Sláðu blettinn til að losna við streituna

Það er fátt sem lyktar betur en nýslegið gras. Um þetta getur fjöldi Íslendinga vitnað, ekki hvað síst þeir sem alist hafa upp í sveitum landsins. Borgarbúar vita þetta líka því jafnvel þótt sumir heykist á því um stund að slá blettinn, líður þeim alltaf betur eftir að verkinu er lokið. 

Hamingjan er heyskapur

Nýjar rannsóknir benda til þess að heyskapur og blettasláttur geti hamlað streitu. Í ljós hefur komið að efni sem losnar þegar gras er slegið gerir fólk glaðara og hægir á elliglöpum. Vísindamennirnir sem stóðu að þessum rannsóknum segja að efnið virki beint á heilann og hafi einkum áhrif á minnis og tilfinningastöðvar hans staðsettar á svæðum sem nefnd hafa verið Amygdala og Hippocampus.

Eftir sjö ára rannsóknir hefur tekist að búa til ilmvatn sem lyktar eins og nýsleginn blettur og verður sett á markaðinn fljótlega undir nafninu “eau de mow”.

Frekari upplýsingar um þessa "nýju" uppgötvun hér.

Athugasemdir

[Óskar Þorkelsson, 27.8.2009 kl. 17:07]

Mér finnst þessi lykt alltaf langbest þegar hún kemur frá nágrönnunum ;)

[Brattur, 27.8.2009 kl. 22:23]

Svo nú þarf maður ekki að slá blettinn lengur... bara puðra má grasilmvatni út fyrir veröndina... draga að sér frískt loftið og halda áfram að grilla... afslappaður...

[Jóhanna Magnúsar- og Völudóttir , 28.8.2009 kl. 10:39]

Ég hef tekið eftir þessu með grassláttinn. Við eigum þrjú að skiptast á hér í mínu húsi, en ég stelst iðulega til að vera á undan hinum.

Ágætt að hugleiða um leið og maður ýtir sláttuvélinni á undan sér, og eflaust skemmir græni liturinn og síðan ilmurinn af hinu nýslegna grasi ekki fyrir ..