Hver er tilgangur XO í dag?

Þingfólk XO verður að fara að gera það upp við sig hvað það ætlar að vera. Í dag er það hvorki fugl né fiskur þrátt fyrir djörf loforð um annað á sínum tíma.  Það var kosið á þing vegna vegna mikillar óánægju með gamla fokkkerfið (flokkskerfið) og eljumikils starfs fólks sem sameinaðist í Borgarhreyfingunni.

Þeir sem buðu sig fram á hennar vegum voru hvattir til að halda sínum eigin skoðunum enda var framboðinu stefnt gegn hefðbundnu flokksræði og klafa-pólitík. Hver og einn þingfulltrúi átti að fá að kjósa eins og samviska hans segði honum og reyndar er gert ráð fyrir í stjórnarskránni, en flestir virða að vettugi. 

Þessi tilraun hefur gengið dálítið brösuglega svo ekki sé meira sagt. Samt ætla ég að segja meira;

Fyrstu mistökin áttu sér stað þegar að þingfólkið myndaði með sér þingflokk sem síðan átti að starfa eftir reglum þingflokka. Þau fengu sér kennitölu og gátu þar með þegið opinbera styrki til þingflokksins. Betra hefði verið að láta þingflokkinn lönd og leið og þau hefðu hvert og eitt starfað og kosið í samræmi við sannfæringu sína.

Næst rottuðu þrjú þeirra sig saman og splundruðu þingflokknum með því að reyna selja atkvæði sín í pólitískum hrossakaupum. Þessi Þrjú vildu reyna sig í pólitískri refskák og töpuðu. Þau viðurkenndu vissulega að þau hefðu gert mistök, en reyndu samt að réttlæta sig með þessu gamla góða; betra smá vont núna en voðalega vont seinna.

Samhliða þessari óheillaþróun myndaðist smá saman gjá milli þingfólksins og "hreyfingarinnar" sem þrátt fyrir allt talið um að hnekkja flokksræðinu, var farin að líta svo á að hún ætti að  hafa eitthvað um það segja hvernig þingfólkið varði atkvæðum sínum inn á þingi. - En formleysið og markmiðið, að fúnkera ekki eins og stjórnmálaflokkur en vilja samt hafa áhrif, þvældist fyrir.

Loks var kallaður fundur í hreyfingunni þar sem átti að ræða hversvegna Birgitta sem var tilbúin til að selja atkvæði sitt í ESB málinu ef  Icesave samningurinn yrði felldur, sagðist nú vera tilbúin til að samþykkja samningin með smávægilegum breytingum.

Svo átti kannski líka að ræða hvers vegna enginn talaði við Þráinn og hversvegna skáldið talaði bara við fjölmiðla en ekki aðra af þingfólki listans. 

Ef tími væri til átti svo að minnast á hvers vegna þingfólkið talaði ekki við meðlimi hreyfingarinnar sem lagt hafði svona mikið á sig til að koma þeim á þing.

Því er skemmst frá því að segja að enginn af þingfólkinu mætti á fundinn og fáir úr hreyfingunni.

Nú er spurning hvort ekki sé orðið einsýnt með að þessi tilraun til nýrra starfshátta á alþingi og þeirra sem standa að framboðum til þess, hefur misheppnast.

Eitt af fáum skýrum stefnumálum hreyfingarinnar var að hún mundi leggja sig niður eftir að tilgangi hennar væri lokið. Er ekki kominn tími til að efna það loforð eða hver er tilgangur hreyfingarinnar og þingfólks hennar í dag?

Athugasemdir

[sigurvin (IP-tala skráð) 7.8.2009 kl. 06:02]

Sæll og þakka þér enn og aftur fyrir þína frábæru pistla.

Það mátti alveg sjá fyrir að einhverjar krísur myndu herja á þessa hreyfingu. Þingmönnunum er vorkunn, allt gerðist hratt, framboð, kosningabarátta og "púff" búið að setja þing og brjálað að gera. Það er varla hægt að segja að þeim hafi verið hent útí djúpu laugina, þeim var hent í sjóinn þar sem öldugangurinn var hvað ákafastur. Ég held að það krefjist hugarfarlegs undirbúnings að fara í þetta starf, hann gafst ekki.

