Refskák Gordons Brown við Íslendinga

Því miður eru Íslendingar ekki klókari í refskákinni sem gjarnan er nefnd pólitík en þetta. Nánast allt sem Íslendingar gerðu og sögðu í tengslum við bankahrunið var og er notað gegn þeim.

Davíð hræddi Darling með ummælum sínum um að Íslendingar ættu ekki að borga. Brown og Darling skelltu landinu umsvifalaust á hryðjuverkalistann og frystu alla fjármuni landsins í Bretlandi. - Brown gat ekki fengið betri afsökun til að snúa málum sér í hag .

Til að tryggja sína pólitísku hagsmuni heima fyrir, borgaði Brown almenningi út það sem þeir höfðu lagt inn í Icesave og rukkaði svo Ísland um aurinn. Þá sögðust Geir og hans stjórn mundu borga.

 Brown lýsti því yfir í breska þinginu að Icesave málið væri í höfn og því yrði fylgt eftir af AGS sem Íslendingar mundu verða að fá lán hjá til að eiga möguleika á að rétta úr kútnum. Að koma þessu í kring kostaði eitt símtal frá Darling sem vann lengi hjá sjóðnum.

Ítök Browns og Hollendinga í Evrópu er slík að hann gat sett það sem skilyrði fyrir einhverri fyrirgreiðslu að Ísland borgaði refjalaust samkvæmt þeim samningum sem íslensku samningarmennirnir undirrituðu.

Íslenska þingið reyndi að malda í móinn og tefja tímann. Þingmenn léku sér í flokkspólitíska sandkassanum og settu svo í samningin skilyrði sem þeir vissu að mundu tefja enn fyrir og koma ríkisstjórninni sem var að reyna að slökkva eldana afar illa.

Þau trikk gengu eftir og nú er málið komið í strand. Ísland fær enga fyrirgreiðslu og framtíðin er mjög óviss. Verði niðurstaðan sú að Icesave samningarnir verða ekki samþykktir munu Bretar breyta sér af fullri hörku í málinu. Staða og yfirlýsingar Gordons Brown bjóða ekki upp á annað. - Miðað við það sem þá er framundan er má segja að áhrif kreppunnar á Íslandi hafi verið smá verkur. Framundan er sársauki.

Þakkaði Brown fyrir að bjarga Icesave

Athugasemdir

[Jón Steinar Ragnarsson, 29.9.2009 kl. 17:43]

Það sem sannfærir bresku þjóðina um að IceSave krafan sé rétt er að Brown fékk þakkarbréf frá breskri húsmóður.

What can I say...?

[Sif Jónsdóttir (IP-tala skráð) 29.9.2009 kl. 17:59]

Það er best að hætta að sleikja þá upp og greiða ekki. Það verður verra ef við ætlum að reyna að greiða skuldina á 5,5% vöxtum sem tikka í framtíðinni.  

Þá má búast við óðaverðbólgu og áframhaldandi veikingu krónunnar.

[Kolbrún Hilmars, 29.9.2009 kl. 18:14]

Svanur, heldurðu að okkur sé sæmandi að taka mark á þessari framboðsræðu Mr Brown?

Ræðan var flutt á ársþingi breska verkamannaflokksins þar sem bæði hann og flokkurinn eiga undir högg að sækja í kosningabaráttu. Innihaldið var svona dæmigerð sjálfshóls- og loforðarulla pólitíkuss og þótt maðurinn segist hafa tekið íslenkan almúga í nefið þá eru það nú engin tíðindi í því nýlenduríki.

Fyrir mína parta tel ég að mesti sársaukinn verði hans.

[Svanur Gísli Þorkelsson, 29.9.2009 kl. 18:21]

Sif: Ef við greiðum ekki "skuldina" stöðvast atvinnulífið á Íslandi smátt og smátt og verður komið í þrot eftir 12 mánuði. Ef við fáum enga fyrirgreiðslu erlendis skiptir verðbólgan ekki lengur máli, og ekki heldur veiking krónunnar. Ísland verður lokað hagkerfi. -

Jón Steinar; Brown vill að Bretar treysti sér til að takast á við kreppuna og telur fram allt sem hann heldur að hjálpi sér við það.

