Lýst eftir barnaníðingi

Á unglingsárum mínum (1966-1969)  í Keflavík var ég mikið í félagi við ákveðinn hóp skólabræðra minna sem gerði lítið annað utan skólatímans en að slæpast um og hanga á sjoppum. Við vorum allir byrjaðir að fikta við reykingar og að drekka áfengi. Á þessum tíma komst ég í kynni við náunga sem kallaði sig Blacký. Hann var íslenskur eftir því sem ég best veit, þrátt fyrir að nafnið. 

Blacký þessi var maður á miðjum aldri sem gerði sér dælt við okkur drengina sem vorum þá á þrettánda og fjórtánda ári. Hann var ósínkur á sígarettur og fór oft í ríkið fyrir okkur strákana til að kaupa brennivín ef hann var látinn hafa peninga.

Blacký sem var drykkjumaður hélt sig oft í námunda við eða inn í sjoppu á Hafnargötunni og þá var kölluð "Dorró" eða Þórðarsjoppa. Þar var oft þröng á þingi því fjöldi unglinga hékk í þar á kvöldin, einkum í hinu svo kallað biðskýli.

Blacký vann á verkstæði við sandblástur og þangað stefndi hann oft drengjunum til að ná í áfengið sem hann hafði keypt fyrir þá.

Í staðinn fyrir greiðann (áfengiskaupin) misnotaði Blacký marga þeirra kynferðislega og fékk þá til að taka þátt í afar ósiðlegum kynferðislegum athöfnum með sér.

Auðvitað flokkast þetta framferði Blackýs undir argasta barnaníð.

Samt steinþögðu allir yfir þessu þ.e. ekki var minnst á þetta  fyrir utan hópinn og ég minnist þess ekki að þetta framferði Blackýs hafi nokkru sinni komist í hámæli í Keflavík.

En hvers vegna er ég að rifja upp þessa löngu liðnu atburði.

Fyrir það fyrsta hefur það lengi plagað mig, eftir að ég kom til vits og ára,  að svona nokkuð skuli hafa viðgengist fyrir svo til opnum tjöldum í heimabæ mínum og án þess, að því er virðist, að nokkur fengi við því gert. Blacký er þarna í minningunni eins og dimmur og ókennilegur skuggi sem nauðsynlega þarf að fá á sig raunverulegri mynd.

Í öðru lagi vegna þess að ég er að skrá niður minningar mínar m.a. frá þessum tíma í Keflavík og ég hef ekki hugmynd um hvað þessi maður raunverulega hét, hvaðan hann kom, hvað varð um hann og hvort hann er lífs eða liðinn.

Ef einhver veit frekari einhver deili á honum væru þær upplýsingar vel þegnar.

Athugasemdir

[bugur (IP-tala skráð) 18.9.2009 kl. 01:43]

Þú gerir þér vonandi grein fyrir því Svanur, að þetta er ekkert ættfræðigrúsk hjá þér.

Af augljósum ástæðum ertu að bera þungar sakir á þennan Blakkí.

[Margrét St Hafsteinsdóttir, 18.9.2009 kl. 02:36]

Það er hryllilegt frá því að segja að það er ekki svo langt síðan að það mátti ekki tala um svona hluti. 

Mér finnst bara gott hjá þér að tala um þetta.  Gangi þér vel í leitinni.

[Gunnhildur Ólafsdóttir, 18.9.2009 kl. 02:52]

Hrikalegar minningar! Vonandi finnuru einhver svör.

[brahim, 18.9.2009 kl. 04:39]

Ég geri ráð fyrir eftir skrifum þínum að dæma að þú hafir lent í þessu.

Þetta situr alla ævi á sálinni hjá manni, svo ég skil þig vel. Gangi þér sem best í leit að sálarfrið.

[Svanur Gísli Þorkelsson, 18.9.2009 kl. 11:18]

Sæll bugur. Ég geri mér grein fyrir því.

Margrét. Einmitt það sem mér finnst líka. Í þessa daga skorti alla uppfræðslu.

Gunnhildur, Það hafa nokkrir sent mér email og ég er þeim afar þakklátur, en það er eins og hið rétta nafn þessa manns leiki ekki á lausu.

brahim: Þú kemur inn á mál sem ég veit að er staðreynd. Það er bara svo erfitt að dæma um það sjálfur. Þetta hefur ekki verið angra mig þannig fyrr en núna á "gamalsaldri" og þá í tengslum við samanburð á hvernig viðmót fólks er í dag gagnvart svona málum og hvernig það var þegar ég var að alast upp. Það er himinn og haf þarna á milli.

[Rut Sumarliðadóttir, 18.9.2009 kl. 11:31]

Man vel eftir Blacky. Og líka sögusögnum um að eitthvað gruggugt væri í gangi í tengslum við þennan mann. Veit um drengi sem var nauðgað á þessum tíma, veit hins vegar ekki hvort það var hann en ansi margir drengi á okkar reki hafa átt við ýmis vandamál að glíma. Viss um að þú þekkir einhver dæmi.

