgala og nýju fötum keisarans

Verða 109 háskólamenn kærðir fyrir siðanefnd HÍ

Vantrú kærði vinnubrögð Bjarna Randvers Sigurvinssonar fyrir siðanefnd HÍ eins og kunnugt er.

Bjarni Randver sætti sig ekki við vinnubrögð siðanefndar eða sáttatillögu hennar sem hann telur fela í sér áfellisdóm yfir sér.

109 háskólamenn skrifa undir yfirlýsingu  þar sem störf siðanefndar eru harðlega gagnrýnd og stuðningi lýst við Bjarna Randver og vinnubrögð hans.

Vantrú bregst við með yfirlýsingu  þar sem háskólafólkið sem skrifaðu undir stuðningsyfirlýsinguna við Bjarna er sakað um það sama og Bjarni var sakaður um, þ.e. skort á faglegum og akademískum vinnubrögðum. Vantrúarmenn segja;

"Í forspjallsvísindum (og skyldum námskeiðum), sem hafa verið mikilvægur þáttur í grunnnámi við Háskóla Íslands, er minnt á þá siðferðilegu kröfu, sem gerð er til fræðimanna, að rangt sé að mynda sér skoðun út frá ófullnægjandi forsendum. Telja allir þessir kennarar og háskólamenn sig hafa haft fullnægjandi forsendur í málinu, jafnvel þótt þeir hafi aðeins kynnt sér aðra hlið málsins? Mögulega skrifuðu sumir undir þessa yfirlýsingu í flýti eða hugsunarleysi, og það er einnig alkunna að tímaskortur þjakar háskólafólk sem aðra, sérstaklega í miðri prófatíð, svo ekki er viðbúið að allir hafi haft tíma til að kynna sér málið til fullnustu. Það er þó ekki afsökun fyrir að skrifa undir yfirlýsingu sem þessa án þess að kynna sér athugasemdir allra aðila."

Það liggur því beint við að Vantrú kæri þessa 109 háskólamenn fyrir siðanefnd HÍ.

Yfirlýsingin frá háskólafólkinu virðist taka af allan vafa um að eitthvað hafi verið að kennslu Bjarna. Það virðist taka að sér verkefni siðanefndar, og segja:

"Ekkert í gögnum málsins bendir til þess að kennarinn hafi á neinn hátt gerst brotlegur við siðareglur HÍ. Fyrir liggja yfirlýsingar frá sjö nemendum er sátu námskeið Bjarna um nýtrúarhreyfingar og segja þau öll kennsluna hafa verið til fyrirmyndar, hvergi hafi verið hallað á Vantrú eða aðrar trúleysishreyfingar. Þessar yfirlýsingar eru studdar af greinargerðum tíu sérfræðinga í túlkunarvísindum sem allir lýsa því yfir að ekkert sé út á kennsluglærur Bjarna Randvers að setja. Margir þessara sérfræðinga þekktu ekkert til Bjarna áður en þeir skrifuðu greinargerðir sínar.

Síðast en ekki síst fóru svo fjörutíu háskólakennarar yfir þau málsgögn sem lágu fyrir og komust að þeirri niðurstöðu að Bjarni hefði ekki á neinn hátt gerst brotlegur við siðareglur og að ekkert tilefni væri til að gagnrýna kennslugögn hans í námskeiðinu."

Vantrúarmenn hafa sitt hvað annað við yfirlýsingu háskólafólksins að athuga. Eftirfarandi túlka þeir t.d. sem hálfgerða "hótun um að háskólakennarar muni einfaldlega draga kennslu sína inn í skel,".

" Ef siðanefnd HÍ telur að í kennsluglærum Bjarna sé að finna ámælisverð atriði má allt eins hætta að nota glærur í kennslu við Háskóla Íslands, kennarar geta látið vera að setja glærur sínar á vefsíður námskeiða, og hverfa má frá að taka upp kennslustundir fyrir fjarnema. Því þá er sýnt að í framtíðinni verður enginn kennari lengur óhultur fyrir kærum utan úr bæ, enda líklega hægt að finna eitthvað sem einhver er ósammála í glærupökkum flestallra kennara á Íslandi, hvort sem þeir kenna við HÍ eða aðra skóla landsins."

