Keppni um bestu þýðinguna á "brain drain".

Mér stendur ekki ógn af atgervisflótta frá landinu enda margir sem hafa eða eru að fara meðaljónar eins og ég sjálfur. En ég er drulluhræddur við orðið spekileki. Það er nýja orðið yfir atgervisflótta sem þykir ekki nógu fínt lengur til að nota í fyrirsagnir.

Kannski er ég svona hræddur við þetta orð af því að það er svo líkt orðinu spikleki sem er eitt það hræðilegasta sem miðaldra karlmaður getur lent í með sjálfan sig og með öðrum.

En fyrst farið var að gera tilraunir til að endurþýða enska hugtakið "brain drain"  á annað borð, hljóta margir aðrir möguleikar að koma til greina.

Til dæmis heilaniðurfall, gáfuráf, vitsog, menntaflutningar eða þekkingarþot.

Nú er um að gera lesendur góðir að hleypa sellunum á flug og koma með fleiri tillögur. MBL.IS hefur gefið boltann og hann er hjá ykkur.

Saman getum við svo valið bestu tillöguna sem við sendum svo til MBL.IS svo þeir þurfi ekki að notast lengur við orðskrípi eins og spekileki.

Athugasemdir

[sr (IP-tala skráð) 17.8.2009 kl. 21:07]

Tja, þar sem mbl kemur hér við sögu, rifjum þá áralanga notkun þess miðils á alnetinu!

[Gott orð (IP-tala skráð) 17.8.2009 kl. 21:14]

Spekileki er gamalt orð, hægt að rekja það amk 40 ár aftur í tímann, í Tímann.

http://www.timarit.is/search_init.jsp?lang=is&orderby=score&q=spekileki&searchtype=wordsearch

kær kveðja,

gott orð

[Jenný Stefanía Jensdóttir, 17.8.2009 kl. 21:29]

Minnir líka svoldið á "þvagleka" sem er önnur hörmung sem virðist óumflýjanleg þegar ákveðnum aldri er náð ef marka má það nýjasta í bleyjuauglýsingum hér vestra.

Annars er atgervisflótti fínt orð og lýsir því þegar fólk flýr núverandi atgervi sitt sem er umvafið lísfkjörum til nútíðar og framtíðar fyrst og fremst.

Skiptir þá engu máli hvort viðkomandi er spekingur, menntasnobb eða hreinsitæknir.  Öll störf rúmast í öllum þjóðfélögum.  Atgervisflóttinn grípur helst um sig á meðal þeirra sem hafa allt að vinna og engu að tapa, og þannig virðist því ástandið vera hjá ungum fjölskyldum þessa lands.

[brahim, 17.8.2009 kl. 21:35]

Brain-drain liggur í augum uppi = Heila leki.

[Hrafn Arnarson (IP-tala skráð) 17.8.2009 kl. 22:53]

Mér finnst atgervisflótti ekki gott orð . Er það atgervið sem er að flýja ? Orðið er hins vegar búið að vinna sér sess . Við getum alveg komist af án þess að þýða orðið . T.d ráðamenn óttast að menntafólk og fólk með sérþekkingu hverfi af landi brott .Það hefur aukist að menntafólk leiti sér vinnu erlendis . Menntafólk leitar ekki til útlandaa eins og óttast var . Sem sagt; orðið er óþarft .

[Lára Hanna Einarsdóttir, 17.8.2009 kl. 22:54]

Mér finnst nú spekileki bara ágætis orð. Þó hljómar það svolítið eins og það beri frekar að nota í gríni en alvöru. Atgervisflótti ætti alveg að standa fyrir sínu.

En orðið spikleki hef ég aldrei heyrt áður og finn ekki í orðabókum. Miðað við lýsingu þína er hægt að ímynda sér merkinguna. 

