Íslenskir karlmenn gráta ekki

Allir vita að íslenskir karlmenn gráta ekki. Hvað er annars langt síðan þú sást íslenskan karlmann gráta opinberlega? Erlendis er það alls ekki óalgengt að sjá karlmenn fella tár og í dag birtist listi á vefsíðu BBC yfir 10 algengustu ástæður þess að karlmenn í Bretlandi gráta. Hér kemur listinn og fróðlegt væri að vita hvort ástæðurnar eru í nokkru samræmi við tilfinningar íslenskra karlmanna jafnvel þótt þeir láti ekki eftir sér að væta hvarmana yfir þeim.

 

1. Að gera foreldrana stolta. Eftir að þú hefur staðið þig vel og finnur velþóknun foreldra þinna og hversu stoltir þeir eru af þér.

2. Fæðing fyrsta barns eða barnabarns. Yfirleitt eru karlmenn nú orðið viðstaddir þennan hversdagslega en engu að síður tilfinningaþrungna atburð og fella við hann tár af einskærri gleði og stolti.   

3. Erfiðleikar ástvinar. Karlmenn komast oft við þegar þeir heyra eða ræða um erfitt líf forfeðra sinna eða foreldra og hversu miklu þeir hafa fórnað til að koma afkvæmum sínum til manns.

4. Að bregðast ástvinum sínum. Margir karlmenn vökna um augun þegar standa frami fyrir því að hafa brugðist vonum og væntingum ástvina sinna.

5. Að þurfa að afsaka sig. Eitt af því erfiðara sem karlmenn gera og átakameira eftir því sem afsökunin er einlægari.

6. Að bregðast sjálfum sér. Þegar karlmenn standast ekki eigin kröfur geta vonbrigðin oft lýst sér í táraflóði. Þetta er algengt hjá Íþróttamönnum eins og t.d. fótboltastrákum sem fara að gráta eftir að þeir brenna af í vítaspyrnukeppnum.

7. Þegar þér er sagt upp.  Harðjaxlar og hjartaknúsarar eiga það báðir til að gráta sálega eftir að hafa verið sagt upp. Stundum er það sært stolt og stundum alvöru eftirsjá.

8. Þegar þú ert sigraður. Ekkert er eins sárt og að þurfa að þola ósigur þegar þú veist að þú hefur gert þitt besta en það var bara ekki nóg.

9. Að vinna erfiðan sigur; Ekkert  er tilfinningaþrungnara en að vinna eftir að hafa lagt sig allan fram til þess og tekist það.

10. Þetta eru ekki tár . Það fauk eitthvað í augað á mér.

Athugasemdir

[Jenný Anna Baldursdóttir, 4.8.2008 kl. 17:21]

Rétt og satt í flestum tilfellum.

En varðandi Búsk þá hefur hann verið að skera lauk maðurinn. Hann grætur ekki það er ég viss um.

[Skattborgari, 4.8.2008 kl. 17:41]

Er það ekki innprentað í íslenska karlmenn að það séu aumingjar sem gráta í barnaskóla? Það lærði ég allavega þannig að mér finnst þetta ekki skrýtið.

Karlmönnum er kennt að byrgja tilfiningar sínar inni þannig að mér finnst það ekki skrýtið þó að það sjáist varla íslenskur karlmaður sem grætur opinberlega.

Allavega græt ég aldrei. 

kveðja Skattborgari 

[Óskar Þorkelsson, 4.8.2008 kl. 18:37]

að grenja af reiði.. það vantar þarna í listann :)

[Svanur Gísli Þorkelsson, 4.8.2008 kl. 21:09]

Óskar; Líklega rétt hjá þér, það er ekki munur á grenji og gráti?

Skatti; Þetta er nákvæmlega málið, ef að við grátum, grátum við í laumi :)

Jurgen; Greinilega undantekningin sem sannar regluna, einn af mjúku strákunum :)

Jenný; Veistu að ég varð svo undrandi þegar ég sá þessa mynd að ég varð að hafa hana með. Reyndar held ég að hún hafi verið tekin þegar hann sá síðustu könnun yfir vinsældir sínar.