Stjórnvöld við að drepa gullgæsina

Ef fer sem horfir, verður ferðaþjónusta innan fárra ára mikilvægasta atvinnugreinin á Íslandi. Hún mun afla meiri gjaldeyristekna fyrir landið en sjávarútvegurinn sem nú er í fyrsta sæti en ferðaþjónustan fylgir þar þegar fast á eftir í öðru sæti.

Gjaldeyristekjur í ferðaþjónustu hafa aukist mikið síðustu árin og voru árið 2012 alls 238 milljarðar skv. Hagstofu Íslands en það gerir 23.5% af heildargjaldeyristekjum þjóðarbúsins.

Sjávarútvegur aflar 269 milljarða sem er 26.58% og aflar því stærsta hlutans, ferðaþjónustan er í öðru sæti og álvinnsla aflar 225 milljarða sem er 22.29% sem setur hana í þriðja sæti.

Ferðaþjónustan hefur verið í þriðja sæti í mörg ár þangað til árið 2012 en þá fjölgaði erlendum ferðamönnum um 19% og gjaldeyristekjum um 21%.

Samt eru stjórnvöld komin á fremsta hlunn með að drepa gullgæsina með andvaraleysi sínu.

Þeir staðir sem flestir ferðamenn heimsækja eru annað hvort friðlýst svæði eins og Gullfoss, eign þjóðarinnar eins og Geysir,  Þjóðgarðar eins og Þingvellir og Skaftafell og fl. eða sérstök náttúruverndarsvæði, eins og Mývatn. - Það stendur upp á ríkisvaldið að viðhalda þessum svæðum, stýra aðgenginu að þeim og reka nauðsynlega þjónustu í tengslum við þau. 

Þrátt fyrir umtalsverða tekjuaukningu ríkisins af ferðamennsku, stendur fjársvelti öllum þessum svæðum fyrir þrifum. Vegna fjárskorts er ekki hægt að auka aðgengi að salernum, viðhalda gróðri, bæta gönguleiðir, skipuleggja og stækka bílastæði, auka upplýsingagjöf eða manna nauðsynlega öryggisvörslu.

Almennt er talið að fjöldi ferðamanna á landinu sé þegar nokkuð yfir þolmörkum, miðað við þá aðstöðu sem þessi svæði hafa upp á að bjóða. Einkum er þetta áberandi þegar að farþegar skemmtiferðaskipana fara í dagsferðir. Og enn er búist við mikilli árlegri aukningu ferðamanna næsta áratuginn.

Stjórnvöld hafast samt ekkert að. Þau bera við fjárskorti. Það eina sem þeim dettur í hug er að reyna að finna aðferð til þess að leggja nefskatt á ferðmenn, skatt sem enginn trygging er fyrir að skili sér nokkru sinni þangað sem hann gæti hugsanlega nýst. Að auki mundu slík skattheimta fæla frá okkur ferðamennina. Tekjur ríkisins af ferðamönnum aukast ár frá ári, en þrátt fyrir það sjá þau sér ekki fært að standa undir lágmarks þjónustu við ferðamenn á sviðum sem undir það heyrir.

Hér koma nokkur dæmi um umbætur sem þyrfti að koma starx í verk á Gullna Hringum einum. 

1.Á Hakinu á Þingvöllum þarf að opna leiðina af útsýnispallinum niður í Almannagjá.

2. Þar  þarf að stækka bílastæðin og endurskipuleggja þau.

3.Salerni á neðri bílastæðum mundu létta til muna álaginu á Hakinu á Þingvöllum. Hafa verður í huga að a.m.k. hálf milljón manns kemur á staðinn hvert ár.

4. Við Geysi þarf að bæta aðgengið við efra hliðið. Þar er varanlegur pollur sem þarf að fylla upp í og malbika yfir.

5. Á Gullfossi stendur Sigríðarstofa lokuð og læst þótt hæglega væri hægt að breyta henni í góða almenna salernisaðstöðu. 

6. Enn stendur líkanið af "Þorláksbúð" upp við Skálholtskirkju, staðnum og þjóðinni til skammar. Það þarf að rífa eða flytja.