[Kolbrún Heiða Valbergsdóttir, 17.8.2009 kl. 22:54]

Mér finnst "gáfuráf" ansi gott en það er hugsanlega ekki nógu lýsandi fyrir það sem um ræðir. Ég er reyndar svo mikill sökker fyrir svona rími að það er lítið að marka mig

Spekileki rímar líka en ég er sammála Jenný sem finnst það líkt þvaklega og kallar fram óþægilegar myndir

[Örn Úlfar (IP-tala skráð) 17.8.2009 kl. 23:01]

Snjallfall?

Hugasuga? 

Snillivilla?

Kannski gáfna-för

eða blanda af ensku og íslensku:

Heilabeil. 

[Svanur Gísli Þorkelsson, 17.8.2009 kl. 23:40]

Gott orð getur sér gott orð með því að hafa rétt fyrir sér í því að orðið umrædda sé eins og sumt okkar, ekki bara púkalegt heldur líka gamalt. Takk fyrir það.

Jenný Stefanía. Já Þessi leka-endi á orðinu er bara einum of...eitthvað. Þess vegna verður Heila-leki brahims líka eitthvað svo lekandalegt.

Hrafn A. er auðvitað með þetta á hreinu en eyðileggur um leið fyrir okkur leikinn. Uss Hrafn.

Ef ég vissi ekki að spekileki eigi að vera þýðing á orðunum Brain Drain mundi ég ekki hafa hugmynd um merkingu þess Lára Hanna. Spikleki er miklu augljósara ;)

Gáfuráfið gengur vel finnst mér líka Kolbrún en Heilabeilið hjá Erni er tær snilli.

Þetta fer vel af stað, en betur má ef duga skal.

[Heiða B. Heiðars, 18.8.2009 kl. 00:08]

"drain" er líka notað um niðurfall.... held ég fari samt bara á koddann áður en ég fer að reyna að leika mér með það orðasamband!

[Hallgrímur Óskarsson (IP-tala skráð) 18.8.2009 kl. 00:11]

"Spekileki" finnst mér vera orðskrípi.  Það nær varla nokkurri fótfestu.  Hvorugur orðstofninn - hvorki "speki" né "leki" - eiga við hér.  Þekking lekur ekki, hún er til staðar, minnkar, eykst eða hverfur. 

Mér finnst orðið "vitsmunaflótti" betra en þau sem hér að ofan eru.

[baldur mcqueen (IP-tala skráð) 18.8.2009 kl. 00:42]

Fagflótti?

Heilahvarf?

Gráðugelding?

Neikvæður vitskiptajöfnuður?

[Kristján Kristjánsson (IP-tala skráð) 18.8.2009 kl. 00:57]

Mér kemur til hugar að nefna fyrirbærið andans útvistun.

[Sæmundur Bjarnason, 18.8.2009 kl. 00:59]

Vitfall
Vitþurrð
Heilaþurrð

[Eygló, 18.8.2009 kl. 01:25]

"Atgervisflótti" er skömminni skást, þótt spekileki sé fyndið. Það minnir mig samt of mikið á heilasjúkdóma. Alzheimer - spekin lekur smátt og smátt.

"Atgervisþurrð" gæti orðið ef fólk sem er vel að sér til hugar og handa, flýr/flytur frá landinu.

"Útflæði"

Sem betur fer er það ekki bara atgervisfólk sem fer utan. Mökkur af miðlungs- og undirmálsfiskum fer líka, sennilega ekki síður.

[Kama Sutra, 18.8.2009 kl. 01:46]

Kunnáttukröm

Kunnáttukast

Kunnáttukrani

Þekkingarþurrð

[hj (IP-tala skráð) 18.8.2009 kl. 03:24]

Andlos (sbr. andleysi)

[Eygló, 18.8.2009 kl. 03:30]

Á þetta ekki við flutning úr landi?  Þá helst þegar afbragð fólks flytur burt með þekkingu sína með sér.

Ég skil þetta ekki sem eitthvað sé að heilum þeirra sem eftir eru?

[Gudmundur Bjarnason (IP-tala skráð) 18.8.2009 kl. 03:46]

Það er skrítið að landflótti skuli ekki sjást hér að ofan.

