"I have been a bad boy"

Í gær hitti ég heimsfrægan hljóðfæraleikara og átti við hann orðastað. Hann heitir Ronnie Wood og spilar á gítar með félögum sínum í sveitinni Rolling Stones. Þannig var mál með vexti að ég tefli skák einu sinni í viku á einu á kaffihúsinu hér í Bath. 

Sá sem ég tefli við var eitt sinn "suð-vesturlands" meistari hér í Englandi. En það segir í sjálfu sér ekkert um styrkleika hans því Englendingar hafa aldrei haft orð á sér fyrir að vera snjallir skákmenn frekar enn að þeir geti spilað handbolta. Eiginlega eru þeir ekki góðir í íþróttum nema þeim sem þeir hafa fundið upp sjálfir, eins og fótbolta, Krikket og Rugby: 

Við næsta borð á kaffihúsinu sátu tveir menn að spjalla. Ég kannaðist við annan þeirra, írskan skartgripasala sem stundar þetta kaffihús mikið. Hinn var lítill og pervisinn eldri maður með svart litað hár sem var klippt eins og Rod Stewart hafði það í gamla daga. Hann var klæddur eins og unglingur, í þröngar svartar gallabuxur, í eldrauðum bol, svörtum jakka og í rauðum strigaskóm. Fötin vor greinilega ný. Andlitið var rúnum rist og leðurbrúnt og minnti mig á andlit gamalla indíána frá norður Ameríku.

Ég vissi að ég átti að þekkja þennan mann en ég kom honum ekki strax fyrir mig. Þegar hann stóð upp og skrapp á salernið, notaði ég tækifærið til að spyrja skartgripasalan hver hann væri. Jú, þetta er Ronnie Wood sagði hann.

Hér hafa blöðin verið uppfull af fréttum um að Ronnie væri týndur og hefði stungið af eftir að myndir náðust af honum í félagi við unga stúlku.

Þar sem félagi minn var ókominn færði ég mig yfir á borðið hjá Íranum og þegar Ronnie kom til baka tókum við að spjalla.

Hann sagðist vera nýkominn frá Írlandi, hefði flogið til Bristol þá fyrr um morguninn. Hann sagðist eiga litla íbúð í grenndinni og hann væri á leiðinni þangað.

Hann spurði mig hvort ég væri Hollenskur. - Nei Íslenskur.

Vá, svalt (Cool) svo hló hann eins og hann væri fyrsti maðurinn sem hafði sagt þennan brandara.

Hvað ertu að gera hér, spurði hann. Búa til tónlistarvideo, svaraði ég. Hefurðu búið til video fyrir einhverja fræga? - Já Frans Ferdinand, svaraði ég. 

Hefurðu komið til Íslands spurði ég.-  Já það held ég, flott land.

Þekkirðu einhvern á Íslandi.

Já, ég hef hitt Björk.

Hvað varstu að gera á Írlandi?

Hann brosti. "Ég er búinn að vera slæmur strákur".

Fyrir framan hann á borðinu hafði hann raðað smámunum upp úr vösum sínum. Ipot, sími, tóbaksumslag, pappírshylki. Hann byrjaði að vefja sér sígarettu, þrælvanur greinilega.

Viltu reykja, spurði hann.

Nei, takk ég er nýhættur. Annars reykti ég bara vindla. -

Þú getur alveg fengið vindil sagði hann. Nei takk.

Ég virti hann fyrir mér. Undarlegt hvernig frægt fólk sem maður er margbúinn að sjá á myndum og í sjónvarpi, virkar þar miklu stærra en það er í raunveruleikanum. Írinn var að tala í síma á meðan ég spjallaði við Ronnie.

Síminn á borðinu hringdi. Rionnie leit á númerið og ákvað að svara. Þetta var einhver nákominn að spyrja hvort allt væri í lagi með hann og hvar hann væri.

Nú birtist skákfélagi minn svo ég stóð upp. Ronnie stóð upp líka, setti dóttið sitt í jakkavasana,  tók í höndin á Íranum og mér og skundaði á braut.

Athugasemdir

[Júlíus Valsson, 16.7.2008 kl. 11:44]

Cool!
Maður er bara alveg mát!

[Edda Agnarsdóttir, 16.7.2008 kl. 11:47]

Ef þetta er ekki krúttasaga þá veit ég ekki hvað...

[Vilhjálmur Örn Vilhjálmsson, 16.7.2008 kl. 11:59]

Vá... nú á ég ekki orð. Hann hefur ekki verið með rússnesku kokkteiltæluna með sér í Baði?