Vantrú boðar nákvæma úttekt á glærunum sem Bjarni Randver notaði í næsta helgarblaði Morgunblaðsins og því ljóst að ekki eru öll kurl komin til grafa í þessu máli.

Skorti fagleg vinnubrögð

Nýr forseti, nýtt embætti

Hvort sem Ólafur Ragnar býður sig fram eða ekki, er ljóst að hann hefur með veru sinni í embættinu gjörbreytt eðli þess. Í næstu kosningum  ganga landsmenn í fyrsta sinn til forsetakosninga með þann skilning að það skipti þá persónulega máli,  hver þjónar í þessu embætti.

Engin mun líta til þess eingöngu í næstu kosningum til hversu kúltiveraður frambjóðandinn er, þótt það hjálpi að hann kunni mannasiði.

Engin mun velja aftur forseta sem sátt ríkir um vegna þess að hann lofar að halda skoðunum sínum til hlés, í mikilvægum málum fyrir þjóðina. - Næsti forseti verður valinn á allt öðrum forsendum.

Megin tilgangur embættisins er allt í einu orðin sá að standa vörð um hagsmuni þjóðarinnar gagnvart meirihluta þingsins og ríkisstjórna sem vilja þvinga óréttlátum lögum upp á þjóðina.-

Til þess að geta sinnt því hlutverki þarf persónu með bein í nefinu sem getur staðið upp í hárinu á gírugum flokshestum og séð í gegnum flokkadráttapólitíkina, aðal ókosts þess lýðræðiskerfis sem við búum við. -

Þannig verður forsetinn að sönnu sameiningartákni, sem fulltrúi okkar erlendis, en ekki síður innanlands. - Möguleikinn á að skjóta dellu-frumvörpum og umdeildum tillögum ríkisstjórna til þjóðarinnar, verður megin forsenda þessa tákns.

Ekki enn gert upp hug sinn

Lýðræðið sigrar

Nú hrín mikið í lýðræðisandstöðunni. Þeim er brugðið. Áróður hennar er að missa marks. En þetta eru góðar fréttir sem segja okkur að þjóðin er að ná áttum. Stuðningur við forræðishyggjuöflin er á undahaldi.

Auðvitað er það eina vitið að ljúka ESB viðræðunum. Annars fær þjóðin ekki að kjósa um málið. Ekki má taka af henni þann rétt eins og forysta Sjálfstæðisflokksins vill. 

Heppilegt einnig að Framsókn sé ekki stór flokkur. Andstaða þess flokks við lýðræðið er alkunna og kemur berlega í ljós í þessari könnun. 63% stuðningsfólks hans er á móti því að klára þessar viðræður, svona álíka og hlutfallið meðal allar þjóðarinnar sem eru með því á að klára viðræðurnar.

 

Meirihluti vill ljúka ESB-viðræðum

Ljónynjan Amy Winehouse og "ábreiðurnar"

Það er líkast til orðið of seint að þræta fyrir það að Amy Winehouse hafi látist af völdum eiturlyfja, því vissulega er alkahól eiturlyf.

En eina "eiturlyfið" sem fannst í líkama hennar við krufningu var alkahól og það var í svo miklu magni að það leiddi hana til dauða.

Hún var svo þekkt fyrir að hafa dópað og djammað svo mikið,  lengst af ferli sínum,  að fólk gerir sjálfkrafa ráð fyrir því að hörð eiturlyf hafi stuðlað að dauða hennar.

Ég eyddi góðum hluta dagsins í að hlusta á nýju plötuna enda mikill Amy aðdáandi og er mjög ánægður með hana. Sérstaklega af því að öll lögin eru óskeytt og engin stafræn trix notuð til að setja saman gamlar og nýjar upptökur.  -  

En eitthvað segir mér að þetta verði ekki það síðasta sem við heyrum frá Amy, þar sem ógrynni af óunnu og auðvitað óútgefnu efni er til eftir hana.

Faðir hennar hefur nú stofnað minningarsjóð um hana sem styrkir heimili fyrir fötluð börn. Ágóðinn af tónlist Amy er sagðir renna að mestu til þessa minningarsjóðs.

Í þessari frétt um plötu Amy er aftur notað orðið "ábreiður" um cover lög, þ.e. lög sem einhver annar en Amy hefur samið og flutt áður. Þetta orð (ábreiða) virðist vera að festa sig í sessi í málinu sem er skelfilegt.

