Prestar og Poltergeist

Margir trúa því augljóslega að prestar hafi yfirnáttúrulega krafta. Þessir kraftar, trúir fólk, gera presta sérstaklega hæfa til að fást við allskonar yfirnáttúrulega og óútskýranlega "óværu". Prestar geta oft með blessunarorðum einum saman fengið drauga og púka til að vera til friðs, trúir fólk.

Orð presta eru svo miklu máttugri en t.d. ráðherra. Eitt sinn blessaði ráðherra Ísland, en það dugði ekkert. Það kom kreppa og allir höfðu það skítt.

Stundum eru prestar kallaðir til, til að reka á brott  illa anda sem hafa tekið sér bólfestu í hýbýlum fólks. Líklega eru þetta bara draugar sem eins og allir vita eru jarðbundnar sálir sem eru að kalla á hjálp vegna þess að þær finna ekki leiðina að ljósinu. Þetta er allt skýrt afar vel í mynd sem heitir Poltergeist og allir prestar hafa séð. 

Þá yfirnáttúrulegu krafta sem prestar búa yfir, fá þeir þegar þeir vígjast til prests. Með vígslunni fá þeir bæði umboð og krafta frá Guði til að berjast við og útrýma öllu slæmu hvort sem það er af þessum eða öðrum heimi. og venjulegt fólk ræður ekkert við að útskýra, hvað þá að fást við sjálft.

Maður þarf sko að vera sterkur til að ráða við draug. Grettir Ásmundason var reyndar svo sterkur að hann réði við drauginn Glám. En Grettir var líka sterkastur allra. 

 Og þegar að svona "óværa" sem rekin er með blessunarorðum úr hýbýlum manna, tekur sér sér bólfestu í líkömum  fólks, reynir fyrst alvarlega á umboð presta. Þegar fólk er andsetið verða prestar virkilega að beita ofurkröftum sínum af öllu afli til að reka illu andana út.  - Kristur fór reyndar létt með þetta á sínum tíma og skipaði svona illum öndum sem voru ungum manni til ama, að taka sér bólfestu í svínum sem auðvitað ærði þau svo að þau hlupu fyrir björg. -

Í dag er líka leitað til sálfræðinga og geðlækna þegar svona "óværur" leita á sálir fólks. En þeir hafa ekkert umboð frá Guði eins og prestar og gengur því yfirleitt illa að fást við vandmálin. Oft enda svoleiðis meðferðir með miklum lyfjatökum og jafnvel innlagningu á geðdeildir.

Þá er nú betra að nokkur svín verði brjáluð. 

Óttaslegnir íbúar leita blessunar

Þar sem mömmur fá að borða

Það er oft gert grín af því þessa dagana þegar stjórnmálamenn segjast vilja standa vörð um heimilin og velferðarkerfi þjóðarinnar. Sérstaklega hljóma slíkar yfirlýsingar klisjulegar í eyrum hinna atvinnulausu og þeirra sem misstu eignir sínar ofaní lánakörfur bankanna. -

Þess vegna er gott að vera minntur af og til, hvernig líf okkar væri án þess sem unnist hefur í velferðar- mennta og samfélagsmálum í landinu og hvað það er sem við viljum standa vörð um í okkar menningu.

Ísland hefur til margra ára haft lægstu tíðni ungbarnadauða i heiminum og það er einmitt mennta og heilbrigðiskerfinu að þakka, segjum við.

En það sem skekkir samanburð í þessum efnum, við þjóðir hinum megin á skallanum, er að hér á landi þykir það sjálfsagt að bæði móðir og barn skorti aldrei grundvallar lífsforsendur eins og næringu.  Við tilheyrum sem sagt þeim löndum þar sem mömmur fá að borða.

Það er skelfilegt að hugsa að við búum en í heimi þar sem í löndum sem neðst koma á besta mömmulands-listanum,  búa mæður og hvítvoðungar við varanlegt hungur og næringarskort sem dregur þau til dauða frekar en nokkuð annað.

Eða eins og segir í þessari ágætu grein hér að neðan;

"Vannæring er undirliggjandi orsök að minnsta kosti fimmtungs dauðsfalla mæðra og þriðjungs barna í heiminum. Meira en 171 milljón barna þjáist af falinni vannæringu sem hefur varanleg áhrif á líkamlegan og andlegan þroska þeirra og gerir þeim ókleift að ná þeim árangri sem þau gætu annars.“

Gott að vera móðir á Íslandi

Feitar konur eru svo.......

Kynjamisrétti tekur á sig margar myndir. Ef taka á mark á feministum í nýrri ályktun þess ágæta félagsskapar, er langt í land að kynjajafnrétti ríki í landinu. Og líkalega er það rétt sem þessi könnun sýnir að feitar konur verða meira fyrir barðinu á misrétti á atvinnumarkaðinum, á meðan feitir karlar gera það bara gott. Og trúlega eru það einmitt feitu karlarnir sem standa fyrir þessu, eða hvað?

