Iceland Express klúðrið.... framhald

Hér er framhaldið af ferðasögu minni með Iceland Express til London í fyrradag þar sem ég segir farir mínar ekki sléttar.

Kl:5.15 voru allir farþegarnir mættir aftur í biðröð við hliðið. Fyrir utan stóð vél frá Finnlandi sem komið hafði með farþega þaðan og verið var að þrífa. Vélin var sérstök leiguvél sem fengin hafði verið í stað þeirrar biluðu. Í stað þess að senda hana beint til Íslands til að ná í farþegana sem þar biðu voru þeir látnir mæta afgangi og vélin var hún látin fljúga áætlunina frá London.

Þegar ekki var hleypt um borð á tilsettum tíma var afgreiðslufólkið spurt hverju sætti en það hafði engin svör. Það tjáði mér að það mætti engar tilkynningar setja í kallkerfið nema að einhverjir yfirmenn gæfu á það grænt ljós. Yfirmaður vaktar var sagður úti að þrífa vélina frá Finnlandi.

Ungur maður spurði hvort hann ætti ekki bara að taka að sér að hrópa tilkynningu yfir hópinn um að vélin sem úti stæði væri flugvélin sem fljúga ætti með sem hann síðan gerði við talverðan fögnuð farþega.

Þegar að vaktstjórinn kom loks inn spurði ég hana hvort hún ætlaði ekki að tilkynna seinkun þar sem klukkan var nú orðin 17:30. Hún svaraði mér til að allir sæju hvað væri í gangi og engin þörf væri á að tilkynna neitt.

Loks var hleypt um borð í vélina.  Eftir að allir voru sestir og vélin tilbúin til að fara frá, voru lestar hennar opnaðar aftur og byrjað var að hlaða í hana frosnum fiski. Ég spurði einn starfsmann IE hvernig stæði á þessu og hvort ekki hefði verið hægt að hlaða fiskinum á meðan vaktstjórinn þreif vélina. Hann sagði mér að starfsmenn IE hefðu ekki haft hugmynd um að einhver fiskur ætti að fara með vélinni.

Vélin fór í loftið langt gengin í sjö.

Þegar ég kom til Englands var ég búin að missa af öllum flugvélum og lestum svo ég varð að kaupa mér gistingu á hóteli við flugvöllinn.

IE starfsmenn höfðu áður tjáð mér að þeir væru ekki á neinn hátt ábirgir fyrir ferðaröskun þessari eða kostnaði sem af henni hlytist.

Eitt er að standast ekki áætlun og annað hvernig þú tekur á því þegar það gerist.

Mér skilst að IE tímasetningar standist í 37% tilvika. Sem slíkir ættur þeir að vera orðnir nokkuð góðir í að vera seinir og þjálfaðir í að eiga við óánægða viðskiptavini.

Því miður er því ekki að fagna. Yfirstjórn söluskrifstofunnar ættu að yfirfara og endurskipuleggja viðbrögð starfsfólks síns til að það þurfi ekki að standa eins og þvörur á láta óánægða farþega drulla yfir sig daglangt.

 

Athugasemdir

[Nanna Gunnarsdóttir (IP-tala skráð) 16.8.2011 kl. 11:22]