Getur ekki einhver lagt hausinn í bleyti og komið upp með almennilega þýðingu á þessu  orð fyrst fólk getur ekki haldið sig íslensku leiðina við að lýsa þessu fyrirbrigði?

Winehouse á topp breska vinsældalistans

Fjársjóður í fjörumálinu

Á gangi um fjörur landsins er ekki ómögulegt að fyrir fótum þínum verði fjársjóður sem þú áttar þig ekki á að, gramm fyrir gramm,  er verðmætari en gull. Um er að ræða svo kallað hvalaambur (ambergris - gráambur) stundum einnig kallað "ambri".

Efnið kemur úr iðrum búrhvala sem eru farhvalir og að Íslandsströndum koma oft ung karldýr og gamlir tarfar. Efnið gengur bæði upp úr og niður af hvalnum og flýtur á yfirboði sjávar uns það rekur stundum upp á fjörur landsins.

Hér er vitanlega ekki átt við fitubólstrið (spermaceti) sem liggur efst í höfði búrhvela,  vaxkennd olía sem var afar eftirsótt afurð og hvalurinn var mikið til veiddur til að komast yfir.

Hvalambur var og er notað sem bindiefni í vönduð ilmvötn og smyrsl og jafnvel sem bragðefni í mat, þar á meðal súkkulaði og vín. 

Vegna þess hve sjaldgæft það er má selja grammið af því á um 2500 krónur.

Fundist hafa hvalamburs klumpar sem vega allt að 15 kg. Rannsóknir sýna að þegar að hvalambur er borið á húð, leysir það úr læðingi fermóna sem er ástæðan fyrir orðstír þess sem afar kynörvandi efni. 

Til að byrja með er af því saurlykt en með tímanum verður lyktin sætari. Hvalaambur finnst í mörgum litum og getur haft hin ýmsu form. Þetta gerir fjörulöllum stundum erfitt fyrir með að þekkja efnið. Oftast er það samt hvítt, grátt eða brúnt.

Það getur verið sem flöt afrúnnuð kaka, ólögulegur en sjósorfinn klumpur eða hnullungur. Ef efnið er orðið mjög gamalt er það oft svart á lit og mjúkt viðkomu, ekki ólikt tjöru. En oftast er það hart en um leið vaxkennt og yfirborð þess eða ysta húð mött og leirkennd.

Hægt er að ganga úr skugga um hvort efnið er hvalaambur með einfaldri tilraun. Hitaðu nál og legðu hana upp að efninu. Ef um hvalambur er að ræða, bráðnar efnið samstundis og breytast í olíukenndan vökva sem musk-ilmandi reykur líður upp frá.

 

Kalkúnn - Kalkúni

Þegar að fyrstu Evrópubúarnir settust að í Norður Ameríku trúðu þeir almennt að landið væri hluti af Asíu.

Þessi trú birtist á margan hátt, m.a. í nafngift fuglsins sem á Íslandi er nefndur kalkúnn. Kalkúnn er uppruninn í Norður Ameríku og var snemma gerður að þjóðafugli Bandaríkjanna.

Fuglinn var afar algengur á austurströnd norður Ameríku og landnemarnir kölluðu fuglinn Turkey og héldu að þarna væri á ferðinni Gíneufugl (Numididae) sem einnig var kallaður Tyrkjafugl, Tyrkjahæna eða Tyrkjahani í mörgum Evrópulöndum.  Tegundin sem er annars útbreidd í Asíu var einmitt flutt til mið-Evrópu í gegnum Tyrkland.

Í Frakklandi er fuglinn samt nefndur poule d´Indes eða  Indlandshæna,  en Hollendingar öllu nákvæmari, kalla hann kalkoen eftir borginni Kalkútta á Indlandi og eftir þeim herma Íslendingar sína nafngift. Svo virðist sem tvær útgáfur af nafninu í nefnifalli og þolfalli séu notaðar jöfnum höndum á landinu, þ.e. Kalkúnn, kalkún og Kalkúni, kalkúna og kann ég ekkiskýringu á því.

Eins og margir eflaust vita  er kalkúninn vinsæll Þakkargjörðardags- og jólamatur hjá Bandaríkjamönnum og jólamatur hjá Bretum.

