Fuglar sem byggja og búa í þorpum

Á Norður-Höfða Suður-Afríku er að finna kyndugan smáfugl sem ég veit ekki hvort á eitthvað íslenskt heiti. Á ensku er hann kallaður Sociable Weaver  og á  latínu Philetairus socius. Nafnið er gefið fuglinum vegna þess háttar hans að vefa sér hreiður og bústaði í félagi við aðra fugla af sömu tegund. Íslenska nafnið mætti því alveg vera "Félagsvefari".

"Félagsvefarinn" er svo sem ekki mjög merkilegur á að líta. Það sem gerir hann verulega frábrugðin öðrum fuglum er að hann býr sér svo stóran bólstað að allt að 300 fuglar geta hafst þar við. Í raun vefa fuglarnir sér einskonar fuglaþorp í greinum trjáa, sem hvert hefur í kringum 50 íbúðir og jafn margar dyr.

Þorpið getur verið allt að eitt tonn á þyngd, 40 fermetrar í rúmmál og dæmi eru til um að tréð hafi sligast undan þunga þorpsins og brotnað.  Að neðan verðu liggja inn í þorpið göng sem gerð eru úr stífum stráum sem liggja öll inn á við til að gera snákum og öðrum óvinum erfitt fyrir að komast inn í þorpið.

Hver íbúðarhola er hnefastór og fóðruð með mjúkum stráum og hárum. Yfir þorpið reisa fuglarnir vatnshelt þak þannig að í þorpsholunum er ætíð þurrt.

Allt árið í kring erfiða "Félagsvefararnir" við að byggja, bæta og breyta bústöðum sínum. Þessi óvenjulegu en þægilegu hýbýli laða gjarnan að aðra fugla þannig að vefararnir eru sjaldnast einir í þorpunum. Þar má sjá bæði smá-fálka jafnt sem rauðhöfðaðar finkur á ferli.

Athugasemdir

[Lára Hanna Einarsdóttir, 13.4.2009 kl. 13:44]

Merkilegur fugl.

Í  Dýra- og plöntuorðabók Óskars Ingimarssonar (útg. 1989) er þessi fugl einmitt kallaður félagsvefari.

Þar er hins vegar líka annar fugl, sociable plover (lat.: Vanellus gregarius) sem nefndur er upp á íslensku steppuvepja.

[Sigga MacEachern (IP-tala skráð) 13.4.2009 kl. 15:55]

Ég þakka fyrir þetta, hef mikinn áhuga á öllu í dýraríkinu, sérstaklega fuglum. Hef aldrei heyrt um þennan fyrr, né svona hegðun. Alltaf gaman að læra eitthvað nýtt.

Kveðja frá Prince Edward Island

[Svanur Gísli Þorkelsson, 13.4.2009 kl. 16:10]

Gaman að heyra frá Prince Edward Island, home of Anne of Green Gables og núna greinilega Siggu líka. Þegar ég átti heima í Bedford Nova Scotia kom ég nokkrum sinnum til PEI og fannt eyjan dásamleg.

Lára Hanna; Ég hef þá farið ansi nálægt þessu í þýðingunni enda kannski ekki í mörg horn að venda :) Takk fyrir það.

[Mofi, 13.4.2009 kl. 21:25]

Mjög skemmtilegt. Gaman af sköpunarverkum Guðs :)

[Brattur, 13.4.2009 kl. 21:44]

Takk fyrir þetta... ég hef mjög gaman af fuglum... margir þeirra boða vorkomuna á Íslandi... og svo minna þeir mann á frelsið þegar þeir fljúga um loftin blá...

[Ingo (IP-tala skráð) 14.4.2009 kl. 10:05]

Það var aðeins sagt frá þessum fuglum í þáttunum hans David attenborough. Sem voru sýndir á ríkissjónvarpinu fyrir mörgum árum.

 þar var sýnt frá fugli sem maðurinn hefur samskipti og fuglin aðstoðar mannin að finna hunang og maðurinn nær í hunangið.

Hérna er slóðinn

http://www.youtube.com/watch?v=SN5igku_kGk

kveðja Ingó

[Lára Hanna Einarsdóttir, 14.4.2009 kl. 20:59]

Þú fórst ekki bara nálægt þessu heldur hittirðu rækilega naglann á höfuðið - miðað við orðabók Óskars og hann var manna fróðastur um þýðingar á dýra- og plöntuheitum á Íslandi.

Hitt er svo annað mál, og þess vegna nefndi ég hinn fuglinn, að Óskar (eða sá sem það gerði annar) virðist hafa valið íslenskt heiti út frá latneska nafninu frekar en hinu enska sbr. nöfnin á þessum tveimur fuglum. Þetta hef ég orðið vör við með önnur heiti í bók Óskars.