Bankararnir í Cornwall

Um þessar mundir er ég staddur í Cornwall, sem er suðvestur hluti Bretlands. Hér er ströndin ögrum skorin og þorp eða bær við hverja vík. Sjóræningjar og smyglarar tengjast sögu hverrar kráar hér um slóðir en nú eru þær fullar af ferðamönnum enda Cornwall vinsæll ferðamannastaður á sumrum. Hér var fyrrum blómleg útgerð og námuvinnsla. Mest var unnið tin úr jörðu og ku saga námuvinnslu hér teygja sig aftur um árþúsundir, frekar en hundruð, eða allt frá því að Fönikíumenn sigldu hingað í leit að málminum sem notaður er til að búa til brons. Bretland var þá meira að segja kallað Cassiteriades eða Tin-Eyjar af Grikkjum og öðrum þeim sem bjuggu fyrir botni Miðjarðarhafsins. -

Í tengslum við námuvinnsluna urðu til margar þjóðsögur og hjátrú sem enn lifir meðal íbúa Cornwall, þar á meðal trúin á verur sem kallaðir eru upp á enskuna "Knockers".

Knockers eða bankarar eru taldir frumbyggjar landsins sem voru hér fyrir þegar að Keltar komu yfir sundið frá Frakklandi. Bankararnir unnu í námunum og voru samskipti við þá góð eða slæm eftir því hvernig komið var  fram við þá. Bankarar voru að sjálfsögðu ósýnilegir nema að þeir vildu sjálfir gera sig sýnilega og minna reyndar um margt á jarðálfa eða jafnvel svartálfa. Þeir gátu verið hrekkjóttir en ef þess var gætt að halda þeim ánægðum þóttu þeir til lukku.

Ein sagan af samskiptum manna og Bankara segir af námumanninum Tom Trevorrow. Hann hóf að grafa í námu sem talin var snauð af tini en kom brátt niður á æð sem hann vissi að gæti gert hann ríkan. Brátt heyrir hann kveðið innan úr grjótinu.

"Tom Trevorrow! Tom Treverrow!

Leave me some of thy fuggan for Bucca.

Or bad bad luck to thee tomorrow.

"Fuggan" er hefðbundið nesti námumanna í Cornwall, einskonar kaka gerð úr höfrum og svínafeiti og Bucca er annað orð yfir bankara og dregið af enska orðinu "puck" eða pjakkur. - Tom virti bankarana ekki viðlits og þegar þeir mæltu aftur voru þeir ekki eins vinsamlegir.

"Tom Trevorrow! Tom Treverrow!

We´ll send thee bad luck tomorrow,

Thou old curmudgeon, to eat all thy fuggan

And leave not a didjan for Bucca.

"Curmudgeon" merkir gamall illskeyttur karl og "didjan" smábiti eða moli.-

Þegar að Tom kom að námunni næsta dag hafði orðið mikið hrun í henni og öll tól hans oig tæki grafin undir.  Óhepnni virtist elta hann eftir það og hann varð á endanum að hætta námuvinnslu og gerast vinnumaður á bóndabæ. 

Kveðja frá Cornwall.

Athugasemdir

[Jenný Anna Baldursdóttir, 1.9.2008 kl. 10:10]

Takk fyrir þetta.  Þú ert ótrúlegur fróðleiksbrunnur minn kæri bloggvinur.

[Lára Hanna Einarsdóttir, 1.9.2008 kl. 10:56]

Tek undir með Jennýju. Skemmtileg saga og gaman að heyra um hjátrú Breta. Kanntu ekki fleiri svona sögur?

Ég var í fríi á Cornwall fyrir 9 árum, gisti í Penzance og ferðaðist um skagann þveran og endilangan. Þarna er geysilega fallegt, við vorum heppin með veður (20-25 stiga hiti og mestanpart sól í ágúst).

Einna flottast fannst mér Minack-útileikhúsið og ég hef hvatt alla sem fara um þessar slóðir að skoða það. Einhvern tíma ætla ég að sjá leiksýningu þar.

[Snjólaug A. Sigurfinnsdóttir, 1.9.2008 kl. 10:57]

Úff ég sé þig fyrir mér á þessum slóðum og þú vekur sannarlega upp forvitni hjá mér að heimsækja þær. Takk fyrir allar sögurnar þínar þú ert duglegur að koma þeim áfram.

kveðja

[alva (IP-tala skráð) 1.9.2008 kl. 11:56]

takk :)

[Hólmdís Hjartardóttir, 1.9.2008 kl. 11:58]

alltaf jafngaman að lesa hjá þér

[Rut Sumarliðadóttir, 1.9.2008 kl. 12:17]

Bank,bank

[Svanur Gísli Þorkelsson, 1.9.2008 kl. 21:00]

Takk fyrir athugasemdirnar allir.

Lára Hanna; Er einmitt á leið í Minack á War of the worlds :=)

[Lára Hanna Einarsdóttir, 1.9.2008 kl. 21:02]

ÖFUND !    Góða skemmtun!