[Svanur Gísli Þorkelsson, 29.9.2009 kl. 18:26]

Kolbrún: Sjónvarp og blöð í dag og næstu daga verða upptekin af þessu þingi. Brown er analæseraður á alla lund og vel fylgst með hverju orði sem af vörum hans fellur. Hann lætur ekki hanka sig á því að gefa stjórnarandstöðunni færi á að benda á mikið ósamræmi milli þess sem hann segir og þess sem hann gerir. Ísland og vandræðin í kringum Icesave gætu orðið fyrir hann svona lítið Flaklandsstríð ef málin fara í hart. -

[Gísli Foster Hjartarson, 29.9.2009 kl. 18:37]

Já Svanur stundum eiga menn bara að þegja en það hefur ekki tíðkast hjá okkar mögnuðu þjóð sem veit allt og getur allt, betur en aðrir - en svoleiðis framkoma kostar alla eitthvað á endanum sama hverjir eiga hlut að máli.

- Pólitíkin og fjármálasnillingarnir íslensku gleymdu heiðarleikanum og skynseminni heima og því fór sem fór - og nú skal öllu klínt á sauðsvartan almúgann - því miður

[Kolbrún Hilmars, 29.9.2009 kl. 18:37]

Takk Svanur. En svona fyrir forvitnina, halda hinir bresku flokkarnir ekki flokksþing líka fyrir kosningarnar? Það væri ekki verra að komast í lesfæri við ræður hinna líka í bresku blöðunum. Værirðu til í að benda á þær á blogginu þínu?

[Jón Steinar Ragnarsson, 29.9.2009 kl. 21:44]

Mér finnst þetta nú einna merkilegast í ræðu hans:

" ...breskur almenningur á ekki að borga fyrir bankana. Nei, bankarnir eiga að borga breskum almenningi til baka,"

Skyldu þetta vera skilaboð til okkar að standa á því sama, eða telur hann að það gildi önnur lögmál um breskan almenning en Íslenskan?

Var hann kannski að tala af sér? Inniskórnir hans Freud, þarna á sveimi?

[Svanur Gísli Þorkelsson, 29.9.2009 kl. 22:10]

Sammála þér Gísli Foster

Kolbrún; Allir flokkar eru með einhverskonar þing en mest ber á þremur, Verkamannaflokknum sem þingar núna, Liberal Demókrötum sem eru búnir að þinga og svo Íhaldsflokkurinn sem á eftir að halda sitt flokksþing.

Jón Steinar; Já ég hjó nú eftir þessu líka, en Gordon var örugglega ekki að meina aðra en Breta. Hann á Evrópumet í að ausa opinberu fé í bankana, og hann hefur alltaf sagt að þetta fé muni koma til baka þegar Bankarnir fara aftur að græða.

[Sævar Helgason, 29.9.2009 kl. 23:23]

Er ekki alveg löngu ljóst að eina úrræði Íslendinga er að greiða þennan ICESAVE reikning eins og hann lá fyrir strax í vor ? 

Þannig hef ég skynjað málið...  Og því fyrr sem við göngum þannig frá málum - því betra fyrir þessa þjóð- þó djöfullegt sé..

[Svanur Gísli Þorkelsson, 30.9.2009 kl. 00:41]

Sævar; Allt sem ég veit um málið bendir til að þú hafir hárrétt fyrir þér.

[Óttar Felix Hauksson, 30.9.2009 kl. 00:49]

Sæll Svanur,

Ræða Godrons Brown er birt í heilu lagi á netinu. Hann segir þar frá konu sem þakkar honum fyrir að bjarga Icesave sem hafði valdið henni svefnleysi. Lesi maður ræðuna áfram rekst maður fjótlega á að Brown kemst að nákvæmlega sömu niðurstöðu og Davíð Oddsson. Almenningur á ekki að borga skuldir bankanna sem hafi haft gömul gildi að engu, teflt á tæpasta vað í óreiðu og óráðssíu. Bankarnir eigi að borga sínar skuldir, ekki venjulegur vinnandi breskur almenningur. Davíð og margir aðrir á Íslandi eru sama sinnis, íslenskur almenningur á ekki að borga skuldir óreiðubankanna. Bankarnir eiga sjálfir að borga. Sé þeim það um megn nær málið ekki lengra, að velta því yfir á venjulegan vinnandi íslenskan almenning samrýmist ekki skoðun þessara heiðursmanna, né heldur skilkningi venjulegs fólks.  En mér virðist þú vera reiðubúinn að koma þessum skuldaklafa á þjóðina í þjónkun þinni við óttaslegin vinstri öflin sem nú sitja að kjötkötlum Alþjóðagjaldeyrissjóðsins á Íslandi, er það svo?

[Svanur Gísli Þorkelsson, 30.9.2009 kl. 01:02]

Sæll Óttar og þakka þér þetta innlegg.

