Ljónynjan Amy Winehouse og "ábreiðurnar"

Það er líkast til orðið of seint að þræta fyrir það að Amy Winehouse hafi látist af völdum eiturlyfja, því vissulega er alkahól eiturlyf.

En eina "eiturlyfið" sem fannst í líkama hennar við krufningu var alkahól og það var í svo miklu magni að það leiddi hana til dauða.

Hún var svo þekkt fyrir að hafa dópað og djammað svo mikið,  lengst af ferli sínum,  að fólk gerir sjálfkrafa ráð fyrir því að hörð eiturlyf hafi stuðlað að dauða hennar.

Ég eyddi góðum hluta dagsins í að hlusta á nýju plötuna enda mikill Amy aðdáandi og er mjög ánægður með hana. Sérstaklega af því að öll lögin eru óskeytt og engin stafræn trix notuð til að setja saman gamlar og nýjar upptökur.  -  

En eitthvað segir mér að þetta verði ekki það síðasta sem við heyrum frá Amy, þar sem ógrynni af óunnu og auðvitað óútgefnu efni er til eftir hana.

Faðir hennar hefur nú stofnað minningarsjóð um hana sem styrkir heimili fyrir fötluð börn. Ágóðinn af tónlist Amy er sagðir renna að mestu til þessa minningarsjóðs.

Í þessari frétt um plötu Amy er aftur notað orðið "ábreiður" um cover lög, þ.e. lög sem einhver annar en Amy hefur samið og flutt áður. Þetta orð (ábreiða) virðist vera að festa sig í sessi í málinu sem er skelfilegt.

Getur ekki einhver lagt hausinn í bleyti og komið upp með almennilega þýðingu á þessu  orð fyrst fólk getur ekki haldið sig íslensku leiðina við að lýsa þessu fyrirbrigði?

Winehouse á topp breska vinsældalistans

Athugasemdir

[Jens Guð, 12.12.2011 kl. 01:38]

  Fyrir nokkrum árum voru innlit á stakt blogg á Moggabloggi 2000 ö 5000 á dag.  Þetta var þegar Jenný Anna,  Jóna Á. og fleiri vinsælir bloggarar tóku þátt í umræðunni á þessu vettvangi.  Þegar Davíð Oddsson varð ritstjóri Moggans færðu sig margir af vinsælustu bloggurum yfir á annan bloggvettvang.  Síðan hefur Moggabloggið ekki verið svipur hjá sjón.  Þrátt fyrir að vera besta bloggumhverfið.  Það er að segja hvað snýr að tónspilara,  tengingu við youtube, möguleika á letri og öðru slíku.  Á sínum tíma var mér boðið að verða DV-bloggari en þegar á reyndi stóðst það ekki samanburð við Moggabloggið.

  Lesendum Moggabloggs hefur þó fækkað og innlit hrunið í kjölfar þess að Davíð var ráðinn ritstjóri.

  Á meðan allt var í blóma óskaði ég eftir tillögum um íslenska þýðingu á "cover songs".  Fyrir voru brúkuð orð eins og ábreiður,  mottur,  tökulög,  kápur,  endurvinnsla og endurtökur.  Kannski einhver fleiri orð sem ég man ekki í augnabliki.

  Gallinn við flest þessi orð er að þau vantar sagnorðið.  Það hljómar ekki vel að ábreiða eða motta eða tökulaga.  

  Steini Briem stakk upp á orðinu kráku.  Það er ekki algott orð en mér hugnast það best.  Það vísar til hermikráku án þess að ganga alla leið.  Það hljómar líkt cover song.  Og það hljómar vel að lag sé krákað.  

[Jens Guð, 12.12.2011 kl. 01:40]

  Á tímabili var á Virkum morgnum á rás 2 dagskrárliðurinn "Bítlakráka" dagsins.  Það hljómaði vel.

[Svanur Gísli Þorkelsson, 12.12.2011 kl. 08:33]

Sæll Jens. Já, það er af sem áður var.

Kráka er miklu betra en ábreiða en nær samt ekki merkingu cover nema að takmörkuðu leit. Kannski verður bara að gefa orðinu aukamerkingar og vonast til að það festi sig í málinu með þeim.