Að þetta sé satt um ástandið í landi þar sem í stefnir að konur verði í öllum æðstu þjóðarembættunum, fyrir utan að vera mjög fyrirferðamiklar í stærstu fyritækjunum, virðist dálítið mótsagnakennt. Forsætisráðherra er auðvita kona, Biskup er kona, Háskólarektor er kona og nú stefnir í að aftur vermi kona forsetastólinn á Bessastöðum. -

Engin þessara kvenna getur talist feit og því spyr maður sig hvort það sé virkilegt að frami þeirra sé virkilega tengdur vaxtarlagi þeirra. - Mundu þær hafa náð þessum árangri ef þær væru feitar?

En hvað er það sem gerir feitar konur svona misheppnaðar í atvinnulífinu? Setja yfirmenn fyrtækja, bæði karlar og konur, vaxtarlag kvenna í samband við einhver óæskuleg persónueinkenni? Eru feitar konur e.t.v. álitnar kærulausari, óáræðanlegri, latari eða ekki eins gáfaðar og grannar konur?

Feitum konum mismunað á vinnumarkaði

Foreldrar sem spilla heilsu barna sinna

Íslendingar hlæja oft að Bandaríkjamönnum fyrir hversu feitir þeir eru og kalla þá hamborgararassa eða einhverjum öðrum uppnefnum. Samt eru Íslendingar að verða meðal feitari þjóða og eru börn okkar þar engin undatekning. Landlæknisembættið segir að fjórðungur barna á tíunda ári séu of þung.

Í nýlegri B.S. lokaritgerð tveggja íþróttafræðinga, Áslaugar Ákadóttur og Steinunnar Þorkelsdóttur, þar sem skoðað var heilsufar 300 níu ára barna í Reykjavík og nágrenni, kom í ljós að 26% níu ára barna eru of þung eða of feit. Í könnun þeirra kemur einnig fram að við 6 ára aldur var hlutfall of þungra og of feitra barna 21%, sem er mjög hátt hlutfall hjá svona ungum börnum.

Ljóst er af þessum staðreyndum að ofþyngd og offita meðal barna og unglinga á Íslandi eykst með hverju ári og er orðið alvarlegt heilbrigðisvandamál. Þessi börn eru oft mjög illa á sig komin og eiga í miklum vandræðum bæði líkamlega og ekki minnst félagslega. Mikilvægt er að gripa til fyrirbyggjandi aðgerða á komandi árum einkum þegar haft er í huga að stór hluti barna, sem eiga í vandamálum sem tengjast offitu, eiga einnig í sömu vandamálum þegar þau verða fullorðin og erlendar rannsóknir sýna að 50-60% feitra barna eru einnig of feit sem fullorðnir einstaklingar.

Spurningin er að sjálfsögðu hvort barnaverndaryfirvöld eigi að grípa í taumana þar sem offituvandi barna verður foreldrum ofviða.

Og einnig hvort ekki eigi að vera viðurlög í lögum við því þegar foreldrar spilla heilsu barna sinna á þennan hátt.

8 ára og 90 kíló

10 ára móðir

10 ára stúlka frá borginni Buebla í Mexíkó hefur eignaðist barn eftir 31 vikna meðgöngu.

Ljóst var að lífi litlu stúlkunnar var ógnað og því var drengbarnið tekið með keisaraskurði á kvennasjúkrahúsi í Buebla, tæpa 100 km. frá Mexíkóborg,

þar hefur stúlkan verið undir eftirliti frá því 20. október. -

Ófullburða barnið er í gjörgæslu eftir að hafa fengið snert af lungnabólgu en læknar segja að móðurinn hafi það á brjósti og það sé við góða heilsu að öðru leiti.

Yfirvöld rannsaka nú hvort stúlkunni hafi verið nauðgað en lög í Mexíkó banna fóstureyðingar nema hægt sé að sanna að þungunin sé af völdum nauðgunar.

Löglegur aldur til samræðis í Mexíkó er 12 ár en stúlkur sem fá fóstureyðingu standa andspænis sektum eða fangelsisdómi sannist ekki að um nauðgun hafi verið að ræða.

Hvað varðar barnungar mæður í Mexíkó er þetta ekki fyrsta tilfellið. Í ágúst mánuði 2010 eignaðist 11 ára stúlka sem aðeins er þekkt undir nafninu Amelía, barn sem kom undir þegar hún var aðeins 10 ára. Henni hafði verið nauðgað.