Að almenningur eigi ekki að borga er skrum sem Brown ber fyrir sig í þeirri von að kjósendur trúi því að hann fái milljarðana, sem hann sjálfur jós í breska banka, einhvern tíman aftur.  Hann sagði í Breska þinginu að Íslendingar (honum er alveg sama hvernig við skilgreinum það sem ríkisstjórn eða almenning) ætli að standa á bak við Icesave skuldirnar og af því sjónarmiði hefur hann ekki látið.

Persónulega er mér alveg sama hver er við stjórn á Íslandi. Ég mælti fyrir Þjóðstjórn á sínum tíma, sem auðvitað ekki varð.

Það skiptir ekki máli í mínum hugsa hver er við stjórn á Íslandi, hvað Icesave málið varðar, því var klúðrað á fyrstu dögum hrunsins og hefur ekki komist úr þeim klúður-farvegi síðan sama hverjir að koma.

[Jón Logi (IP-tala skráð) 30.9.2009 kl. 08:48]

Brown segir nú eiginlega að almenningur eigi ekki að líða fyrir afglöp bankanna, en tekur fram að það eigi við um breskan almenning. Þar skilgreinir hann sig í sömu stíu og félagi Napóleon sem sagði að öll dýr væru jöfn, en sum dýr væru jafnari en önnur.

Og þetta ætlar okkar alþingi að gleypa, og ári frá hruninu hefur enn ekki fundist nokkur mótspyrna að viti, ef undan er skilið þetta viðkvæða-kjaftæði.

Vissulega er "eitthvað" í EES regluverkinu sem heimilaði bönkunum að veðsetja fólkið í landinu. Svo best ég veit gildir þetta ekki í ESB, né milli stórra viðskiptablokka, breskir sparifjáreigendur verða t.a.m. að taka sínu tapi hafi þeir átt hjá Bandarískum bönkum.

Svo er EES regluverkið engan veginn æðsta regluverkið á kúlunni. Hefur engum dottið það í hug? Hefur engum dottið það í hug að hugsanlega sé þetta mannréttindamál fyrir íslenska borgara. Við erum í raun dæmd til að vera ábyrgðarmenn á glæpastarfsemi einhverja bankagutta og leyfi ég mér að efast um að það þoli fullkomlega dagsljósið. En þessi vopn gera okkur ekkert að gagni ef þau liggja í slíðrinu og notandinn á bakinu.

Brown má nefnilega eiga það að hann teflir þó skákina. Þarna eru ribbaldar sem ræna kellíngar á Bretlandi, og hann slær sig þá sjálfan til riddara og ræðst til atlögu við.....kellíngar á heimaslóðum þeirra.

[Eyjólfur G Svavarsson, 30.9.2009 kl. 11:48]

Álveg rétt Jón nú er bara að taka vopnin úr slíðrunum, en hvernig ítum við því á stað?

[Jón Logi (IP-tala skráð) 1.10.2009 kl. 10:42]

Við ýtum því af stað með því að hafna því sem Bretar og Hollendingar eru að bera á borð. Furðu einfalt, því eins og þeir vilja hafa það eru nær engar líkur á því að við getum staðið við það. Til hvers að kvitta uppá eitthvað sem er vitað að ekki ræðst við? Jú, það er ein snúsa í því, - það myndi spilla fyrir inngöngu okkar í ESB. Það segja jú ESB menn sjálfir, sbr viðtal við Lilju Mósesdóttur. Gott gott. Þá flakkar sá hausverkur í leiðinni.

Erum við þá ekki lokað land og allt í steik? Tja, sjálfsagt reynir ESB/EES klabbið að einhverju leyti að þvinga okkur til, en verðum við þá eins og Albanía undir Hoxa? Held ekki. Með þessa lágu krónu erum við að flytja út fyrir tvöfalt það sem flutt var inn, og aðal-varan (fiskur) er eitthvað sem ekki er til nóg af á kúlunni, og verður aldrei. Ef ESB reyndi að þvinga okkur þar, væru þeir að setja bremsu á vöru sem þá vantar, með þeim hugsanlegu afleiðingum að við yrðum að leita annað.

Eins er með ferðamennskuna sem er orðin veruleg gjaldeyrislind. Erfitt fyrir ESB að setja fótinn fyrir þar. Og meðan krónugreyið er þar sem hún er, þá blómstar greinin aldrei sem fyrr.

Ég spái reyndar því að með höfnun þá lendi allt í tuði sem varir í mörg ár og það hverfi ef til vill þegar annað og stærra kveður að dyrum. Kannski næst ásættanleg lausn síðar, því ekki fær maður afslátt nema að sýna hörku í prúttinu. Þetta gæti fallið Bretum og Hollendingum í óvil hjá dómsstólum, hver veit, - og óafsakandi að láta ekki reyna á það.