Á að banna einelti með lögum

Allir þekkja það. Margir hafa tekið þátt í einhverju formi þess, stundum af óvitaskap og stundum af illkvittni. Afleiðingar þess eru hræðilegar og hafa áhrif á þolandann alla ævi.

Ég þekki einstaklinga sem lagðir voru í einelti í skóla á uppvaxtarárunum og sem aldrei hafa borið sitt barr. Þeir eru brennimerktir á sálinni.

Sumir vilja ekki einu sinni  tala um það.  Þeir skammast sín fyrir það, rétt eins og að glæpurinn hafi verið þeirra. - Þeir vilja ekki heyra til sama hópi og  "undirmálsfólkið",  "fitubollurnar", "bæjarvillingarnir" og "hreppskassa liðið" tilheyrði.

Þeir sem urðu verst úti þegar ég var að alast upp, gáfust upp fljótlega eftir að þeir komust á unglingsárin, földu sig, fluttu í burtu eða jafnvel, styttu sér aldur. -  Það voru þeir sem ekki gátu auðveldlega breytt eða falið vaxtarlag sitt, uppruna, háralit, kæki, lykt, smæð og/eða stærð. 

Einelti meðal fullorðinna er í flestum tilfellum framlenging á vandmálinu. Þeir sem stunda einelti hafa oftast orðið fyrir því sjálfir. Stór þáttur í að uppræta einelti almennt er því að uppræta það í skólum og á heimilum landsmanna.

Einelti í sinni verstu mynd er vissulega glæpur og ætti að banna með lögum, rétt eins og t.d. er gert í Skotlandi. Spurningin er bara um að skilgreina það nógu skynsamlega til að venjuleg stríðni, sem oft er hluti af gamansemi, verði ekki gerð ólögleg um leið.

Á að vera stanslaust í umræðunni

Athugasemdir

[Óskar Guðmundsson, 8.11.2011 kl. 17:46]

Fátt hverfur með bönnum.

Eiturlyf eru t.d. bönnuð á landi hér en sjaldan ef aldrei hafa þeu verið jafn áberandi.

Það sem vantar mun fremur en bönn er fræðsla.

Olveusaráætlunin er þar mikilvæg þar sem þar er samábyrgð þeirra aðgerðalausu tekin til jafns við gerandann og frekar samkennd með náunganum virkjuð.

[Ómar Ragnarsson, 8.11.2011 kl. 19:16]

Ég get upplýst um það að eitt ákvæðið í frumvarpi Stjórnlagaráðs er ákvæði um það að allir eigi rétt á að lifa með reisn. Sá, sem lagður er í einelti, er sviptur þessum rétti, og samkvæmt svona ákvæði í stjórnarskrá er yrði einelti ótvírætt lögbrot og stjórnarskrárbrot.