Held ég hafi aldrei vitað hvað hann hét , hann var alltaf Blacky, væntanlega vegnaþess að hann var svona dökkur yfirlitum. Veit engin frekari deili á honum. 

[Alma Jenny Guðmundsdóttir, 18.9.2009 kl. 13:02]

Góð umræða !  Er næstum viss um að svipaðir atburðir gerðust í fleiri samfélögum - þar sem þetta varð eins og einhver blóðskömm - þ.e. allir vissu en enginn sagði neitt eða gerði.

[Svanur Gísli Þorkelsson, 18.9.2009 kl. 18:06]

Takk fyrri þetta Rut. Miðað við þann fjölda emaila sem ég hef fengið, hefur þessi maður fengið að vera óáreittur ansi lengi og fórnalömb hans skipta tugum.

Alma; Það er auðvitað alveg ljóst að fólk þegir yfir svona löguðu af því því finnst minnkun að því að hafa lent í því. -

[Bjarni (IP-tala skráð) 18.9.2009 kl. 23:26]

Kannast við Blacky nokkurn, hvort það er sami maðurinn veit ég ekki. Þegar ég var í sumarvinnu með skóla (í rvík) þá var á sama stað að vinna maður sem kallaður var með þessu nafni. Frétti svo að hann hefði verið vanaður fyrir löngu síðan vegna kynferðismála.

Rakst svo á sama gaur á Benidorm að mig minnir '91 eða '92, vorum í sömu blokk/íbúðarhóteli. Á brottfaradegi fannst hann látinn í íbúð sinni, hafði tekið lífið sitt með því að skrúfa frá gasinu og leggjast við eldavélina. Við heimkomu beið hans dómur fyrir að hafa tekið aftur upp fyrri iðju áratugum síðar skildist mér síðar.

[eyjaskeggi (IP-tala skráð) 19.9.2009 kl. 06:35]

Ég vann líka með honum en heyrði svo seinna um hans fortíð, held að þetta hafi frekar verið nær ´96 sem hann tók líf sitt. Hann sagði mér einhverntíman að móðir sín hefði ekkert hugsað um sig þegar hann var lítill, hún var víst eitthvað upptekin við að skemmta sér og hann hjá ömmu sinni eða einhverstaðar. Svo vildi hann víst sjálfur  láta vana sig, held að það hafi verið  25 árum fyrr. Hvort að hann gerði ekkert af sér í millitíðinni fyrr en þetta mál kom upp, sem hann var kærður fyrir veit ég ekki. Hversu algengt er að kynferðisbrotamenn vilji láta vana sig, eða taki líf sitt ? Ég sé ekki fyrir mér þessa menn, sem að eru þekktir fyrir svona sjúka hegðun láta það hvarla að sér, allavega ekki af þeim viðtölum við þá sem hafa verið birt.

[Svanur Gísli Þorkelsson, 19.9.2009 kl. 13:52]

Ég þakka Bjarna og eyjaskeggja fyrir þessar upplýsingar sem passa alveg við þær sem mér hafa borist en ekki birst hér.

[Sigurður Þór Guðjónsson, 19.9.2009 kl. 13:55]

Það var líka maður í Reykjavík sem lagði fyrir sig einkakennslu. Hann misnotaði táningsdrengi, stundum þá sem hann kenndi. Hálfur bærinn vissi það og hver maðurinn var. Megas segir frá þessum manni snilldarlega í ævisögu sinni. Ég gæti nefnt nafn hans og hvar hann átti síðast heima en sleppi því.

[Heiða B. Heiðars, 19.9.2009 kl. 14:12]

Ég man vel eftir Blacky en vissi ekki um þessa hlið á honum. Síðast þegar ég sá Blacky þá var hann helblár í framan og froðufellandi.

Mamma hans Bauja (þú manst örugglega eftir honum líka) bað mig og Gunnhildi (systir Bauja...hvar ætli hún sé niðurkomin?) að labba um hverfið og athuga hvort við finndum hann.

Ég fann Bauja á auðu lóðinni á milli stóru blokkarinnar og blokkanna sem tilheyra Sólvallagötu. Þar sat hann klofvega ofan á Blacky og með lúkurnar um hálsinn á honum. Man ekki eftir því að hafa orðið eitthvað smeyk...bað bara Bauja um að hætta...en ég gleymi samt aldrei blámanum og froðunni.

Ég hef líklega verið ca 10 ára.

Daginn eftir va

[Heiða B. Heiðars, 19.9.2009 kl. 14:25]

Æi...þetta "Daginn eftir va..." átti ekkert að koma :) Var að byrja á sögu sem ég ákvað að segja ekki :)