Einhver brögð munu vera að því í seinni tíð að Íslendingar borði kalkúna á jólum en í könnun sem MMR gerði í fyrra, kemur í ljós að landinn er ekki eins ginkeyptur fyrir kalkúna í jólamatinn og halda mætti. 

"Af þeim sem tóku afstöðu sögðust 52,9% líklegast hafa hamborgarhrygg á aðfangadagskvöld, 9,8% töldu líklegast að þeir myndu borða rjúpu og 8,3% ætluðu að borða kalkún á aðfangadag. Á jóladag sögðust 72,7% landsmanna líklegast myndu borða hangikjöt og 8% hamborgarhrygg. Svo virðist sem breytileiki í jólamatnum sé aðeins meiri hjá landanum á aðfangadagskvöld en hefðir og venjur ráði ríkjum á jóladag.

Áhugavert var að skoða niðurstöðurnar fyrir Ísland í samanburði við sambærilega könnun YouGov í Bretlandi dagana 2. – 3. desember 2010. Þar á bæ virðast breskar matarhefðir hafa vikið nær alfarið fyrir bandarískum áhrifum því 56% Breta segjast ætla að hafa kalkún í matinn á jóladag í ár. Kalkúnninn bandaríski kemur því í staðin fyrir hina hefðbundnu jólagæs sem Bretar neyttu áður fyrr á jólum en 2% bresku þjóðarinnar sögðust ætla að borða gæs á jóladag í ár."

Tuga uppskrifta af kalúna er að finna á netinu. Ég læt hér að lokum fylgja krækju á eina mjög hefðbundna.

Kína gefst ekki upp

Huang Nubo er ekki af baki dottinn þótt hann hafi fengið neikvætt svar um að kaupa Grímsstaði. Þrátt fyrir yfirlýsingar hans um að honum hafi verið sýnt óréttlæti og hann hafi mætt þröngsýni, og að hann hafi að þeim sökum hætt við að reyna að kaupa Grímsstaði, er hann aftur farinn að banka á dyrnar hjá stjórnvöldum á Íslandi. 

Huang vill endilega kaupa Grímsstaði og einhverjir sem telja sig geta komið hlutunum þannig fyrir að það sé hægt, eggja hann áfram. Huang hélt því fram að hann hefði ekki tapað neinu sjálfur á tilraun sinni til að ná Grímsstöðum. Nú segir hann að ferlið hafi kostað  mikið fé. Hver var það sem kostaði tilraunina?

En umdeild ákvörðun Ögmundar, er sem sagt í endurskoðun, viðhorf Huangs til stjórnarfarsins á Íslandi hlýtur að vera endurskoðun og ákvörðun hans um að fjárfesta einhversstaðar annarsstaðar er í endurskoðun. - Allt þetta endurskoðunarferli fer að stað eftir að ljóst varð að kínversk yfirvöld eru ekki á þeim buxunum að endurskoða sína stefnu sem er að ná með einhverju móti fótfestu á landi sem liggur að norður heimsskautasvæðinu og þeim siglingaleiðum sem þar eru að opnast.

Ögmundur vann þessa orrustu, en stríðið er ekki búið. Það sem Kína vill, fær Kína. - Gömlu geimvísindaskáldsögurnar um ófreskjurnar sem komu utan úr geimnum til jarðarinnar í leit að nýtanlegum auðlindum, eftir að hafa gjörnýtt sínar eigin, er orðin að veruleika. Nema að það eru ekki geimverur sem fara um jörðina og mergsjúga hana hvar sem þeir fá tækifæri til, heldur Kínverjar.

Fólk sem heldur enn að Huang sé að sækjast eftir því að fjárfesta á Íslandi af einhverjum mannúðarhugsjónum, ættu að kynna sér starfsemi kínverskra fyrirtækja í þeim Afríkulöndum sem þeir hafa náð náð að nýta sér fátækt og ringulreið til að komast að auðlindum landsins, sem sumstaðar þeir greiða fyrir með vopnum og "vernd". Einnig í suður Ameríku hafa kínversk fyrirtæki, í krafti nýfengins dollara-gróða sem skapaður er með blóði og svita fátækrar kínverskrar alþýðu, keypt gríðar stór landsvæði og þar á meðal heilu fjöllin til að vinna úr þeim málma og efni sem þeir flytja síðan til Kína til frekari vinnslu.

