Nefskatt á ferðamenn, íslenska sem erlenda!

Ragnheiður Elín Árnadóttir Iðnaðar og Viðskiptaráðherra vinnur nú að því hörðum höndum að finna leið til að leggja á og innheimta nefskatt af öllum þeim sem njóta vilja íslenskar náttúru. 

 Um er að ræða beina aðför að ferðamannaiðnaðinum í landinu en fjármagns-furstar landsins hafa haft horn í síðu hans allt frá því að honum óx fiskur um hrygg. - Þessi nefskattur er aðeins forsmekkurinn af því sem koma skal. Markmiðið er að kvótakerfi í anda fiskveiðikvótans verði komið á, þar sem þeir furstarnir geta keypt sér stóra kvóta og fengið um leið mest úthlutað af þeim fjármunum sem til skiptanna verða af nefskattinum. 

Fjármagns-furstarnir þola illa að eitthvað hafi náð að dafna án þess að þeir hefðu á því fulla stjórn eins og þeir gera í fiskiðnaðinum og orkugeiranum. - Þeir misstu nefnilega sumir af þessari ferðamennsku-hraðlest og það pirrar þá augljóslega mikið. 

Hagsmunapotið og klassísku hrossakaupin eru handan við hornið. 

Samtök ferðaþjónustunnar taka þátt í þeim. Þau reyna að nota fyrirhugaða útgáfu ferðapassans sem skiptimynnt fyrir að fallið verði frá gistinóttagjaldi, sem hingað til hefur runnið til þeirra stofnana sem sjá umskipulag og viðhald ferðamannastaða í umsjá ríkisins. 

Ragnheiður lætur sitt fólk vinna að þessari skattlagningu með miklum hraða og vill að skattheimtan hefjist strax á næsta ári.  Er þetta ekki sama manneskjan og lét rifta nýlegri lagasetningu um aukin virðisaukaskatt á gistingu í landinu og taldi meðal annars til ástæðna að ferðamannaiðnaðurinn væri viðkvæmur fyrir örum hækkunum og aukinni skattheimtu?  Það sést auðveldlega í gegnum pólitísku hræsnina í þessu máli.  

Ragnheiður heldur því fram að best sé að innheimta nefskatt af ferðamönnum til að tryggja öryggi þeirra, rétt eins og þeir séu í stöðugri hættu þegar þeir koma til landsins. Samt sýna allar tölur að Ísland sé eitt öruggasta land í heimi heim að sækja.

Ragnheiður telur að mikill ágangur sé á náttúru Íslands af völdum ferðafólks og vitnar til nýlegra frétta þar að lútandi. Áberandi hafa verið falsfréttir mbl.is og Mogga um þetta efni síðustu mánuði. Engu líkara er að þar á bæ hafi verið ákveðið að taka þátt í samsærinu gegn eðlilegri þróun ferðamennsku á Íslandi, með því að undirbúa jarðveginn að skatttökunni með ýmsum hræðslu og ýkjufréttum úr ferðamannageiranum.

Þeir töluðu t.d. um á dögunum að gjaldtaka væri hafin við Geysi þegar komið hafði verið upp söfnunarbauk til að taka á móti frjálsum framlögum ferðamanna til svæðisins. Þeir hafa birt myndir af öskuflákum á Þingvöllum og sagt það vera merki um átroðslu ferðamanna á staðnum. Þeir hafa birt myndir af ökklablautum ferðamönnum við Reynisfjöru og hermt ástandið þar afar hættulegt.

Þeir hafa hinsvegar passað sig að segja ekkert frá frábærum og tiltölulega ódýrum endurbótum við Seljalandsfoss eða góðu viðhaldi stíga í Þórsmörk. 

Og allt lýtur tal nýju ferðamála-spekinganna sem fjölmiðlum tekst að grafa upp að einu markmiði; að koma geiranum undir einhverskonar stjórn þeirra sem ekki mega vita af því að einhverjir aðrir en þeir sjálfir græði á íslenskum atvinnuvegi. - Talað er um heilræna stefnu, verndun og skipulag, rétt eins og allt þetta sé ekki og hafi aldrei verið til staðar í uppbyggingu ferðageirans, sem auðvitað er alrangt.

Þær tekjur sem ríkið fær af ferðmennskunni í óbeinum neyslusköttum og skattheimtu af fyrirtækjum sem þjóna ferðamönnum ættu að nægja til að greiða fyrir allt það öryggi og alla þær ráðstafanir sem grípa þarf til svo íslensk náttúra standi það af sér að vera skoðuð. Til þess þarf ekki sérstakan nefskatt.

Erfitt er að sjá hvernig Ragnheiður ætlar að standa að innheimtu á skattinum og útgáfu ferðamannapassa án þess að Íslendingar verði að greiða líka fyrir aðgang að landinu sínu. Ragnheiður lét að því liggja í viðtali nýverið, að það ætti að gæta "jafnræðis" við skattheimstuna. 

Staðreyndin er sú að það er ríkið sem hagnast hefur mest á ferðageiranum á undanförnum árum. Tekjur þeirra beint og óbeint af ferðamennsku eru slíkar að þær eru orðnar meiri en af orkufrekum iðnaði. Það ætti að næga ríkinu til að sjá sér hag í því að halda þeim ferðamannastöðum sem undir það heyra í viðunandi ástandi, Þar á meðal eru Þingvellir, Geysissvæðið og Gullfoss. 

Þeir staðir sem eru í einkaeign, geta byggt upp sína þjónustu eins og þeim þóknast, tekið fyrir gjald að horfa á fjallið þeirra af þeirra einkalóð, ef þeim þóknast, svo fremi sem þeir standi sjálfir að þeirri þjónustu sem boðin er á svæðinu og sjái sjálfir um að aðgengið sé í lagi.

En að leggja á alla allsherjar nefskatt fyrir að njóta náttúrunnar á Íslandi, er út í hött og verður aldrei til annars en að innleiða spillingu og gera ímynd landsins óvinveitta almennum ferðamönnum. 

Ekkert hefur enn verið gefið út um þær hugmyndir sem ráðuneyti Ragnheiðar vinnur nú að.  Það er til vansa því fólk veit ekkert hverju það á von. Ætlunin er eflaust að kynna frumvarpið þegar það er fullbúið og keyra það svo í gegnum þingið. Það er sá háttur sem við eigum að venjast og hefur ekki breyst hjá núverandi valdhöfum þrátt fyrir fögur loforð um það gagnstæða. 

Athugasemdir

[Ómar Bjarki Kristjánsson, 27.6.2013 kl. 10:30]

Jú, það er rétt, að hálfvitalegar áróðursfréttir Mogga þessu viðvíkjandi ættu að vera öllum augljósar.

Moggi var svo ákafur í áróðursfréttum að í einni fréttinni þá hafði verið settur upp skúr við kerið - og fólk kom bókstaflega hlaupandi til að fá að borga. Kom hlaupandi og alveg skælbrosandi og hamingjusamt.

Og er ekki Óskar Magnússon tengdur hvorutveggja? Keri og Mogga. Síðast þegar ég vissi.

Þetta hefur ekki bara verið í Mogga, heldur líka td. á svokallaðri ÍNN stöð sem er mikil furðustöð lengst til hægri manna. Eg veit ekki hvað oft ég hef heyrt stórar ræður hjá Ingva Hrafni um að ekki sé hægt að pissa ef Kerið og fleiri staðir eru skoðaðir. Hann getur þá núna sennilega pissað í Kerið - gegn gjaldi.

[pétur þormar (IP-tala skráð) 27.6.2013 kl. 14:06]

ALveg listalega vel skrifuð grein