Slátrunarsiðir Islam og Íslands

Í fréttinni er minnst á Halal slátrun, en þá er átt við allt það sem rúmast innan og er leyfilegt miðað við lög Íslam.

Þegar kemur að slátrun er notað  lagahugtakið Dhabīḥah sem tilheyrir íslamskri lögfræði.

Þau lög ná yfir það sem múslímar mega ekki leggja sér til munns og hvernig ber að slátra þeim skepnum sem þeir eta.

Dhabīḥah kveður á um að ekki skuli eta; dýrahræ, blóð, svínakjöt og allt það kjöt af skepnum sem slátrað hefur verið án þess að minnast hins eina sanna Guðs, nema kameldýra, engisspretta, fiska og flestra sjávardýra. Þessi lög eru byggð á fyrirmælum Kóransins í súru Al-Maidah 5:3

Dhabīḥah kveður á um að öll dýr (einnig fiskar) skuli stinga á með einni stungu á slagæðina á hálsinum og tæma dýrið á öllu blóði, enda er blóð með öllu bannað til matar. Meðan dýrinu er að blæða út má ekki meðhöndla það á neinn hátt. Aðferð þessi er kölluð Thabiha. Slátrun er álitin trúarleg athöfn og áður en stungið er á slagæðinni er þessi setning höfð yfir: "Í nafni Guðs, hins náðuga, hins miskunnsama."

Halal matvæli þurfa að uppfylla lög Múslima og eru Dhabīḥah lög þeirra á margan hátt svipuð lögum Gyðinga að því leyti að aðeins ákveðnar dýrategundir eru leyfðar og að þeim verður að slátra með ákveðnum hætti. Þess vegna eru Kosher matvæli gyðinga Halal (leyfileg).

Landbúnaðarráðuneytið leyfir dhabihah slátrun á Íslandi, svo lengi sem að dýrið sem er verið að slátra hafi verið svipt meðvitund með raflosti svo það finni ekki sársauka. Á Íslandi hefur sauðfé verið slátrað í litlum mæli með þessari aðferð fram að þessu.

Sauðfé er deytt með pinnabyssu eða svipt meðvitund með raflosti áður en það er stungið til að láta því blæða út.

Nautgripir og hross eru deydd með pinnabyssu. Aflífun sláturdýra með kúlubyssum er orðin mjög sjaldgæf vegna þess að sú aðferð er talin hættuleg fyrir starfsfólk og ætti alls ekki að nota hana.

Svín eru almennt deyfð með raflosti hér á landi. Rannsóknir hafa sýnt að aflífunaraðferð hefur áhrif á gæði svínakjöts. Víða erlendis, í stærri sláturhúsum, eru grísir deyfðir með koldíoxíði.

Alifuglar eru deyfðir með raflosti og deyddir með því að láta þeim blæða út eftir hálsskurð.


Hér á landi er ekki heimilt að skera dýr á háls við slátrun nema þau hafi fyrst verið deyfð eða deydd. Samkvæmt trúarsiðum strangtrúaðra múslima (halal slátrun) og gyðinga (kosher slátrun) má ekki aflífa sláturdýr áður en þau eru skorin á háls eða stungin til að láta þeim blæða út. Þegar notuð er haus – haus aðferð við raflostdeyfingu sauðfjár ranka kindurnar við sér aftur, ef þeim er ekki látið blæða út. Þessi aðferð uppfyllir kröfur íslenskra stjórnvalda um að sláturdýr séu meðvitundarlaus og finni ekki sársauka þegar þau eru hálsskorin og kröfur múslíma.

Fé slátrað að hætti múslima

Athugasemdir

[Ingi Þór Jónsson, 14.9.2010 kl. 11:52]

Sá heimildarmynd um mann sem var að leita að eins mannúðlegri aflífunar aðferð fyrir þau lönd sem yfir höfuð notast við þann valkost í dómstólum sínum.

Þessi maður var á móti dauðarefsingunni en ef hann gat ekki stoppað löndi í þessu vildi hann finna bestu aðferðina.

það sem hann komst að í sambandi við koldíoxíð er að dýr finna ekki fyrir köfnunartilfinningunni og líða bara útaf í sælu vímu. hann testaði þetta sjálfur með mann sér við hlið til að hann myndi ekki deyja.

Ég held að ef sláturhús tækju þetta upp væri þetta ábyggilega ekki verra en að fá skot í hausinn og rotast.

Einnig má benda á að sumir sérfræðingar halda því framm að rikkurinn sem dýrið deyr í hafi áhrif á hvernig kjötið verður.

[marco (í táradalnum) (IP-tala skráð) 14.9.2010 kl. 12:01]

Ég fæ ekki betur séð en þetta sé í góðu lagi. 

Í þessu felst engin íslamsvæðing eða dhimmi-trúðsháttur að mér virðist.

Að öllum rollum yrði slátrað að halal sið á Íslandi væri aftur á móti dhimmi-trúðsháttur.  Það kæmi ekki á óvart þó einhverri undirlægjunni þætti það eðlileg krafa frá hinum friðelskandi múslimum.

[Ingi Þór Jónsson, 14.9.2010 kl. 12:19]

Myndi ekki breita neinu fyrir mig ef þetta yrði normið að aflífa dýrin með þessum sið ef að öðrum reglum eins og að dýrið sé ekki með meðvitund þegar lífið fjarar út.

Ég hef ekki neina sérstaka trúarlega eða siðferðislega ástæðu fyrir því að halda að dýr sem við aflífum í stórum hópum verðskuldi það að við hugsum aðeins um hvernig þeim líður, en það er alveg óþarfi að láta þau kveljast.

Svo efast ég um að það séu neinir nema kannski Gunnar í krossinum sem eru það strangtrúaðir í þessu landi að það séu einhverjar trúarlegar ástæður fyrir því að þetta ætti ekki að vera gert.

[Ragnar Kristján Gestsson, 15.9.2010 kl. 09:34]

Þakka þér Svanur fyrir rétta notkun á hugtökunum.
@ Ingi: well, ég er í öllu falli það „strang-“ trúaður að ég kæri mig ekki um að eta kjöt sem er búið að slátra í íslamskri trúarathöfn. Þannig að fyrst verið er að fara þessa leið til að skapa goodwill meðal hinna múslímsku heimta ég að það kjöt sem sé slátrað á þennan máta sé sérmerkt svo þeir neytendur (neitendur) sem eru mér sammála geti forðast kjötið.

[Svanur Gísli Þorkelsson, 15.9.2010 kl. 09:57]

... heimta ég að það kjöt sem sé slátrað á þennan máta sé sérmerkt svo þeir neytendur (neitendur) sem eru mér sammála geti forðast kjötið.

Það finnst mér sjalfsögð þjónusta Ragnar. Enda mundi það annars ekki gagnast múslímum.

[Ragnar Kristján Gestsson, 15.9.2010 kl. 11:30]

Annars virðist mér þetta vera stormur í vatnsglasi.  Skv. greininni í Bændablaðinu virðist vera um 150 tonn að ræða sem fara einungis á erlendan markað.