Falsað silfurmen og ráðagóðir munkar

Fyrir all-nokkrum árum fannst lítið silfurmen í grafreit nokkrum,  þegar tekið var fyrir húsgrunni nálægt fornrómversku þorpi sem heitir Shepton Mallet og er hér í Somerset á Bretlandi.

Menið þótti minna um margt á annað men sem grafið var upp í Sussex fyrir meira en 100 árum og er geymt á þjóðminjasafninu í London. Menið frá Shepton Mallet er með áletruninni ´ChiRho' sem er forn kristið tákn fyrir nafn Krists og er samsett úr fyrstu tveimur stöfum nafnsins hans á grísku sem eru svipaðir X og P í okkar stafrófi.

Eftir nokkrar rannsóknir Breska Safnsins (The Bristish Museum) á meninu var það lýst elsti "kristni" munurinn sem fundist hefur á Bretlandseyjum og gröfin elsta kristna gröfin sem fundist hefur í Evrópu. Erkibiskupinn af Canterbury; Lord Carey lét smíða eftirlíkingu af meninu (nema að hún var tvöfalt stærri) og skartaði því við öll tækifæri í skrúða sínum. Hann gerði síðan menið að tákni embættis síns.  

Þorpsbúar létu ekki á sér standa og auglýstu þennan fund hvað þeir gátu og brátt fóru að streyma pílagrímar til staðarins.

Nú hefur komið í ljós eftir nákvæmari rannsóknir á meninu að silfrið, sem það er gert úr, er frá 19. öld.

Menið er sem sagt falsað.

Ekkert er vitað um hver falsarinn er eða hvað fyrir honum vakti en ágiskanir hafa heyrst um að hann hafi e.t.v. viljað koma í veg fyrir að verksmiðjuhúsnæði það sem nú stendur á staðnum, yrði byggt.

Auðvitað er Biskupinn miður sín yfir þessum tíðindum og íbúar Shepton Mallet segja að "töfrar staðarins hafi horfið".

Satt að segja minnir þetta atvik um margt á fund munkanna í Glastonbury árið 1190. Svo illa vildi til að klaustur þeirra brann til kaldra kola árið 1184 ásamt öllum helgimunum og safni líkamahluta af dýrlingum sem þar voru varðveittir.  Tekjur klaustursins komu að stórum hluta frá pílagrímum sem greiddu vel fyrir blessun þeirra og fyrir að fá að berja herlegheit þeirra augum. Þegar að munkarnir tóku grunninn að nýju klaustri vildi svo vel til að þeir fundu gröf Arthúrs konungs og drottningu hans Guinevere. Þetta vissu þeir af því að undir hellunni sem lá á gröfinni fundu þeir silfurkross með áletrunni Hic iacet supultus inclitus rex Arturius in insula Avallonis sem merkir "Hér liggur grafinn hinn frægi Atrhúr konungur, grafin á Avalon eyju."

Kross þessi var samt fljótur að hverfa og eftir stóð þessi teikning sem gerð var af honum.

Það er auðvitað óþarfi að taka það fram að Glastonbury varð strax og er enn, vinsælasti ákvörðunarstaður pílagríma í Bretlandi.

 

 

Athugasemdir

[Óskar Þorkelsson, 19.9.2008 kl. 17:09]

það er merkilegt hvað fólk ( mannkynið almennt) er viljugt til að trúa allskonar svona dóti.  Kathólska kirkjan er td með dýrðlinga og kraftaverk í hávegum og það þrátt fyrir að guð hafi skv biblíunni refsað fylgisveinum móse fyrir skurðgoðadýrkun :).. eða var það ekki svo 

[Svanur Gísli Þorkelsson, 19.9.2008 kl. 17:37]

Af og til hafa svo risið upp predikarar og viljað tæma kirkjurnar af skrautinu. Séra Martein var einn. En mér sýnast Óskar, fylgjendur hans í dag ekki taka mikið mark á þeirri boðun. - Kaþólikkar hafa nú alltaf glysgjarnir verið þegar að tilbeiðsluhúsunum kemur. Ég veit ekki hvor Baalisminn er meiri að fá borgað úr ríkissjóði fyrir að veita sakramentin eða taka við fórnargjöfunum beint úr hendi almúgans.

[Skattborgari, 20.9.2008 kl. 01:08]

Það er til ótrúlega mikið af fólki sem er til í að taka allt svona trúarlegt án þess að það sé búið að sanna það með nokkuri vissu.

Ég trúi aldrei neinu nema það sé hægt að sanna það með nokkuri vissu því að það eru svo margir sem nota svona lagað til að blekkja fólk.

Kveðja Skattborgari.

Ps er búinn að skrifa klukkið niður ef þú vilt lesa það hjá mér þar sem að þú klukkaðir mig.