2009 - Ár grímunnar

Það eru horfur á því að ár grímunnar sé að renna upp á Íslandi. Auðvitað hafa grímur verið brúkaðar á landinu fyrr. En núna eru það ekki bara læknar sem bera grímur þegar þeir framkvæma aðgerðir,  heldur nýtur gríman mikilla vinsælda meðal mótmælenda sem mótmæla með aðgerðum.  Svo hefur líka komið í ljós að miklu fleiri nota grímur á landinu en virtist vera. Sumum grímum er nefnilega ætlað að líta út eins og raunverulegt andlit.

Grímur hafa verið með mannkyninu frá alda öðli og notaðar í margvíslegum tilgangi. Þær eru jafnframt af misjafnri stærð og gerð. Stundum eru grímur gerðar svo stórar að þær hylja allan líkamana eins og tíðkast meðal frumbyggja Ástralíu og stundum svo smáar að þær passa bara á fingurgómana eins og fingurgrímur Inúíta í Kanada og á Grænlandi sem þeir brúka þegar þeir segja hver öðrum sögur.  

Almennt eru grímur notaðar til verndar, til að leynast, til sýningar eða skemmtunar.

Grímurnar á Íslandi eru einnig fjölbreyttar út af fyrir sig. Þær vinsælustu um þessar mundir eru í formi felufélaga sem stofnuð voru af bröskurum til að koma undan fé sem þeir svindluðu út úr saklausum almenningi víða um heiminn. Íslenska þjóðin keppist nú við að greiða þessar skuldir fyrir þá.

Þá eru einnig andlitsgrímur í formi klúta, líkt og bófarnir í gömlu cowboy-hasarmyndunum notuðu til að engin þekkti þá, að verða vinsælli og vinsælli.  Auðvitað þekktu allir krakkarnir í bíóinu bófana, en samt  virtust þeir alltaf ná  að plata lögguna.

Ekki nema von að  klútaklæddu mótmælendurnir haldi að þeir geri það sama þegar þeir mæta á vettvang til mótmæla.

 Klútunum ásamt lambhúshettunum er Þegar best lætur ætlað að uppfulla öll almenn notagildi grímunnar, vera til verndar, til að leynast, til sýningar og til skemmtunar.

Þá eru líka hinar svokölluðu pólitísku grímur afar vinsælar. Þær eru aðallega gerðar úr lygum og falsi. Fólk í pólitík heldur nefnilega að það sé afar sniðugt að gefa eitthvað í skyn með orðum en gera svo allt annað, reyna að blekkja andstæðingana og hnekkja þannig á þeim. Meðal pólitíkusa er nánast engin grímulaus. Pólitíkin er nefnilega lauslátasta tíkin í bænum og hún ríður aldrei við einteyming.

Athugasemdir

[Sigrún Jónsdóttir, 9.1.2009 kl. 02:21]

Frábær pistill hjá þér Svanur minn...eins og venjulega

[DoctorE (IP-tala skráð) 9.1.2009 kl. 09:35]

Blogggrímur eru mjög mikilvægar fyrir frelsið... þess vegna bannar mbl slíkt :)
http://doctore.blog.is/blog/doctore/entry/766117/

[Magnús Sigurðsson, 9.1.2009 kl. 09:48]

Þeir eru margir sem þurfa að taka niður grímuna, en myndum við þekkja þá grímulausa?

[Rut Sumarliðadóttir, 9.1.2009 kl. 11:38]

Já, þær eru margar grímurnar. Jafnaðargríma felur argasta íhald, íhaldið felur örgustu kommatitti með rússneskar kosningar við tilmælum formanna.

 Fékk annars gott komment frá Gulla bloggvini mínum, má til að stela því: "Stöndum saman, þið borgið, við eyðum". Það heitir á stjórnmálísku (gríman) að við íslendingar höfum séð það svart áður og tökum á málunum af dugnaði og elju eins og okkur er einum lagið.

[Svanur Gísli Þorkelsson, 9.1.2009 kl. 15:03]

Ég veit ekki hvort ég legg að jöfnu dulnefni á rithöfundum og bloggurum og þær grímur sem gagngert eru ætlaðar til að villa fólki sýn og blekkja. Skilaboð þín DoctorE hafa verið sjálfum sér samkvæm í gegnum tíðina og þeir sem lesa bloggið þitt vita að hverju þeir ganga. Ég, fyrir mína parta, geng alla vega að því sem gefnu að yfirlýstur tilgangur Þinn með blogginu þínu sé nokkuð tær endurspeglun af persónuleika þínum og lífsviðhorfum. Eða til að skýrskota til athugasemdar Magnúsar, mundi eflaust kveða við sama tón hjá þér "grímu" lausum.

Þakka annars vinkonum mínum Sigrúnu og Rut athugasemdirnar.

[Þorvaldur Guðmundsson, 9.1.2009 kl. 15:29]

Ekki má gleyma ofurhetjum eins og Batman,Spiterman og fl. Og svo venjulegu hetjurnar eins og Zorro og Lone Ranger. En þessir nútíma grímumenn eru engar hetjur þeir eru alveg á hinum endanum og kallast heiglar. Spurning hvort þeir ættu ekki bara að láta taka af sér hausanna ef þeir vilja ekki þekkjast ég get ekki séð að þeir séu neitt að nota þá hvort eð er.