Sæll. Skelfilegar raunir hjá þér en því miður er þetta ekkert nýtt hjá IE. Árið 2008 pantaði ég með nærri 6 mánaða fyrirvara 4 miða til Kaupmannahafnar fyrir fjölskylduna. Eiginmaðurinn var ekki sáttur og vildi fara með Icelandair en verðmunurinn var um 80 þúsund og ég vildi frekar gera eitthvað annað við þá aura. Akkúrat viku fyrir flugið út var okkur tilkynnt um breytingu á fluginu, það yrði millilent. Og hvar millilendir maður á leið til Köben? Nú náttúrulega í Varsjá í Póllandi. Það þýddi að í stað þess að fljúga kl. 7.30 var flogið kl. 4 að nóttu, mæting því kl. 2 á Leifsstöð og enginn nætursvefn þá nóttina, sem aftur þýddi að fyrsti dagurinn í jólafríinu var ónýtur vegna svefnleysis. Verið var sem sé að ferja Pólverja heim sem voru að flýja land eftir hrunið og við vorum sex Íslendingar í vélinni frá Varsjá til Kaupmannahafnar. Á leiðinni heim, fimm dögum síðar, tók ekki betra við. Við lentum í Leifsstöð rúmlega miðnætti, fórum í fríhöfn eins og vanalega meðan farangur tíndist á bandið. Ein taska af fjórum skilaði sér. Svo biðum við. Og biðum. Og biðum. Maðurinn minn tók eftir því að ein flugfreyjan fór að tala við fólk sem hann var málkunnugur og fór að hlera. Hún sagði eitthvað skrítið að farangurinn væri ekki kominn og gekk með þeim að upplýsingadeski IE og spurði hverju þetta sætti. "Farangurinn er ekki kominn", sagði stúlkubarnið sem þar varð fyrir svörum. "Hann varð eftir úti". Þarna höfðum við beðið í hálftíma og enginn sagt neitt. Minn maður missti stjórn á sér og spurði hátt og snjallt: "Og ætlaðirðu ekkert að tilkynna það, manneskja?" og svarið var: "Nei, við erum enn að leita milli þilja". Traustvekjandi, eða hitt þó heldur.

[Kolbrún Hilmars, 16.8.2011 kl. 18:31]

Svanur, var virkilega enginn á vegum fyrirtækjanna tveggja; IE og AA, sem sagði svo mikið sem FYRIRGEFÐU?

[Nanna Gunnarsdóttir (IP-tala skráð) 16.8.2011 kl. 18:54]

Neeeei, af hverju, þetta er alltaf einhverjum öðrum að kenna, Isavia, eða einhverjum öðrum þjónustuaðila á einhverjum flugvelli úti í heimi. Ekki vorum við t.d. beðin afsökunar á klúðrinu með flugið okkar þarna um árið, hvað þá þessu með farangurinn. 

[Svanur Gísli Þorkelsson, 16.8.2011 kl. 20:27]

Sá eini sem ég heyrði biðjast afsökunar var stuttaraleg afsökunarbeiðni frá yfirþjóninum í finnsku flugvélinni fyrir hönd IE.

[Eyjólfur G Svavarsson, 16.8.2011 kl. 20:28]

Þeir eru ekkert að bæta sig greyin, því miður! Þetta virðist ættla að loða við þá alla tíð!!!

[Sigurður I B Guðmundsson, 16.8.2011 kl. 20:31]

Á fólk sem er tilbúið að versla við Pálma Haraldsson nokkuð betra skilið?

[Svanur Gísli Þorkelsson, 17.8.2011 kl. 17:52]

Athyglisverður punktur Sigurður.

Bónus lifir enn góðu lífi af því að stór hluti  Íslendinga verslar við þá kóna og þeir eru jú af sama sauðahúsi og Pálmi.

Kannski eigum við ekkert betra skilið þegar allt kemur til alls. 

[Bergljót Gunnarsdóttir, 17.8.2011 kl. 23:04]

Almenningur er settur í þá svikamillu að verða að versla við Bónus, sem arðrændi þá, og heldur því áfram með því að vera ódýrast, og hvað skal til ráða ef þú átt ekkert?

Vei þeim Bónus andskotum!

[guggap (IP-tala skráð) 18.8.2011 kl. 07:30]

.... og ætlarðu svo að fljúga til Íslands næst með Iceland Express eða Icelandair? Og mælirðu ennþá með því að nota IE til Glasgow í sept? Það má víst með sanni segja að sumt breytist ekki eða lítið, en batnandi mönnum er best að lifa. CU

[Davíð Kristjánsson, 20.8.2011 kl. 15:34]

Við hjónin ætluðum að taka Icelandair til Alicante en það munaði of miklu á þeim og IE til Tenerife að við gætum sleppt því. (Nokkur koníakstár.) Við höfum svosem lent í veseni með þá áður og viðbúið að ferðin teygist í einhverja áttina.

Annars á maður ekki að skipta við Pálma. Þetta eigum við nú að vita Svanur.

[Svanur Gísli Þorkelsson, 20.8.2011 kl. 17:13]

Mikið rétt Davíð :(