Við þessar aðstæður kemur ekki á óvart að mistök verði gerð, það er beinlínis eðlilegt. Þessvegna er nauðsynlegt að bæði viðurkenna mistök og fyrirgefa, það getur reynst erfitt, ég hefði stundum viljað merkja meiri sáttartón hjá sumum. Það þarf að skoða kennitölu/reiknings málið (ekki veit ég hvernig þetta er hjá öðrum flokkum), þingflokkurinn þarf að skoða samskipti sín við grasrótina og grasrótin þarf að skoða afstöðu sína til þingflokksins, hún getur t.d. ekki ráðið því hvernig atkvæði eru greidd.

Atkvæðagreiðlan um ESB (fyrirgefanleg mistök þremenninganna) eru sögð ástæða þessarar krísu en ég hef á tilfinningunni að svo sé ekki. Þarna eru að ég held karakterar sem ekki er gefið að vinna saman. Þegar svo er þurfa menn að leggja hart að sér og gefa af sér til samstarfsins. Í ólgusjónum hefur ekki gefist tími til þess. Allir þingmennirnir eru ríkulega búnir heiðarleika og réttsýni, þeim er ekki eðlilegt að setja upp pókerfeis og blekkja öfugt við flesta þingmenn annarra flokka.

Ekki veit ég hver það er í þessu fótboltaliði sem einleikur og treysir ekki öðrum fyrir boltanum en það er alveg ljóst að liðið verður að vinna saman ef árangur á að nást, það verða allir að treysta hvor öðrum og virða sem jafningja. í því felst lausn krísunnar.

SPILLING á sennilega stærstan þátt í því hvernig komið er fyrir þjóðinni. Aðalástæðan fyir því að ég styð Borgarahreifinguna er að ég tel hana eina aflið sem getur unnið á því að uppræta spillingu. þetta er 8-12 ára barátta að lágmarki og þessvegna bráðnauðsynlegt að hún fái að þróast og dafna og trúi ekki öðru en að bæði grasrótin og þingmennirnir allir, leggi allt í sölurnar til að svo megi verða.

Og þá læt ég þessum hugleiðingum lokið þó margt fleira mætti segja.

kveðja

[Óskar Þorkelsson, 7.8.2009 kl. 08:04]

Þetta er besta skýring á borgarahreifingunni og andláti hennar sem ég hef séð í bloggheimum til þessa, verður erfitt að toppa þessa skýringu.

En í mínum huga dó xó þegar þau gengu bak orða sinna og kusu gegn ESB til þess að ná fram örðu baráttumáli sem var að fella icesafe.. svo vill Birgitta samþykkja hann núna með breytingum.. javel.. afhverju ekki bara segja hreint NEI. 

Út með þessi þrjú sem vilja plotta og starfa eins og "hinir" og inn með varamennina.. Þráinn, eða skáldið eins og þú kallar hann Svanur, hefur þó verið heiðarlegur í gegnum þetta allt.. 

[GunnarS (IP-tala skráð) 7.8.2009 kl. 12:06]

Sigurvin kl.6:02  hefur rétt fyrir sér.

 Borgarahreyfingin er bara að fara í gegn um smákrísu sem á eftir að gera hana sterkari þegar búið er að vinna úr málunum.

[Svanur Gísli Þorkelsson, 7.8.2009 kl. 12:23]

Sé þetta smákrísa Gunnar, hvernig lítur þá stór krísa út? Hér takast á tvær grundvallar-hugsjónir, annarsvegar að þingfólk skuli vera ábirgt gagnvart stuðningsfólki sínu og ályktunum þess og hins vegar að þeir skuli vera frjálsir og aðeins bundnir samvisku sinni hverju sinni í hverju máli.

[Katrín Snæhólm Baldursdóttir, 7.8.2009 kl. 14:20]

Nokkrar  SMÁ  leiðréttingar Svanur. Birgitta segist ekki vilja samþykkja Icesave með smávægilegum breytingum heldur mjög sterkum og hörðum fyrirvörum og ef þeir séu ekki tryggðir þannig að taka verði málið upp aftur og þá frá hendi Hollendinga og breta og endursemja þá líklega muni hún fella.

