"Ég nenni þessu ekki lengur"

Ég skrapp í dag niður á Austurvöll, aðallega til að forvitnast um hverjir væru þar mættir til að mótmæla og hverju þeir væru að mótmæla. Sá litli hópur  mótmælenda sem þarna var mættur til að berja og blása var heldur sundurleitur.

Ég hlustaði t.d á tvo mótmælendur standa í hvössum orðahnippingum um hvort réttara væri að leysa upp Borgarahreyfinguna eða Samfylkinguna. Síðan reyndi þekktur andstæðingur ESB að espa fámennið til að hrópa í takt gamla slagorðið "óhæf ríkisstjórn". Það tókst illa.

Það má segja að andi þessara mótmæla í dag hafi krystallast í orðum eins ötulasta mótmælenda síðasta vetur. Þegar hann gekk í burtu heyrði ég hann segja;  - "Ég nenni þessu ekki lengur". - Heiðarlegur eins og venjulega.-

Miklu fleiri af þekktum mótmælenda-andlitum sátu kaffihúsunum í kringum völlinn og skeggræddu um landsins gagn og nauðsynjar. Þeim virtist vera ljóst að það sem var að gerast inn í þinghúsinu var eitt stórt sjónarspil. Það er löngu búið að ákveða að Icesave samningarnir verða samþykktir. Að láta sem um það sé einhver ósvissa er bara æfing í fánýtileika. Í mesta lagi verða settar við hann einhverjar viðbætur um upptökuþætti til að reyna að réttlæta sýndarmennskuna fyrir þjóðinni.

Það læddist að mér sá grunur að þeir sem standa í mótmælunum viti þetta líka og þau séu orðin hluti af sjónarspilinu.

Athugasemdir

[Rómverji (IP-tala skráð) 24.7.2009 kl. 20:50]

"Vanhæf ríkisstjórn"

[Svanur Gísli Þorkelsson, 24.7.2009 kl. 21:15]

Líkalega var það "vanhæf" ríkisstjórn Rómverji.

[Anna Sigríður Guðmundsdóttir, 24.7.2009 kl. 22:20]

Ríkisstjórn verður fyrst nothæf þegar almenningur stendur með henni.

[Kolbrún Hilmars, 24.7.2009 kl. 22:58]

Sæll Svanur, ég settist við næsta borð við þitt á veitingastaðnum í dag - og get því staðfest að þú varst við Austurvöllinn - og hefur eflaust rétt fyrir þér að öðru leyti.. 

Ég efast þó um að mitt hafi verið eitt af þessum þekktu "mótmæla-andlitum" sem þú nefnir, né heldur föruneytis míns sem spannaði fjórar kynslóðir.   En vonbrigðin yfir áhugaleysinu fyrir mótmælunum hafa eflaust endurspeglast í hverju andliti 

[Lára Hanna Einarsdóttir, 24.7.2009 kl. 23:00]

Svo þú ert hér enn, Svanur. Fékkstu ekki tölvupóstinn frá mér á þriðjudaginn? 

[Tómas Ibsen Halldórsson, 24.7.2009 kl. 23:26]

Hvers vegna komstu ekki og slóst potta og pönnur með okkur hinum ?  Þú ert ekkert of góður til þess að sitja bara hjá og horfa á aðra leggja sitt á vogaskálarnar.  Ég var þarna og verð að viðurkenna að ekki vorum við mörg, fleiri mættu koma og slást í hópinn, ekki veitir af.

[Sigurður Þórðarson, 25.7.2009 kl. 13:00]

Kaldhæðin lýsing en líklega trúverðug.

 Ég velti fyrir mér framhaldinu í farsanum

Er svikalogn á Austurvelli? Verður Steingrímur næsti formaður Samfylkingarinnar?  Munu Ísþrælar flýja land eftir 7 ár? Eða mun olía finnast út af NA- landi og hleypa af stað nýrri gullöld?

[Magnús Sigurðsson, 25.7.2009 kl. 15:24]

það var orðið fyrir löngu ljóst að "flokkurinn" er fyrir löngu búin að ákveða niðurstöðuna, en leikritið á Alþingi snýst um að finna leiðir fyrir hvern og einn til að halda andlitinu. 

Hjá þessu liði snýst þetta fyrst og fremst um að halda sér á launaskrá hjá skattgreiðendum. 

[Sigurður Snæberg Jónsson (IP-tala skráð) 25.7.2009 kl. 15:45]

Þú ættir að lesa yfir fyrirsagnirnar þínar, viljirðu teljast marktækur!

[Styrmir (IP-tala skráð) 25.7.2009 kl. 17:10]

Er bara hræddur um að við séum orðin algjörlega buguð. Var mikið að taka þátt í þessum mótmælum en er bara búinn að gefast upp. Held því miður að þetta sé einfaldlega búið !!

[Offi (IP-tala skráð) 25.7.2009 kl. 17:45]

Fyrirsögnin þín endurspeglar líka á vissan hátt orð forystumanns íslensku samninganefndarinnar, sem hreinlega nennti ekki meiru: „Ég var nú eiginlega bara orðinn leiður á því að hafa þetta hangandi yfir mér“ sagði Svavar og hló.

Það besta er að það var Svavar Gestsson sjálfur sem fann upp þessa "snilldarlausn" með Icesave. Það tók hann langan tíma að koma bretum og hollendingum í skilning um hana, að eigin sögn. Það var gott að það tókst á endanum, áður en lögfræðikostnaður bretanna rauk upp úr öllu valdi, en aðalatriðið er að Svavari stúdent tókst að plata breta og hollendinga til að láta okkur borga brúsann!

Svavar ætti að sjá um kjarasamningana fyrir ríkisstarfsmenn. Þeir enda á því að greiða með sér í ríkissjóð, sem fyrir vikið réttir úr kútnum á mettíma.

[Axel Þór Kolbeinsson, 25.7.2009 kl. 20:01]

Það er merkilegt miðað við hversu heitt fólk tjáir sig um málefnið, og það að skoðanakannanir sýni andstöðu allt að 70% þjóðarinnar að samt mæta ekki nema í kring um 100 manns á landsvísu til að mótmæla.

Ég var bjartsýnn fram yfir klukkan fimm að fleiri færu nú að koma, en klukkan sex var ég nánast búinn að missa alla trú á þessa þjóð.  En umferðin austur yfir Hellisheiði var jafn þung og hún hefur verið undanfarin sumur.

[runar (IP-tala skráð) 25.7.2009 kl. 20:12]

Málið er, Svanur, að síðust mótmælum var leikstýrt !! Líklega af VG (veit það ekki) en öflug mótmæli þurfa öflugt bakbein, verkalýðsfélög, stjórnarandstaðan, etc... annars eru þau andvana fædd !!

Því miður.

[Óskar Þorkelsson, 27.7.2009 kl. 12:40]

Ég mótmælti frá Thorvaldsens.. en ég vissi ekkert hvað fólk var að mótmæla þarna hinum megin á austurvelli..