Sjá frétt hér

Soðið og steikt kynlíf

Í eina tíð þótti það mikill leyndardómur, aðeins finnanlegur í gömlum og oftast forboðnum skræðum, hvaða eðalfæða og sjaldgæf efni, höfðu þá náttúru að geta bætt og kætt kynlíf fólks. Nú á tímum eru þær fáar vörutegundirnar sem ekki eru sagðar koma þar við sögu.

Á snöggri gandreið um netið getur þú fundið næringarfræðinga, kynfræðinga og auðvitað matvælafræðinga sem mæla með fjölda tegunda af matvöru sem eiga að örva og bæta kynlífið og flestar eru líklega til í eldhússkápnum þínum.  Hér er sýnishorn;

Lakkrís, hvítlaukur, tómatar (soðnir) , ostrur, Chili pipar, bananar, gulrætur, rækja, súkkulaði, engifer, ólífur, tómatar, epli, aspas, ostar, mjólk, rjómaís, hnetur (ristaðar), hvalkjöt, snákakjöt, avakadó, bláber, jarðarber, poppkorn og söl.

E.t.v. er auðveldara að telja upp þær tegundir fæðu sem vitað er að virka ekki við fyrrnefnda iðju.

 

Þetta eru matvælin sem bæta kynlífið

Stór brjóst og karlmenn

Því er stundum haldið fram að ef karlmenn væru ekki svona miklir aðdáendur stórra brjósta, mundu kvenmönnum ekki vera svona umhugsað um stærð þeirra. - Og oft er hóflitlum fjölmiðlum kennt um að örva, viðhalda og jafnvel móta unga karlhuga á þá leið að þeir álíti stór brjóst það áhugaverðasta sem konur hafa upp á að bjóða. En er það staðreyndin að stærð kvenbrjósta sé í raun ráðið af karlmönnum?

Áhugi mannkynsins á brjóstum og stærð þeirra er ekki nýr af nálinni. Brjóst hafa sem frjósemistákn verið fyrirferðamikil í listasögu heimsins, en listin eins og kunnugt er, endurspeglar gjarnan hvernig við höfum hugsað um hlutina á hverjum tíma og listamennirnir eru oftast karlmenn.

Hinar 35.000 ára gömlu "Venusar" smástyttur frá Þýskalandi eru með alla líkamshluta afar ýkta, ekki hvað síst brjóstin sem eiginlega minna á konu sem þjáist af brjósta Hypertrophy. -  Allt frá hinum bústnu frjósemisgyðjum og fjölbrjósta Indlands meyjum til myndskreyttra barma afrískra hjarðkvenna og mjallhvítra Evu og Maríubrjósta á málverkum miðaldameistaranna í Evrópu, er þessi mikli áhugi og sterka aðdáun karla á þessum kvenlíffærum augljós.

En það sem einnig kemur í ljós við slíka söguskoðun er að karlar hafa ekki ætíð haft sömu hugmyndir um æskilega stærð og lögun konubrjósta. Ef hægt er að tala um sögulega meðalstærð í þessum efnum, væri það trúlega 34B.

Allt frá árinu 1996 hafa t.d. brjóst kvenna verið að stækka og mest selda stærðin í USA og UK um þessar mundir er 36C.  

Allar líkur er á að kvenbrjóst eigi eftir að stækka enn frekar því bandarískir karlmenn sem eins og allir vita eru hallir undir stóra hluti, segjast helst vilja konur með brjóstastærð 36D. Sama er að segja um breska karlmenn.

Konur virðast sem sagt almennt ansi samvinnuþýðar og skilningsríkar við karla sína hvað þetta varðar. Eða býr eitthvað meira undir?

Brjóstin hafa oft verið notuð í listinni til að tákna yfirráð, ríkidæmi, fegurð og völd, eða það sem margir þrá og eiga erfitt með að standast. Og kannski er það einmitt þetta sem konan er að árétta með "undirlátsemi" sinni við duttlunga karlmannsins.

Stækkar brjóstin um heila skálastærð á mánuði

Sjónhverfingameistarinn

Guðrún Ebba er ekki að segja satt um að hún hafi verið gróflega misnotuð af föður sínum Ólafi Skúlasyni biskup, segja  móðir hennar og systkini. - Guðrún Ebba hefur  ekki fram að þessu sótt neinn stuðning til fjölskyldu sinnar og reyndar sagt sig ekki tilheyra henni lengur. Þarna kemur ástæðan. Fjölskyldan trúir henni ekki ekki frekar en kirkjunnar þjónar trúðu í raun þeim ávirðingum sem komu fram á hendur Ólafi áður en Guðrún Ebba leysti frá skjóðunni. -

Fjölskylda Guðrúnar álítur að "duldar minningar" hennar séu brenglaðar og ekki sannleikanum samkvæmar. Hún vill láta rannsaka Guðrúnu og minningar hennar faglega. Það þýðir að hún vill að Guðrún Ebba leiti sér aðstoðar geðlækna og eða sálfræðinga. 