Þór Sarri hefur gert skýra grein fyrir fjarveru þingmanna á fundinum í gær en í fyrrakvöld báðu þingmenn um að fundinum yrði frestað vegna anna þeirra sem var samþykkt af stjórn en á einhverjum harðahlaupum í fjölmiðlum breytti formaðurinn um skoðun og sagði að það skuyldi haldinn fundur vegna yfirlýsinga Þráins og fundarboð var sent út ú hasti þrátt fyrir að fyrir lægi að þeir sem málið varðaði myndu ekki mæta og voru formaður og varaformaður hvorugt á fundinum.

Af yfirlýsingum að dæma vill þinghópurinn gjarnan ræða við Þráinn sem þráast við að ræða málin. Þau tala vel um hann hvar sem þau koma og taka ekki þátt í fjölmiðlaslagnum sem nú stendur yfir.

Annars tek ég bara undir orð Sigursveins hér að ofan og tel allar fréttir af andláti Borgarahreyfingarinnar stórlega ýktar og tel hana vera að ganga í gegnum eðlilega vaxtarverki.

 Afl eins og Borgarahreyfingin sem er engum háð og hefur engra annarra hagsmuna að gæta en fólksins í landinu er lífsnauðsynlegt inni á alþingi og vona ég að þar verði hún þar til markmiðum er náð og leggi sig svo niður. En við skulum ekki halda eitt augnablik að svona stórt verkefni taki aðeins nokkra mánuði og hreint ekki sanngjarnt að dæma árangur hreyfingarinnar eftir aðeins tvo mánuði. Það er úti í hött og því sanngjarnt að gefa henni meiri tíma til að sanna sig. Reyndar finnst mér þinghópurinn hafa staðið sig vel og gefið okkur þarfa innsýn inn í raunveruleg vinnubrögð sem ástunduð er á þinginu.

Kveðja

[Svanur Gísli Þorkelsson, 7.8.2009 kl. 15:05]

Sæl Katrín; Þessi færsla er ekki skrifuð af því að ég vilji sjá Borgarhreyfinga dauða, síður en svo. Hitt finnst mér mikilvægt að hlutirnir séu kallaðir réttum nöfnum og ekki sé reynt að vera með það yfirklór sem við erum orðin vön úr herbúðum stjórnmálaflokkanna. - Vissulega mun það taka tíma að breyta hugarfari fólks á móts við það sem hreyfinginn vill sjá, en þá verður líka að skilgreina þær hugmyndir betur. Hingað til hefur enginn tæklað af alvöru mismuninn á þeim grundvallarsjónarmiðum sem ég reyfa þ.e. annarsvegar að þingfólk skuli vera ábirgt gagnvart stuðningsfólki sínu og ályktunum þess (Borgarhreyfingunni) og hins vegar að þeir skuli vera frjálsir og aðeins bundnir samvisku sinni hverju sinni í hverju máli.

[GunnarS (IP-tala skráð) 7.8.2009 kl. 15:20]

Svanur kl. 12:23

Þetta er smákrísa út af mjög stóru máli.

Það er ekki hægt að ætlast til að þingmenn greiði atkvæði gegn sannfæringu sinni í neinum flokki.

Er þessi blinda fylgispekt við flokkslínur ekki stærsta meinið í íslenskri pólitík í dag?

Ég efast ekki um að þremenningarnir í BH séu að kjósa í samræmi við það sem þau álíta best fyrir framgang stefnumála hreyfingarinnar í ljósi breyttra aðstæðna.

Það eru engin óheilindi í því fólgin að að breyta um áherslur þegar nýjar og ógnvekjandi staðreyndir koma Í ljós sem breyta öllu dæminu - það ber vott um hugrekki og þroska, enda hafa þau öll gert rækilega grein fyrir sínum gjörðum og ég styð þau fullkomlega í því sem þau hafa gert.

[Svanur Gísli Þorkelsson, 7.8.2009 kl. 15:46]

Gunnar; Ef þremenningar hefðu hreint út skipt um skoðun og ekki reynt að selja atkvæði sín þá mundu þessi rök um "heilindi" duga.

Mér sýnist þú alveg vera á þeirri línu að þingfólk eigi að kjósa samkvæmt sannfæringu sinni og vera frjálst til þess að breyta um skoðun hvenær sem þeim þóknast. Gott og vel. En til hvers eru þá flokkar (hreyfingar) , og hverjar eru skyldur þingfólks við flokkana?

