Prestar og Poltergeist

Margir trúa því augljóslega að prestar hafi yfirnáttúrulega krafta. Þessir kraftar, trúir fólk, gera presta sérstaklega hæfa til að fást við allskonar yfirnáttúrulega og óútskýranlega "óværu". Prestar geta oft með blessunarorðum einum saman fengið drauga og púka til að vera til friðs, trúir fólk.

Orð presta eru svo miklu máttugri en t.d. ráðherra. Eitt sinn blessaði ráðherra Ísland, en það dugði ekkert. Það kom kreppa og allir höfðu það skítt.

Stundum eru prestar kallaðir til, til að reka á brott  illa anda sem hafa tekið sér bólfestu í hýbýlum fólks. Líklega eru þetta bara draugar sem eins og allir vita eru jarðbundnar sálir sem eru að kalla á hjálp vegna þess að þær finna ekki leiðina að ljósinu. Þetta er allt skýrt afar vel í mynd sem heitir Poltergeist og allir prestar hafa séð. 

Þá yfirnáttúrulegu krafta sem prestar búa yfir, fá þeir þegar þeir vígjast til prests. Með vígslunni fá þeir bæði umboð og krafta frá Guði til að berjast við og útrýma öllu slæmu hvort sem það er af þessum eða öðrum heimi. og venjulegt fólk ræður ekkert við að útskýra, hvað þá að fást við sjálft.

Maður þarf sko að vera sterkur til að ráða við draug. Grettir Ásmundason var reyndar svo sterkur að hann réði við drauginn Glám. En Grettir var líka sterkastur allra. 

 Og þegar að svona "óværa" sem rekin er með blessunarorðum úr hýbýlum manna, tekur sér sér bólfestu í líkömum  fólks, reynir fyrst alvarlega á umboð presta. Þegar fólk er andsetið verða prestar virkilega að beita ofurkröftum sínum af öllu afli til að reka illu andana út.  - Kristur fór reyndar létt með þetta á sínum tíma og skipaði svona illum öndum sem voru ungum manni til ama, að taka sér bólfestu í svínum sem auðvitað ærði þau svo að þau hlupu fyrir björg. -

Í dag er líka leitað til sálfræðinga og geðlækna þegar svona "óværur" leita á sálir fólks. En þeir hafa ekkert umboð frá Guði eins og prestar og gengur því yfirleitt illa að fást við vandmálin. Oft enda svoleiðis meðferðir með miklum lyfjatökum og jafnvel innlagningu á geðdeildir.

Þá er nú betra að nokkur svín verði brjáluð. 

Óttaslegnir íbúar leita blessunar

Athugasemdir

[Áslaug Herdís Brynjarsdóttir (IP-tala skráð) 27.4.2013 kl. 12:08]

Já það vill oft misskiljast að það séu bara prestar sem hafa þetta vald en reyndar gaf Jesús öllum mönnum þetta vald..........sem trúa á Jesús............ samber Mark:16:17, "Í mínu nafni............"en við erum oft svo vantrúuð á eigin getu í þessum efnum.

[Ingó (IP-tala skráð) 27.4.2013 kl. 17:57]

Er í lagi að borða svín sem hafa verið andsetin.

[DoctorE (IP-tala skráð) 27.4.2013 kl. 20:03]

Hver er geggjaðri, sá sem kallar eftir prestinum eða presturinn...