Vonandi sjá íslensk stjórnvöld og almenningur í gegnum þessa svikamillu Huang Nobo fyrir hönd kínverskra stjórnvalda og hafna öllum tilboðum í að gera íslensk landsvæði að nýlendum þeirra.  

Vill enn fjárfesta á Íslandi

Darth Vader versus skoskur smalahundur

VW Darth Vader auglýsingin er svo sem vel að þessari útnefningu komin. Hún er skemmtileg og það er meira en hægt er að sega um 90% af sjónvarpsauglýsingum. Maður getur horft á hana nokkrum sinnum áður en maður fær leið á henni.

Eina auglýsingu hef ég samt séð sem mér finnst alltaf jafn góð og fyndin. Hún er fyrir gleraugnabúðirnar Specsavers í Bretlandi. Kannski er það bara hversu "íslensk" hún er sem mér finnst hún svona skemmtileg.

Besta auglýsing ársins

Hindurvitnin og Vantrú

"Tilgangur Vantrúar er að berjast gegn boðun hindurvitna í samfélaginu, s.s. skipulögðum trúarbrögðum, skottulækningum og gervivísindum", eins og þeir orða það.  - Til að engin velkist í vafa um hvað meint er með "hindurvitnum" er orðið útskýrt á heimsíðu félagsins;

Til hindurvitna hljóta að teljast allar þær hugmyndir sem sprottnar eru af fáfræði og ekki er hægt að bakka upp með rökum. Með öðrum orðum fullvissa um það sem eigi er auðið að sjá.  Við lifum í rannsakanlegri veröld og getum byggt þekkingu okkar á því sem búið er að skoða með viðurkenndum rannsóknaraðferðum.

Þetta er skrifað af manni sem veit að ýmislegt sem búið er að skoða með "viðurkenndum rannsóknaraðferðum" og vísindamenn og almenningur í kjölfarið,  trúði að væri sönn þekking, er það ekki endilega. 

Við vitum ekki fyrir víst að það sem búið er að sanna vísindalega, sé sannleikur? 

Vísindalegar aðferðir eru vissulega besta leiðin sem við þekkjum til að uppgötva lögmál alheimsins en þær eru alls ekki óskeikular. Eins og það er mikilvægt að taka mið af vísindunum er jafn nauðsynlegt að hafa í huga að þau eru ekki eina leiðin til að öðlast þekkingu. Rökhugsun og íhugun eru líka þekkingarleiðir og vísindaleg vinnubrögð njóta meira að segja góðs af þessum þekkingarleiðum. 

En hver er ástæðan fyrir því að ekki er hægt að treysta vísindunum 100%. Svarið er að mistök eru gerð í rannsóknunum,  fyrir fáfræði.

Og allar hugmyndir sprottnar af fáfræði samkvæmt útskýringum Vantrúar eru hindurvitni sem félagsskapurinn berst gegn.  -

Mér finnst þetta ansi þröngur stakkur sem Vantrúarmenn sníða sér og götóttur að auki.

Einu rökin sem þeir vilja taka gild eru svo kölluð vísindaleg rök og vísindaleg rök eru að þeirra mati þekking sem búið er að grundvalla með viðurkenndum rannsóknaraðferðum, eingöngu.

Saga vísindanna geymir mýmörg dæmi um hvernig vísindaleg þekking sem fólk trúði að væri sannleikur, er það ekki.  Líkurnar á að við aðhyllumst einhverjar vísindalega sannaðar hugmyndir í dag sem í framtíðinni verða afsannaðar, eru mjög miklar. -

Jafnvel undirstöðu-kenning eins og  afstæðiskenning Einsteins, er í dag dregin í efa. Ef hún verður afsönnuð, eins og margt bendir til að verði, munu fjöldi annarra eðlisfræði og alheims kenninga falla með henni.

Er það mögulegt að átrúnaðragoð vantrúaðra eins og Einstein, Hawking og Dawkins hafi byggt heimsmynd sína á kenningu sem  miklar líkur eru á að sé ósönn. Hvað verður þá um hugtök eins og svart efni, svarta orku og svart flæði, allt vísindaleg hugtök,  sem þeir slá um sig með til að útskýra tilvisst og mekaník alheimsins, en enginn hefur samt minnstu hugmynd um hvað er

En útskýring Vantrúar á orðinu hindurvitni heldur áfram;

Samt sem áður kjósa margir að byggja heimsmynd sína á gömlum fullyrðingum um yfirnáttúrlegar verur, þrátt fyrir að ekkert bendi til þess að þær séu nokkuð meira en hugarburður.

