Vor í lofti og Íslendingar á sigurbraut segir Dr. Phil

Vorið er komið og grundirnar gróa, alla vega hér í Bath á Englandi. Síðustu tveir dagar hafa fært mér sanninn heim um að vorið sé komið fyrir alvöru. Það er yfir 18 stiga hiti og rjóma blíða, gróðurinn óðum að taka á sig lit eins og mannlífið.

Kaffihúsin eru búin að setja stóla og borð út á stéttar, dagblöðin liggja hreyfingarlaus á borðunum og smáfuglar tísta í trjánum eins og þeir hafi eitthvað mikilvægt að segja. Ungmennin sitja í hópum á graseyjunum út um alla borg og eldra fólk stansar lengur við til að spjalla á götuhornunum. Þetta er skemmtilegur tími.

Ég er byrjaður að ræða aftur við Dr. Phil um handboltann. Hann er góðkunningi lesenda minna frá því á ólympíuleikunum í fyrrasumar. Hann sagði mér í fyrradag að Íslendingar mundu vinna landa Alexanders mikla.  Það gekk eftir.  Á Laugardaginn ætlar hann að spá fyrir um leikinn við Eistlendinga. Hann var með allt á hreinu í spám sínum um gengi íslenska liðsins á ólympíuleikunum, þannig að ég bind miklar vonir við spádómshæfileika hans.

Athugasemdir

[Lára Hanna Einarsdóttir, 19.3.2009 kl. 14:11]

Yndisleg vorlýsing, takk. Hér í Reykjavík hefur hlýnað verulega undanfarna daga og veður verið þokkalegt en blautt. Líkast til fáum við nú fleiri kuldakafla fyrir vorið.

Getur þessi Dr. Phil bara spáð fyrir um íþróttir? 

[Svanur Gísli Þorkelsson, 19.3.2009 kl. 14:16]

Dr. Phil er glúrinn kall. Hvað viltu fá að vita mín kæra :)

[Sigrún Jónsdóttir, 19.3.2009 kl. 14:38]

Falleg vorkomu lýsing Svanur  Takk fyrir

[Svava frá Strandbergi , 19.3.2009 kl. 17:00]

Sérlega skemmtilegt að lesa síðuna þína.

[Katrín Snæhólm Baldursdóttir, 19.3.2009 kl. 17:24]

Æ nú færðu mig til að skana Englands...það er svo yndislegt þar á vorin.

En ég held að þú ættir að fá Dr Phil til að spá fyrir um krassandi mál eins og kosningar á íslandi og hvort hér muni nást fram alvöru réttlæti?

Og hvort Borgarahreyfingin sé ekki komin til að sjá og sigra

[Katrín Snæhólm Baldursdóttir, 19.3.2009 kl. 17:24]

Sakna....sakna og sakna.

[Lára Hanna Einarsdóttir, 19.3.2009 kl. 23:42]

Ég vil vita ótalmargt... en ekkert sem ég segi hér á opnum vettvangi.

Jú, annars - það sem Katrín er að pæla - ríkisstjórn eftir kosningar og hvort ný öfl ná mönnum á þing.

Ekki að það skipti máli á meðan ráðherraræðið rúlar.

[Svanur Gísli Þorkelsson, 20.3.2009 kl. 00:55]

Þakka ykkur stúlkur innlit og skemmtilegheit. Dr. Phil er kominn á fullt við að ráða í örlög Íslands :) Og vei sé þeim sem halda að Dr. Phil eitthvað blöff.