[Helga Kristjánsdóttir, 18.8.2009 kl. 03:49]

´Held að dren (drain) sé orðið fast í ísl.máli.  Píparar leggja dren,læknar setja dren í fólk. Tillaga mín er því  "gendren".            Annars kann ég vel við atgerfisflótta.

[Haukur Kristinsson (IP-tala skráð) 18.8.2009 kl. 05:29]

Atgerfi þýðir hæfileikar, en með "brain drain" er átt við að fólk, sem hefur þegar aflað sér menntunar flytur á brott. Hin orðin eru skrípi.  

En hvernig væri með "fræðsluflótti"?

[Jóhann (IP-tala skráð) 18.8.2009 kl. 08:13]

Afskrift.

[Lárus (IP-tala skráð) 18.8.2009 kl. 09:49]

þegar kreppan skall á vinum vorum Færeyingum var talað um afeyjun. s.s. að fólk færi af eyjuni..

mér finnst það fjandi gott orð og eiga ágætlega við um ísland líka. Gríðarleg afeyjun mun eiga sér stað hér ef ekki verður breyting á högum íslendinga mjög fljótlega.

[Þrándur (IP-tala skráð) 18.8.2009 kl. 10:01]

Þekkingarflótti sýnist mér ganga...

Heiladren kannski líka...

Annars held ég að aðalatriðið sé að reyna að streytast á móti þessari þróun. Hvort sem fólk býr yfir mikill eða lítilli þekkingu þurfum við á öllu okkar að halda til að sækja fram.

[Gústaf Níelsson, 18.8.2009 kl. 10:17]

Orðið spekileki er eldra í málinu en margur hyggur. Ég minnist þess að hafa heyrt orðið notað fyrst fyrir svona þrjátíu árum eða svo og þá alls ekki í merkingunni atgervisflótti, heldur í þeirri merkingu að spekin læki þar sem margir gáfumenn kæmu saman á einum stað.

[Svanur Gísli Þorkelsson, 18.8.2009 kl. 10:21]

Þetta líkar mér. Hér er komið ýmislegt til að moða úr. Heiða greinilega of uppgefin til að takast á við annað en koddann.

Orðið vitsmunaflótti sem Hallgrímur stingur upp á gæti hæglega gengið, en það er áþekkt atgervisflótta.

Af tillögum Baldurs Mcqueen finnst mér neikvæður vitskiptajöfnuður skondnast.

Sæmi, Gló og Kama Sutra koma öll með orð sem enda á -þurð og þar af finnst mér orðið Þekkingarþurð langbest.

Útvistun Kristjáns og Andlosið hjá hj eru frumlegar uppástungur en dáítið langsóttar

Guðmundur Bjrna bendir okkur á orð sem lengi hefur verið notað um fólk af öllu tagi sem flýr land Þ.e. landflótta.

Helga: Mér finnst í lagi að píparar noti orðið dren, Þeir nota hvort eð er fult af orðum sem ég skil ekki. En alls ekki nokkrir aðrir :)

[Baldvin Berndsen (IP-tala skráð) 18.8.2009 kl. 10:53]

HVAÐ MEР    HEILAAFVÖTNUN !

[Svanur Gísli Þorkelsson, 18.8.2009 kl. 11:16]

Flott orð hjá Hauki Fræðsluflótti.

Afskriftir Jóhanns,  Afeyjun Lárusar og heilaafvötnun Baldvins eru komin á blað.

En þá er komið að því að velja bestu uppástunguna. Ég hef komið flestum orðunum fyrir í skoðanakönnun hér ofarlega á síðunni þar sem fólk getur kosið bestu þýðinguna að þeirra mati.

Ef að einvher vill láta bæta við orðum á er það velkomið.

[Helga Kristjánsdóttir, 18.8.2009 kl. 12:18]

Ætla nú ekki að verja tillögu mína en, læknar kalla það dren sem þeir settu í eitt barna minna,hvers lunga hafði fallið saman  á.  Einnig er óhreinu blóði þarf að veita út úr lílama.

