Blóðhefnd

Fréttir af dauðsföllum og líkamsmeiðingum frá Írak og Afganistan eru jafn áhrifaríkar og regnið sem fellur í hafið.

Þjáningar fólks í þessum löndum eru hættar að snerta við vestrænum hjartastrengjum enda grimmd ofbeldisverkanna svo yfirþyrmandi og tilgangsleysið svo auðsætt.

Í báðum þessum löndum eru háð stríð sem herforingjarnir segja sjálfir að ekki sé hægt að vinna. 

Samt þráast allir við.

Hermennirnir skjóta og sprengja og spyrja spurninga eftir á. Nú, voru þetta óbreyttir borgarar, hvá þeir.

Þeir hugsa; betra að þau falli en við. Og hver er eiginlega munurinn á löggildum skotmörkum og þeim sem ekki má drepa?

Þeirra aðgerðir ganga út á að búa til eins margar ekkjur og munaðarleysingja og hægt er.

Ekkjunum er boðin leið út úr sorg og örbyrgð með því að stökkva á bál hatursins og aka bifreið fullfermdri af sprengiefni inn á einhvern markaðinn.

Hjörtu barnanna herðast við að sjá foreldra sína og ættingja falla og þau heita í huganum hefndum. Áður en varir er einhver búin að girða þau beltum og lofa þeim sætum endurfundum við ástvini sína í Paradís.

Allar aðgerðir kalla á viðbrögð, hefndarviðbrögð, blóðhefnd..

Bíddu, hver var aftur réttlætingin á styrjöldunum?

Tvö börn myrt í sjálfsmorðsprengjuárás

Athugasemdir

[sr (IP-tala skráð) 20.9.2009 kl. 15:13]

Spurningin er ágæt, sendu hana til þeirra sem vildu láta íslendinga rita nafn sitt í blóðpollana: SjálfstæðisFLokkurinn og Framsóknarflokkurinn.

[Sigmar Þór Sveinbjörnsson, 20.9.2009 kl. 15:48]

Heill og sæll Svanur Gísli, þetta er góð grein hjá þér og þörf ábending.

kær kveðja 

[Kolbrún Stefánsdóttir, 20.9.2009 kl. 21:10]

Sæll Svanur. Þetta kann að vera rétt hjá þér en þessi pistill kemur við viðkvæma hjartastrengi hjá mér. Takk fyrir hugvekjuna. Kveðja Kolbrún

[Skúli Skúlason (IP-tala skráð) 20.9.2009 kl. 22:12]

Svanur 

Heldurðu  virkilega  að  hermennirnir  séu  að  drepa  fólk  að  gamni  sínu?

Hvað  eiga  þeir  að  gera  ef  skotið  er  á  þá  úr  brúðkaupsveislum  eða  fjölmennum  hópum?

Það  eru  fleiri  en  ein  hlið  á  þessu  máli  og  sjálfsagt  margar.

Auk  þess  áttu  að  vita  að  kennisetningar  íslams  framleiða  hryðjuverkamenn  sbr.  Kóran  008:012.

[Svanur Gísli Þorkelsson, 20.9.2009 kl. 23:19]

Skúli spyr; "Hvað  eiga  þeir  að  gera  ef  skotið  er  á  þá  úr  brúðkaupsveislum  eða  fjölmennum  hópum?"

Þeir eru boðflennur í brúðkaupinu, boðflennur í landinu.  Þeir eiga þar ekkert erindi.  Ef að skotið er þá eiga þeir að flýta sér í burtu, heim til eigin barna og kvenna, í stað þess að gera þær að ekkjum og munaðarleysingjum.

En hvað gera þeir? Drepa sem flesta í brúðkaupinu og segja svo; ja það var sko skotið á okkur.- Og allir Talibana-Skúlar þessa heims hrópa húrra og segja að svona eigi þetta sko að vera.

[Jóna Kolbrún Garðarsdóttir, 21.9.2009 kl. 01:44]

Það er merkilegt hversu stríðsherrarnir sækja það fast að hafa herlið í annarra manna löndum.