Þar til þeir sem þessu halda fram geta sýnt og sannað að þetta sé annað og meira en órar hlýtur að vera réttmætt að afgreiða þetta sem hindurvitni.

Hugtakið hindurvitni nær auðvitað yfir margt fleira en yfirnáttúru, en öll yfirnáttúra verður að flokkast undir hindurvitni.

Sem sagt, þrátt fyrir að niðurstöður vísindalegar aðferða séu ekki alltaf réttar, þegar þeim er beitt að fyrirbærum sem þó eru mælanleg,  gera Vantrúarmenn þá kröfu til þeirra sem t.d trúa á tilvisst Guðdóms að þeir sanni tilveru hans á vísindalegan hátt. 

Geti hinir trúuðu það ekki, skulu trúarbrögð þeirra stimplast hindurvitni og hugarburður. Þetta gera þeir vitandi að ekki er einu sinni hægt að framkvæma vísindalegar tilraunir á sjálfum Guðdóminum. Vísindin ná aðeins til náttúrlegra hluta, ekki yfirnáttúrlegra.

Guðdómurinn er samkvæmt skilgreiningu í eðli sinu órannsakanlegur. Hugmyndir manna um tilvist hans styðjast samt við sterk innri rök sem ekki hafa verið hrakin og fyrir trúaða er hverskonar endanleg sameiningarkenning ómöguleg án hans. 

Vantrúarmenn afneita öllu slíkum rökum og kalla allar slíkar hugmyndir hindurvitni og berjast gegn þeim. Þeir vilja aðeins hlusta á ákveðna gerð að rökum, þá gerð sem útilokar fyrirfram Guðdóminn.

Besta nafnið á flokkinn

Ég held að ég viti hvað þessi nýi stjórnmálaflokkur verður kallaður. Besta nafnið verður fyrir valinu. En það má ekki upplýsa um það fyrr en á þrettándanum, eftir að allir jólasveinarnir eru farnir heim til sín. Og ég er líka alveg pottþéttur á því hvað hann verður ekki kallaður. Hann verður ekki kallaður O framboðið eða neitt af nöfnunum á eftirfarandi lista.  

• Framsóknarflokkurinn
• Hreyfingin
• Samfylkingin
• Sjálfstæðisflokkurinn
• Vinstri hreyfingin - grænt framboð
• Borgarahreyfingin
• Frjálslyndi flokkurinn
• Samtök Fullveldissinna
• Alþýðubandalagið
• Alþýðuflokkurinn
• Bandalag jafnaðarmanna
• Baráttusamtök eldri borgara og öryrkja
• Borgaraflokkurinn
• Flokkur mannsins
• Framboðsflokkurinn
• Framfaraflokkurinn
• Heimastjórnarflokkurinn
• Hinn flokkurinn
• Húmanistaflokkurinn
• Íhaldsflokkurinn
• Íslandshreyfingin - lifandi land
• Kommúnistaflokkur Íslands
• Landvarnaflokkurinn
• Náttúrulagaflokkur Íslands
• Nýtt afl
• Samtök frjálslyndra og vinstri manna
• Samtök um kvennalista
• Sameiningarflokkur alþýðu - Sósíalistaflokkurinn
• Samtök um jafnrétti og félagshyggju
• Sólskinsflokkurinn
• Þjóðræðisflokkurinn
• Þjóðvaki
• Þjóðvarnarflokkur Íslands
• Öfgasinnaðir jafnaðarmenn

Nýtt nafnlaust stjórnmálaafl

Við græðum á Kötlu

Ísland hefur verið valið eftirsóknarverðasti áfangastaður í heiminum á næsta ári af vinsælustu ferðaritum heims. Umfjöllun blaða og ferðasíðna á netinu benda til þess að það stefni í metaðsókn að landinu á næsta sumri, enda undirbúa a.m.k. tvö ný flugfélög áætlunarflug til landsins yfir háannatímann. -

Búast má við að samkeppnisaðilar Íslands bregðist við og greinar eins og þessi um yfirvofandi gos og aðrar hættur,  birtist nokkuð reglulega fram eftir vetri.  Annars er þessi ákveðna grein úrfelli úr umfjöllun víðlesinnar fréttaskýringar um Kötlu á vef BBC. - 

Umfjöllunin um Eyjafjallajökul skilaði mikilli aukningu ferðamanna til landsins á sínum tíma og hætt er við að meint neikvæð umfjöllun um Kötlu nú,  geri það líka. Og jafnvel þótt Katla gjósi, verður það aðeins til góðs fyrir ferðaþjónustuna. Eldgos eru spennandi kostur.