[DoctorE (IP-tala skráð) 18.8.2009 kl. 12:42]

Vitsmunaniðurfall... kannski smá LAME :)

[Svanur Gísli Þorkelsson, 18.8.2009 kl. 13:05]

Bæti því við DoctorE.

Það er líka alveg óþarfi kæra Helga enda allt í gamni gert:) Kannski finnst læknum ekki hægt að nota orðið "niðurfall" við slík tækifæri ;)

[Helgi Arnthorsson (IP-tala skráð) 18.8.2009 kl. 14:04]

Heilaflótti.

[dr. Igito (IP-tala skráð) 18.8.2009 kl. 14:10]

Er þetta ekki neikvæður vitsmunajöfnuður?

[halkatla, 18.8.2009 kl. 14:24]

ég segi heilasog, ef það var ekki þegar komið - mér finnst þetta samt allt flott og viðeigandi ;)

[halkatla, 18.8.2009 kl. 14:24]

sambærilegt: "geðveikt heilasog hefur átt sér stað á íslandi!!!"

[Baldur Fjölnisson, 18.8.2009 kl. 16:34]

Þegar um er að ræða að losna við úr landi síkópatíska viðskiptamenn og fjármálafræðinga og önnur álíka keis sem hafa komið okkur á hausinn - kallast það landhreinsun. Að öðru leyti er atgervisflótti gott og gilt orð.

[Þorsteinn Helgi Steinarsson, 18.8.2009 kl. 17:20]

Skreppiskyn. Þjóðin verður þá skyni skroppin.

[Eygló, 18.8.2009 kl. 17:59]

Skreppur

[Óskar Þorkelsson, 18.8.2009 kl. 18:09]

viskuþurrð.. getur vel verið að það sé komið

[Brjánn Guðjónsson, 18.8.2009 kl. 18:29]

heilaþrot.
sinnisskorpur.

annars þarf ekki að snara orðunum beint.

kvarnaskarn.
eða sem tilbrigði við tillögu Þorsteins, skynskreppur

[Zaraþústra, 19.8.2009 kl. 01:32]

Heitir þetta ekki vitfirring á íslensku?

[Helga Kristjánsdóttir, 19.8.2009 kl. 03:45]

Já auðvitað er þetta í gamni,ég reyni nú alltaf að troða mér í það,góði.

[Theódór Norðkvist, 20.8.2009 kl. 02:14]

Vitsnúningur.

[Helgi Laxdal (IP-tala skráð) 20.8.2009 kl. 02:57]

Hvað með vitstol / vitstuld ?

 Ekki er þetta ástand sem nú ríkir komið til af ásetningi, alla vega ekki ásetningi meiri hluta þjóðar.

 Einnig vísar þetta í orðið vitstola, fyrir þá sem ekki vita ;)

Ég veit ekki hvernig þetta leggst í ykkur, fannst þetta bara liggja beinast við þegar ég renndi yfir athugasemdirnar hérna. :)

[Auður H Ingólfsdóttir (IP-tala skráð) 20.8.2009 kl. 15:27]

Í ensku er stundum talað um "brain gain" sem andstæðuna við "brain drain". Með öðrum orðum, þá njóta svæði sem draga til sín vel menntað hæft "brain gain", á meðan hin svæðin þurfa að sætta sig við "brain drain".

Þannig að nú er spurningin hvort hægt sé að finna góð íslensk orð fyrir bæði hugtökin, sem spila jafn skemmtilega saman og á enskunni...

Annars mörg ár síðan ég heyrði fyrst orðið spekileki, og því hugtak sem er mér sæmilega tamt að nota.

[Hallgrímur Óskarsson (IP-tala skráð) 22.8.2009 kl. 12:53]

Ætli að besta orðið sé ekki: " Viskuflóti ".

Betra en fræðsluflótti því það er vit/viska sem útþynnist fremur en fræðslan.  Fræðslan verður áfram til staðar sbr. kennsla í háskólum en heildarviska hópsins þynnist út (e. dillution).

Gengur það?  Viskuflótti ?