[GunnarS (IP-tala skráð) 7.8.2009 kl. 16:14]

Ég fæ ekki betur séð en að þremenningarnir hafi skipt um skoðun varðandi það hversu áriðandi það er að sækja um ESB einmitt núna þegar mikil pressa kemur frá einmitt þessum löndum um að skrifa undir nauðarsamninga við breta og hollendinga. 

Að mínu mati er þetta nákvæmlega ekki tíminn til að ganga til samninga við sambandið. - Sjálfur er ég andvígur þessari umsókn þannig að ég á auðvelt með að sætta mig við það sem þau gerðu í ESB málinu, enda var það ekkert sérstaklega áberandi baráttumál BH fyrir kosningar.

Flokkar og hreyfingar eru stofnaðar í kring um ákveðin málefni en innan allra flokka og hreyfinga eru yfirleitt mjög mismunandi áherslur á mörg þeirra mála sem fjallað er um og það er einfaldlega ekki hægt að sníða þingmönnum of þröngan stakk í þessum efnum - þannig yrði lítið gagn í þeim á þingi.

[Svanur Gísli Þorkelsson, 7.8.2009 kl. 18:07]

Tímasetningin er bara fyrirsláttur Gunnar. Það var ljóst á ummælum allra sem nú skipa þingflokkinn fyrir kosningar að þau vildu láta reyna á ESB umsókn og láta þjóðina kjósa svo um málið. Síðan kom þessi tilraun til hrossakaupa sem misfórst.

Borgarahreyfingin var stofnuð um mjög ákveðin málefni. Um að haldið yrði stjórnlagaþing sem miðaði að því að rjúfa flokkshagmunapólitíkina, um að breyta starfsháttum þingmanna og um að standa vörð um hagmuni heimilanna.

Svo kemur þessi samþykkt.- "Það er skilningur stjórnar að þinghópur Borgarahreyfingarinnar sé hluti af Borgarahreyfingunni og skuli því starfa í samræmi við samþykktir hreyfingarinnar og í nánu samráði við félagsmenn og stjórn. Stjórnin getur ekki skv. umboði sínu sætt sig við að þinghópurinn fari þvert á yfirlýsta stefnu hreyfingarinnar án þess að náið samráð sé haft við stjórn og félagsfundi.

Það verður ekki bæði sleppt og haldið kæri Gunnar :)

[GunnarS (IP-tala skráð) 7.8.2009 kl. 18:59]

Svanur

Á endanum snýst þetta um markmið og leiðir.

Ef farið er eftir aðferðarfræðinni sem þú lýsir væri það eins og að bílstjóri á leiðinni frá Reykjavík til Akureyrar myndi festa stýrið á stefnuna til Akureyrar og gera ekki ráð fyrir beygjum, brúm og gatnamótum  á leiðinni.

Aftur á móti er ég algerlega sammála þér að góð samvinna þarf að vera á milli þingflokks og stjórnar/félagsmanna þó að stundum geti verið erfitt að skipuleggja slíkt þegar mikið gengur á

[Jón Kristófer Arnarson, 7.8.2009 kl. 22:48]

Hér takast á tvær grundvallar-hugsjónir, annarsvegar að þingfólk skuli vera ábirgt gagnvart stuðningsfólki sínu og ályktunum þess og hins vegar að þeir skuli vera frjálsir og aðeins bundnir samvisku sinni hverju sinni í hverju máli.

Ég held að þetta sé mikið til í þessu Svanur.  En ég tel að góður stjórnmálamaður (og reyndar allir þeir sem stunda félagsstörf eða bara mannleg samskipti) fari báðar þessar leiðir.  Það tekur ákvarðanir samkvæmt sinni samvisku en sú samviska mótast ekki bara af hitastigi á heilasellum þá stundina heldur einnig af því sem samstarfsmenn og samherjar hafa fram að færa. 

Góður stjórnmálamaður hlýtur að hafa betri samvisku í atkvæðagreiðslu ef hans afstaða er í samræmi við stefnu flokksins og þeirra hreyfingar/flokks sem hann starfar í umboði fyrir.  Ef upp kemur ágreiningur um stefnu eða afstöðu þá er reynt að komast að sameiginlegri niðurstöðu.  Þannig sé ég fyrir mér að stjórn og þinghópur Borgarahreyfingar ættu að vinna saman og þannig er unnið í öllu góðu félagsstarfi.