Góðar húsreglur

Ég var nýlega á ferð um Cornwall og borðaði hádegismat á krá sem hefur verið starfrækt óslitið frá því snemma á átjándu öld.

 Kráin stendur í þorpinu Portloe og er nú úr alfaraleið en var áður samkomustaður smyglara, vegamanna og sjó og námumanna þar um slóðir í 300 ár eða meir.

Á skilti í anddyrinu voru letraðar húsreglur krárinnar sem voru dagsettar árið 1786 og hljóðuðu svona;

Enga þjófa, fakíra, rudda eða farandsala.

Enga skuggalega skálka og iðjuleysingja eða flóbitna flækinga.

Bannað er að skella á rass kvenna eða kitla þær. Bannað er að slá krepptum hnefa á borðin eða skella niður á þau könnum.

Engir hundar eru leyfðir í eldhúsinu né hanaat hvar sem er í húsakynnunum.

Byssuhólka, framhlaðninga, kylfur, rýtinga og sverð skal afhenda gestgjafa til varðveislu á meðan að dvöl eigenda þeirra á kránni stendur.

Rúm yfir nótt 1. Skildingur

Hirðing og hýsing hests 4. Pence.

Athugasemdir

[Sigrún Jónsdóttir, 30.12.2008 kl. 20:50]

Góðar siðareglur  Hefur verðið eitthvað hækkað?

[Marta Gunnarsdóttir, 30.12.2008 kl. 20:54]

Heillandi húsreglur og gaman af þeim og myndin er líka heillandi. Staðurinn virðist vera mjög notalegur.

[sigurvin (IP-tala skráð) 30.12.2008 kl. 21:15]

Þessar gömlu ensku krár eru alveg einstakar. Reyni alltaf af heisækja eina slíka þegar ég er Í Englandi, ótrúlega mikið til af svona gömlum krám. Fyrir nokkrum árum fór ég á eina svona krá. Þar var draugur, eins og í öllum hinum. En þegar þessi draugr sást, var það aðeins fyrir ofan mitti. Það var svo oft búið að hækka gólfið.

[Þórdís Bára Hannesdóttir, 31.12.2008 kl. 12:32]

Keyrði um suður England í sumar sem leið, fyrir ,,falið" þá þegar maður enn gat borið höfuðið hátt yfir því að vera Íslendingur. Frábært sumarfrí. Svo fallegt og rómantískt á Englandi, svo grænt og gróðursælt.

[Svanur Gísli Þorkelsson, 31.12.2008 kl. 13:27]

Eitthvað hefur verðið jú hækkað Sigrún  alla vega fyrir hestana.

Takk fyrir söguna Sigurvin og athugasemdina Marta.

Þessi Íslendingaskætingur í Bretum er mikið að sjatna Þórdís. Ef ég verð var við hann svara ég fullum hálsi og spyr hvenær þeir séu að hugsa um að losa um eignir íslenska ríkisins hér í landi þar sem allir séu þegar búnir að fá greitt það sem þeir áttu inni hjá Icesave. Það verður yfirleitt fátt um svör.

[itg (IP-tala skráð) 31.12.2008 kl. 15:43]

Það er ekkert annað en frábært en að þvælast á milli svona öldurhúsa með skemmtilegar heimildir í farteskinu um viðkomandi svæði.

[Kolbrún Hilmars, 31.12.2008 kl. 18:02]

Kæri Svanur.  Ég sendi þér mínar bestu óskir um farsælt og ánægjulegt nýtt ár og þakka þér fyrir frábæra og fræðandi pistla á árinu sem er í þann veg að ljúka . 

[Máni Ragnar Svansson, 31.12.2008 kl. 18:20]

Ég vil bara óska þér Árs og Friðar Svanur   og þakka þér fyrir allar greinarnar þínar á þessu ári.  Þessi grein minnir mig á Gulleyjuna eftir Robert Louis Stevenson og Langa John Silver þann skuggalega sjóræningja og skálk og upphaf sögunnar sem átti sér stað að mig minnir einhversstaðar þarna á S-Englandi.  Mér finnst reyndar að leyfa ætti hanaat á Íslenskum krám eða kannski glímu ?  En njóttu friðsældar og friðar á nýju ári og lifðu heill og glaður

[sigurvin (IP-tala skráð) 1.1.2009 kl. 08:22]

Gleðilegt ár! Svanur og þakka þér fyrir allan fróðleikinn og skemmtilegu færslurnar á árinu.

[Guðbjörg Erlingsdóttir (IP-tala skráð) 1.1.2009 kl. 12:17]

Gleðilegt ár og takk fyrir allan fróðleikinn og skemmtilegheitin á liðnu ári !

kær kveðja,

[Svanur Gísli Þorkelsson, 1.1.2009 kl. 13:40]

Mikið rétt itg.

Þakka sömuleiðis Kolbrún, Máni, Sigurvin og Guðbjörg.

Máni, glíma væri góð og þjóðleg og gæti orðið karlægt mótvægi við fegurð kvennfólksins eins og hún er auglýst er í ferðapésum.

[Svanur Gísli Þorkelsson, 1.1.2009 kl. 13:41]

karllægt átti þetta að vera, enda þótt karlægt sé einnig möguleiki :=)