Athugasemdir

[Ómar Ragnarsson, 6.8.2013 kl. 01:39]

Það þarf að gera meira en þetta. Til dæmis á ríkið ekki Geysissvæðið, ekki Kerið og ekki Dettifoss. Hið bráðasta verður að greiða úr slíkum málum, læra af reynslu erlendra þjóða varðandi svipuð viðfangsefni og veita fjármagni til þess að bjarga þeim verðmætum, sem skapa gjaldeyrisverðmætin.

[Svanur Gísli Þorkelsson, 6.8.2013 kl. 01:59]

Rétt Ómar, að GEYSISSVÆÐIÐ er ekki í eigu ríkisins en Sigurður Jónsson gaf Íslensku þjóðinni Geysi og þess vegna er ríkið ábyrgt fyrir hvernum. Dettifoss er í Vatnajökuls- Þjóðgarðinum og aðgengi að honum og aðstaða við hann er á ábyrgð ríkisins. - Kerið er óumdeilanlega í einkaeign og það er alfarið eigendanna að sjá um það, jafnvel þótt almenningur hafi hingað til kostað framkvæmdirnar við bílastæðin þar og fl.

En vissulega þarf miklu meira til en þetta sem ég nefni, enda aðeins tekin dæmi af afmarkaðri en vinsælli ferðaleið.

[Grímur (IP-tala skráð) 6.8.2013 kl. 09:16]

Því miður virðist óverulegur hluti af kortaveltu ferðamanna á Íslandi skila sér í ríkissjóð og því ert þú að bera saman epli og appelsínur.

Metfjöldi erendra ferðamanna það sem af er þessu ári hefur ekki haft nein áhrif á hagtölur

En eiga annars ekki gilda sömu lög um nýtingu á náttúruauðlindum hvort sem þær eru í sjó eða á landi.

[Leifur Þorsteinsson, 6.8.2013 kl. 09:47]

Það má benda á að þau 3 ríki sem komin eru að fótum fram á hinu marg lofaða

evrusvæði hafa ferðaþjónustu að aðal atvinnu (Spán,Portúgal og Grikkland, ekki

má gleyma Kýpur). Ástæðan er sú að arðsemi af ferðaþjónustu er mjög lítil og í

mörgum til fellum negatíf. Ferða þjónusta er eingöngu þjónustugjöld og laun

þeirra sem starfa við greinina. Það má orða þetta á þann veg, að eingin haldbær

verðmæti skapast sem koma landi og þjóð til góða, (hin mjög svo misskilda lands-

framleiðsla ).

[Jón Logi (IP-tala skráð) 6.8.2013 kl. 16:48]

Ég lýsi nú frati á síðasta innlegg. Þarna gleymist öll vörusala og vsk á hana.
Skrifað í bláá lóninu m. 49 pax.

[Leifur Þorsteinsson, 6.8.2013 kl. 17:42]

Hvert í Logandi. Vörusala hvað?? (Minjagripir maide in China og slíkt).

Túrhestar kaupa sem minnst af því sem framleit er hér á landi og það

þýðir að landsframleiðslan stendur í stað og krónan styrkist ekkert, ergo

engin arður fyrir land og þjóð. Þetta er hagfræði sem hfur haldið gildi sínu

síðan á dögum Rómaveldis og menn hófu viðskipti, Vsk skattur á virðisauk

er ekki virðisauki (arður) og í raun heftir hann !virðiosaukan! (arðinn).

[Jón Logi (IP-tala skráð) 7.8.2013 kl. 06:44]

Ábendingu #1 tekið, en bara samþykkt að hluta.
Jafnvel innflutt drasl ber álagningu og VSK. Okkar VSK er sá hæsti í heimi. Bara hluti af draslinu fer í gegn um TAXBACK. Þannig að jafnvel þar fer útlendur peningur inn í hagkerfið.
Innlennt er LÍKA til. Og þar er verið að tala um alvöru hluti, eins og handverk og mat.
Nokkrar milljónir gistinátta éta alveg helling, og þar í er mikið innlennt. Mætti vera meira.
Þá er það gistingin. Þrátt fyrir lágan VSK, þá er þarna gríðarlegt fjármagn sem kemur inn.
Flutningar? Jú, með sköttum og skyldum, og háum gjöldum.
Til að einfalda þetta, þá rogast útlendingar með X mikið af peningum til Íslands, og eyða þeim þar. Það lendir í mörlandans höndum svo lengi sem hann Á það sem er selt.