Smáhestarnir á Dartheiði

Íslendingum finnst heldur óviðeigandi þegar þeir heyra enskumælandi fólk kalla íslenska hestinn "pony." Hér í suðvesturhluta Englands er að finna smáhesta-kyn á stærð við það íslenska og er það kennt við Dartmoor. Ekki  dettur nokkrum manni í hug að kalla þá "hesta" og eru flestir hreyknir af því að geta enn kallað þá "Ponies". 

Í grennd við Dartmoor (heiðlendi) voru  fyrrum miklar tinnámur og voru Dartmoor smáhestarnir sérstaklega ræktaðir á miðöldum til að bera þungar klyfjar úr námunum. Námurnar voru pyttir og það þurfti smá og um leið harðger burðadýr til að komast upp úr pyttunum með þungar byrðar. Á árunum 1789 - 1832 reyndu menn að gera kynið enn smávaxnara með því að blanda kynið smáhestum frá Shettlandi með það fyrir augum að búa til hinn fullkomna pytthest.

Eftir að námurnar lögðust af voru hestarnir nokkuð notaðir við bústörf en flestum var sleppt lausum á heiðina. Á síðustu öld blönduðust Dartmoor smáhestarnir allmikið öðru kyni, þar á meðal Fell-smáhestum sem eru frá Norður Englandi og jafnvel arabísku og welsku blóði.

Eftir að heimstyrjöldinni síðari lauk jókst áhuginn á þessu sérstaka smáhestakyni en þá var svo komið að afar fáir hestar fundust sem talist gætu óblandaðir. Upp úr 1950 fór þeim samt aftur að fjölga og eru nú taldir vera um 5000 talsins.

Dartmoor smáhestarnir eru svipaðir á hæð og þeir íslensku (11.1-12.2 hh) og eru bleikir, brúnir, svartir eða gráir á lit.

Taminn er hann einkum notaður sem æfingahestur fyrir börn en einnig af fullorðnum til veiða og útreiða.

Athugasemdir

[Óskar Þorkelsson, 20.8.2008 kl. 16:51]

það væri hægt að gabba mig með þessum hest og segja hann vera af Kirkjubæjarkyni :)

[Árni Gunnarsson, 20.8.2008 kl. 17:01]

Tek undir með þér Óskar. Þessi litur er ekki ólíkur grunnlit Kirkjubæinganna. En þessir hestar eru án vafa mikið skyldir íslenska hestinum enda vel skiljanlegt. Það gefur auga leið að landnámsmenn hafa valið smáa hesta til flutnings yfir hafið. Og fátt sýnist mér líklegra en að bæði norski smáhesturinn sem nú er aðeins til á einangruðu svæði þar, sem og hestar frá Hjaltlandseyjum og jafnvel víðar að hafi svo blandast hér. Og blandast alveg meistaralega.