[Hólmdís Hjartardóttir, 16.7.2008 kl. 12:27]

[Svanur Gísli Þorkelsson, 16.7.2008 kl. 13:04]

Nei Vilhjálmur :)

[Gulli litli, 16.7.2008 kl. 13:56]

Svalt...

[Hrafnhildur Ýr Vilbertsdóttir, 16.7.2008 kl. 14:09]

Vá frábært...og alveg í þínum anda að tækla þetta af æðruleysi og með stæl..

[Ólína Kjerúlf Þorvarðardóttir, 16.7.2008 kl. 14:28]

Vóóóó ... nú yrði bóndi minn grænn af öfund ef hann læsi þessa færslu, hann er forfallinn Stones-aðdáandi.

Ég hef stundum farið með honum á tónleika með þeim - síðast í O2 höllinni í London í fyrra. Þeir voru þrusugóðir.

Gaman að fá þig fyrir bloggvin.

[Svanur Gísli Þorkelsson, 16.7.2008 kl. 20:05]

Takk fyrir innlitið og athugasemdirnar gott fólk og sömuleiðis Ólína :)

[Jenný Anna Baldursdóttir, 16.7.2008 kl. 22:36]

Vá þetta slær allar selbitasögur út af borðinu.

Ógeðslega kúl, þú mitt í hringuðinni og heimurinn stendur á öndinni út af karlinum.

[Snorri Bergz, 17.7.2008 kl. 11:12]

Ekki vissi ég að þú værir með skákbakteríu?

[Sigrún Jónsdóttir, 17.7.2008 kl. 13:15]

Færslan er ferlega svöl.  Bath er falleg borg og svo ólík öðrum borgum Englands.  Bestu Núpsverjakveðjur.

[Jóna Á. Gísladóttir, 17.7.2008 kl. 14:05]

ég er svo hallærisleg að ég hló að brandaranum. Cool. Hef aldrei heyrt hann áður. Í alvöru!

Svo sannarlega lítur maðurinn út eins og indíáni.

[Svanur Gísli Þorkelsson, 17.7.2008 kl. 14:13]

Já, Snorri, maður mæðist í mörgu :)

Sigrún mín; Þú hefur ekkert breyst nema að þetta sé gömul mynd af þér, gaman að heyra frá þér :)

Jóna; Velkominn :)

[Svanur Gísli Þorkelsson, 17.7.2008 kl. 14:15]

Kæra Jenný, takk fyrir að auglýsa "skúbbið". Eiginlega áttaði ég mig ekki á því að þetta væri skúbb fyrr en þú sagðir það :

[Lára Hanna Einarsdóttir, 17.7.2008 kl. 14:38]

Þú verður eiginlega að blanda þér í umræðuna á blogginu hennar Jennýjar... Þar er verið að skipuleggja nánustu framtíð þína með innrás í huga! 

[Lilja Guðrún Þorvaldsdóttir, 17.7.2008 kl. 15:23]

Þetta er sko frábær saga.

[Svanur Gísli Þorkelsson, 17.7.2008 kl. 15:56]

Sveinn; Ég var nú bara að tala í hálfkæringi. Short var auðvitað frábær og einnig Adams.

[Jenný Anna Baldursdóttir, 17.7.2008 kl. 16:09]

Svanur: Nú er að vopnast, þú ert fyrirfram aðvaraður, vér erum á leiðinni.

[Svanur Gísli Þorkelsson, 17.7.2008 kl. 16:15]

Komdu fagnandi Jenný mín með eins marga og þú getur dregið með þér á alvöru Bloggblót í Bath.

[Lára Hanna Einarsdóttir, 17.7.2008 kl. 16:22]

Bloggblót í Bath...  líst vel á það. Við leigjum rútu, stelpurnar - ef einhver fæst til að keyra vitlausu megin!

[Svanur Gísli Þorkelsson, 17.7.2008 kl. 17:02]

Lára; Nóg af hvorutvegja, rútum og bílstjórum að hafa hér. (Er með rútupróf sjálfur :)

[Þórarinn Ólafsson (IP-tala skráð) 18.7.2008 kl. 00:46]

Sæll Svanur, 

Skemmtileg saga. Gaman að sjá þig þó á vefnum sé.

kv. bestar

  Tóti

[Svanur Gísli Þorkelsson, 18.7.2008 kl. 02:04]

Sæll Tóti og takk fyrir inlitið. Og aftur á móti, gaman að heyra aðeins frá þér. Bið að heilsa fjölsk :)

[Svanur Gísli Þorkelsson, 19.7.2008 kl. 19:25]

Það er aldeilis :)