Þessi skjaldborg sem slegin er um Ólaf biskup er óskiljanleg. Það er eins og margt af hans samferðafólki sé í stöðugri afneitun á hvað hann gerði og hvað hann var. - ´Mikill sjónhverfingameistari hefur Ólafur annars verið. Honum tókst það sem fáum hefur tekist, að plata allt fólkið alltaf.

Segja lýsingar rangar

Í anda Mengele

Tilraunir Greg Homers hafa gert draum hins Jósefs Mengele að veruleika. Homer getur breytt augnalit þínum í bláan fyrir tæpar fimm þúsund dollara. 

Mengele sem kallaður var engils dauðans, og ekki að ósekju. Hann stundaði skelfilegar "rannsóknir" á föngum nasista í útrýmingarbúðum þeirra.

Brún, dökk, gul og græn augu voru að hans áliti fæðingargallar. 

Hann hikaði ekki við að dæla litarefnum í augu mennskra tilraunadýra sinna til að reyna að gera þau  bláeygð, þ.e. eins og allir sannir aríar áttu að vera. Einmitt þær tilraunir hafa oft verið teknar sem dæmi um fáráneika og fánýti "rannsókna" hans.

Það er vitað hvað Mengele gekk til með sínum rannsóknum. Þær voru sjúkleg útfærsla á hugmyndum Hitlers um hinn fullkomna kynstofn sem mundu verða herrar Þriðja ríkisins, 1000 ára ríkisins sem teygja mundi sig um heiminn allan.  

Það er eins og fyrrum skemmtibransa lögfræðingurinn Greg Homer hafi tekið upp þráðinn þar sem Mengele skildi við hann og fullkomnað aðferðina við að breyta litum augna. - En Hvað vakir fyrir Homer? -

Jú heimurinn er víst orðin svo hégómlegur og Mengeliskur að blá augu eru talin miklu fegurri en önnur.  Mikill eftirspurn er til staðar, sérstaklega hjá fólki í skemmtibransanum,  sem vill breyta augnalitnum um leið og nefið er minkað, varirnar gerðar þykkari og andlitshúðin strekkt? 

Breytir brúnum augum í blá

Besta áfallahjálpin

Íslendingar  eru góðir með sig eins og vant er. Allt komið á rétta leið, bara nokkur andleg vandamál sem þarf að afgreiða þegar tími vinnst til. Helsta vandamál Íslands er ekki atvinnuleysi eða fátækt í kjölfar hrunsins, heldur svartsýni og pólitískt raus. Sem sagt 75% sálrænir kvillar. Fólk er svartsýnt af því að það er blankt og blankt af því að það er svartsýnt.

Steingrímur hefur nokkuð til síns máls. Hann er eflaust að tala um reiðina sem bullar undir yfirborðinu vegna þess að þjóðinni finnst hún vera með allt niðrum sig og réttilega það ekki vera sér að kenna. Reiðin heldur áfram að grassera, þrátt fyrir að efnahagurinn sé smá saman að rétta úr kútnum, því fólk hefur á tilfinningunni að ekkert hafi breyst. Þeir sem ollu tjóninu þurfa ekki að gjalda fyrir það og halda óáreittir áfram sínu lúxus lífi eins og ekkert hafi í skorist.  -  Það mundi vera mikil áfallahjálp í því ef þjóðin sæi eitthvað gerast í þeim málum.

Steingrímur J. minnist líka á pólitíkina. Hún er vissulega vandamál og helsta aflið sem sundrar þjóðinni. - Hvað hana varðar er Steingrímur sjálfur, miklu frekar hluti af vandanum heldur en lausninni. - Alþingi er skrípaleikur og alþingismenn trúðar.

Megin meðalið við því átti að vera ný stjórnarskrá. Það mál er að  smá saman verið að kæfa inn á alþingi af alþingismönnum. - Samt heldur þjóðin áfram tryggð við flokkana og þingmenn þeirra. Ef það er ekki sálrænt vandmál, þá veit ég ekki hvað. Besta áfallahjálpin varðandi pólitíkina væri að leggja flokkana niður.

Annars vakti þetta viðtal við Steingrím mesta athygli meðal Breta fyrir þá hugmynd að hægt væri að komast út úr efnahagsörðugleikum með því að handstýra gjaldmiðlinum líkt og Bretar reyna að gera með sitt pund. - Þeim er hulin ráðgáta hvernig Íslendingum tókst það en ekki þeim. - Steingrímur minntist nefnilega ekkert á gjaldeyrishöftin og aðrar hömlur sem Bretar mundu aldrei geta komist upp með. - En Íslendingar eru jú svo klárir.

Vandi Íslands sálfræðilegur