Útlendingar varaðir við Kötlu

Broskarlarnir í Vantrú

Vantrú sakar stundakennara í HÍ um að segja eitthvað ósatt um Vantrú í tíma. Þeir senda mann á vettvang til að ná í gögn sem þeir telja sanna að kennarinn hafi sagt eitthvað ljótt um þá. Með gögnin í höndunum kæra þeir kennarann.

Kennarinn neitar öllum sökum og segir að vantrúarmenn leggi hann í einelti.

Til að sanna mál sitt hefur hann safnað á annað hundrað af greinum sem skrifaðar eru af Vantrúarfólki þar sem  farið er óvægum orðum um hann.

Auk þess komst hann yfir gögn af lokuðum spjallvef Vantrúar þar sem meðlimir Vantrúar skemmta sér við að rakka hann niður í einkasamræðum.

Vantrúarfólkið neitar að hafa lagt Kennarann í einelti eða sagt eitthvað ljótt um hann. Þeir vilja bara að einhver taki þá alvarlega og ekki sé talað illa um þá upp í  Háskóla.

Auk þess segja vantrúarmenn að gögnin sem kennarinn hafi undir höndum þar sem Vantrúarmeðlimirnir eru að segja eitthvað ljótt um hann,  hafi verið tekin ófrjálsri hendi. 

Þess vegna sé ekkert að marka þau.

Þetta voru orð töluð í trúnaði, einkasamræður á milli Vantrúarmeðlima þar sem þeir gátu sagt hug sinn allan og ekki þurft að slá í og úr eins og þeir gera oftast opinberlega.

Þetta verður fólk að hafa í huga þegar það dæmir Vantrúarfólkið.

Það sem þeir segja í trúnaði sín á milli, er ekki sannleikur, nema bara fyrir þá.

Vantrú svarar fyrir sig

Hugsað í öldum

Ögmundur Jónasson hvetur landa sína til að hugsa um framtíðina, ekki bara nánustu framtíð, heldur langt fram í aldir. Hann vill koma í veg fyrir að útlendingar nái eignarhaldi á auðlindum landsins um alla eilífð,  en telur of seint að banna þeim að fjárfesta í atvinnulífinu. -

Þetta er fremur holur málflutningur hjá Ögmundi. Hann veit betur en er að reyna að gera sér sem mestan pólitískan mat úr vinsælli ákvörðun sinni um að hafna hinum kínverska Huang um að kaupa Grímsstaði.

Ögmundur veit að með því að gera einkaaðilum mögulegt að eignast auðlindir Íslands, eins og gert hefur verið með fisk, raforku, vatn og jarðvarma, er ekki hægt að koma í veg fyrir að útlendingar séu þar á meðal.

Það sem vakir fyrir erlendum fjárfestum, sem sækast eftir að eignast íslenskar auðlindir, er að græða á þeim. Þeim er nokk sama hvernig eignarhaldið er skráð, svo fremi sem arðurinn lendi í þeirra vasa.

Eina leiðin til að halda í eignaréttinn er að gera allar auðlindir landsins að þjóðareign og banna alla erlenda fjárfestingu í landinu. Og til þess að það verði mögulegt þarf að segja upp talvert af milliríkjasamningum og breyta lögum landsins á víðtækan hátt.

Erlendir fjárfestar hafa þegar komið ár sinni vel fyrir borð á Íslandi og sjúga til sín fé almennings í gegnum fjarfestingasjóði og banka sem Íslendingar reka fyrir þá. -

Til þess að sú framtíðarsýn sem Ögmundur er að boða verði að veruleika þarf að vinda ofan af tímanum um það bil eina öld aftur á bak.

Hurð skall nærri hælum