Illskeytt en misheppnuð tilraun til að koma höggi á Jóhönnu

Fimmtudaginn 6. Maí varpaði Sigurður Kári Kristjánsson eftirfarandi spurningum til Forsætisráðherra  í þinginu; 

„Samkvæmt heimildum sem fjölmiðlar hafa aflað sér mun loforðið um launahækkunina til seðlabankastjórans hafa verið gefið í forsætisráðuneytinu. Hæstv. forsætisráðherra hefur reyndar verið á harðahlaupum undan þessu máli og virðist ætla að reyna að koma því yfir á einhverja aðra. En engum dylst að tilraunir hennar eigin fulltrúa í bankaráðinu til að hækka laun seðlabankastjóra eru lagðar fram á ábyrgð forsætisráðherra.

Nú vil ég spyrja hæstv. forsætisráðherra eftirfarandi spurninga og fer fram á skýr svör við þeim:

1. Hvenær var þetta loforð gefið? Hver gaf loforðið og hver hafði frumkvæði að því að það var gefið? Í umboði hvers var loforðið gefið og hverjir höfðu vitneskju um það?

2. Ég bið hæstv. forsætisráðherra að upplýsa líka um eftirfarandi: Hafði formaður bankaráðs Seðlabankans samráð við hæstv. forsætisráðherra og hæstv. fjármálaráðherra áður en þessi tillaga var lögð fram í bankaráðinu?“

Jóhanna svaraði:

„Svarið við síðustu spurningunni er nei, það var ekki haft samráð við forsætisráðherra eða fjármálaráðherra um þetta mál. Ég hef gefið alveg skýr svör í þessu máli. Það hafa engin loforð eða fyrirheit verið gefin enda ekki á mínu færi að gefa slík loforð. Laun seðlabankastjóra fara eftir lögum og ákvæðum um Seðlabankann og ekki síst niðurstöðu kjararáðs. Ég sé ekki eftir niðurstöðu kjararáðs að það sé eitthvert svigrúm til þess að beita ákvæðum sem eru í seðlabankalögunum í þessu efni til að hækka launin.

Það er tvennt sem liggur fyrir: Að seðlabankastjóri sjálfur hefur sagt að hann mundi ekki taka við slíkri launahækkun þó að hún væri í boði og að formaður bankaráðs hefur sagt að líklega verði niðurstaðan sú að þessi hugmynd og tillagan sem liggur fyrir bankaráðinu verði dregin til baka. Það hafa engar ákvarðanir verið teknar í forsætisráðuneytinu enda ekki á færi þess né ráðherra um að gefa slík loforð. Það fer eftir lögum um Seðlabanka og niðurstöðu kjararáðs. Niðurstaða kjararáðs liggur fyrir og ég sé ekki annað en að í það stefni að eftir henni verði farið vegna þess að auðvitað á að fara eftir niðurstöðu kjararáðs í þessu efni.“

Nú hefur úrdráttur úr tölvupósti frá Seðlabankastjóra til Forsætisráðherra verið birtur þar sem hann vitnar í samtöl sem hann átti við Forsætisráðherra um starfið.

Athyglisvert er að engar vísbendingar eru um að Forsætisráðherra hafi svarað þessum tölvupósti heldur hafi hún vísað þessu máli í formlega réttan farveg, þ.e. til bankaráðs.

Nú fullyrða sumir eða láta að því liggja að Jóhanna hafi sagt þingheimi ósatt þegar hún svaraði fyrirspurnum Sigurðar Kára. Þeir leiða að því líkur að Jóhanna hafi möndlað til um launin við Má og síðan gefið grænt ljós á að hækka launin við formann bankaráðs seðlabankans.

Af því sem nú liggur fyrir er samt ekkert sem bendir beint eða óbeint til þess að Jóhanna hafi sagt ósatt.

Jafnvel þótt hún hafi rætt við Má um starfið er hvergi staf að finna um einhver loforð eða fyrirheit að hennar hálfu um hækkun launa. 

Aðdróttanir pólitískra andstæðinga hennar um hið gagnstæða geta því í besta falli verið vafasamar vangaveltur en í versta falli fremur illskeytt en um leið misheppnuð tilraun til að koma höggi á Jóhönnu.

Már og Jóhanna ræddu launin

Athugasemdir

[Brattur, 6.6.2010 kl. 10:34]

Sigurður Kári er svona undirbeltispólitíkus og þetta útspil mjög í anda hans.

[Anna Sigríður Guðmundsdóttir, 6.6.2010 kl. 10:52]

Jóhanna er stálheiðarleg að mínu mati, en ég get trúað henni óþekku Ingibjörgu Sólrúnu til þess að sá fræjum illgresis.

Svo þarf Jóhanna að svara fyrir þessa illgresis-sáningu Ingibjargar Sólrúnar?

Þannig er alltaf farið með heiðarlegt fólk eins og Jóhönnu blessunina. Notað og kennt um allt sem misferst! Það er skömm að svona meðferð á heiðarlegu fólki. M.b.kv.

[Sigrún G. (IP-tala skráð) 6.6.2010 kl. 11:47]

Jóhanna er heiðarleg, held það velkist fáir í vafa um það.

En hún er líka þrjóskari en andsk.....

Og virðist geta talið sér trú um að hún geri alltaf rétt og pikkfestist í því neti.   Við eigum meira skilið en það.  Allt uppi á borðum - þið munið...?

[Anna Sigríður Guðmundsdóttir, 6.6.2010 kl. 12:20]

Sigrún G.

Já, þrjóskan getur verið bæði góð og slæm!

Það þekki ég af eigin reynslu af mér sjálfri. En ég er að byrja að þroskast og skil það nú orðið að oftast er best að nota vitið sem guð gaf mér til að rökræða og læra af öðrum, og greiða þannig bæði mína götu og annarra!

Lífið er vandasamt verkefni okkar allra?  Úff M.b.kv.

[Svanur Gísli Þorkelsson, 6.6.2010 kl. 12:43]

Þetta er allt spursmál um hvaða gleraugu fólk setur upp. Þrjóska er fyrir sumum staðfesta svo dæmi sé tekið og að segja ekki allan sannleikann, lygi.

Ég horfi ekki á þessa atlögu að Jóhönnu með flokkspólitískum gleraugum. Mér finnst bara ekki að hún eigi það skilið eins og málið er uppsett að vera kölluð ósannindamanneskja.

[Benedikta E, 6.6.2010 kl. 15:06]

Jóhanna á að segja af sér og þó fyrr hefði verið.

[Svanur Gísli Þorkelsson, 6.6.2010 kl. 15:21]

Það getur vel verið Benedikta, en ekki á þeirri forsendu að hún hafi sagt þinginu ósatt í þessu Más máli, eins og sumir halda fram.